Yuvu Y’atangi

Nki kifilanga “eyi itombwanga kwa zula yawonso” mu kota muna “nzo” ya nsambila aludi?​—⁠Kangai 2:⁠7.

Muna Kangai wa ngunza, Yave wazaisa vo: “Nikuna nikuna zula yawonso, eyi itombwanga kwa zula yawonso ikwiza, nzadisa nzo yayi yo nkembo.” (Kangai 2:⁠7) Nga ndikuna ya “zula yawonso” yau ifilanga “eyi itombwanga” kwa zula​—⁠wantu akwa ntima miansongi, mu kota mu nsambila aludi? Ve.

Yindula e ndikuna yovo zakamesa e zula ye dina itwasa. Muna Nkand’a Nzambi tutanganga vo, ‘e zula kisangulukila yo lombolola mambu ma mfwanti.’ (Nkunga 2:⁠1) Mambu ma “mfwanti” mana ‘belombololanga’ i kani dia kwamanan’o yala. Ke vena diambu dilutidi kubazakamesa ko ovo ke vumisa luyalu lwau ko.

E nsangu besamunanga Mbangi za Yave muna nza yawonso vo e Kintinu kia Nzambi kiasikidiswa kala, zau zivumisanga azula. Besamunanga mpe vo, Kintinu kia Nzambi kiyalwa kwa Yesu Kristu “kikosomona yo sukisa yintinu yayi yawonso” ya wantu. (Daniele 2:​44) E nsangu za lufundisu lwa Nzambi zina tusamunanga, i zinikunanga azula. (Yesaya 61:⁠2) E ndikuna yayi iwokelanga ekolo salu kia samuna nsangu zambote kiwokelanga. Owau, e ndikuna yasakulwa muna Kangai 2:7 nki isonganga?

Muna Kangai 2:6 tutanganga vo: “Kadi i wau wuwu kavovele o Yave a vu, Nkumbu mosi, i finkolokolo, Nikuna nikun’ezulu ye nza, mbu yo ntoto ayuma.” Paulu wa ntumwa wayika sono kiaki vava kasoneka vo: “Kansi owau kasidi nsilu, oku vo, Ndikuna mosi diaka nikuna, ke ntoto kaka ko, y’ezulu mpe. Ediadi mpe, ndikuna mosi diaka, i dizikinis’e nkatul’a ina yanikunwa, nze yau yavangwa, ina yalembi nikunwa [e Kintinu] yasala.” (Ayibere 12:​26, 27) Elo, e nza yawonso inikunwa yovo fwaswa mu sisa fulu kwa nz’ampa a Nzambi.

Akwa ntima miansongi bekotanga muna nsambila aludi, ke mu kuma kia ndikuna yovo zakamesa kwa zula ko. Dina dikubatuntanga kwa Yave ye kubafila mu kota muna nsambil’andi, i diau adimosi mpe dizakamesanga azula, i sia vo, nsangu zisamunwanga muna nza yawonso vo, e Kintinu kia Nzambi kiasikidiswa kala. Salu kia samuna “nsangu zambote za mvu ya mvu” kituntanga akwa ntima miansongi mu kota muna nsambila ya Nzambi aludi.​—⁠Lusengomono 14:​6, 7.

E nsangu za Kintinu i nsangu za lufundisu ye luvuluzu. (Yesaya 61:​1, 2) Ozevo, salu kia samuna e nsangu zambote muna nza yawonso mambu mole kivanganga: kinikunanga azula yo kotesa eyi itombwanga kwa zula muna nzo a nkembo a Yave.