Wau vo Nzambi watuvanga muna songa walakazi ye otoma yangalelanga e fu kiaki, okutuwondelelanga vo: “Nukala yo walakazi,” muntu yo nkw’andi. (Efeso 4:​32) Tusungameswanga mpe vo: “Ke nuvilakanw’o zola nzenza ko” yovo songa “ngemba kwa nzenza.”​—Ayibere 13:2.

Vava Paulu wa ntumwa kayika mfunu wasonganga ngemba kwa nzenza wakudikila vo: “Kadi muna wau, akaka i basongela mbasi e lombo, wau ke bazayi.” Nga olenda yindula una wadi mona avo bavene elau dia tambula mbasi? Paulu wasadila mvovo, “wau ke bazayi.” Muna mvovo wau Paulu wasonga vo, avo tusongele ngemba kw’anzenza yovo kwa wantu tulembi zaya, tusambulwa kikilu.

Nsekola zayingi za Nkand’a Nzambi zina ye referências cruzadas, zitezanesanga e mvovo mia Paulu ye lusansu lwa Abarayama yo Loti mun’Etuku kapu kia 18, 19. Muna tusansu twatu, tutanganga vo ambasi babalwakila nze nzenza muna kubasamunwina nsangu zamfunu. Mbasi wazayisa Abarayama nsilu a Nzambi vo owuta mwan’eyakala, o Loti wazayiswa vo ovuluzwa muna lufwasu lwa mbanz’a Sodomo ye Ngomora.​—Etuku 18:​1-10; 19:​1-3, 15-17.

Avo otangidi sono yayi, omona vo Abarayama ye Loti basonga ngemba kwa nzenza balembi zaya ana bayiza muna zunga kiau. Dialudi vo, otambula nzenza yovo ntungi kuna nz’ankulu ke kiakala kaka fu kia wantu ko, kansi mbebe mpe. O Nsiku a Nzambi kwa Mose, wakanikina Aneyisaele vo balunga-lunganga nsatu z’awana bakala vo nzenza muna nsi au. (Nsiku 10:​17-​19) Una Nzambi kasikidisi ko nsiku wasonga ngemba, Abarayama yo Loti basonganga fu kiaki. Wau vo basia ngolo muna songa ngemba kwa nzenza, basambulwa kikilu.

E ngemba kasonga Abarayama, ke diantwasila kaka nsambu za wuta mwana ko, kansi diatutwasila mpe e nsambu. Mu nkia mpila? Abarayama yo Mwan’andi Isaki, mbebe ampwena balungisa muna ndungan’ekani dia Nzambi. Oyau bakala se ntu muna luvila kayizila Yesu wa Masia. Evangu dia kwikizi dia Abarayama yo Isaki diasonga mpe una Nzambi kasongela o zola kwandi muna vuluza wantu.​—Etuku 22:​1-18; Matai 1:​1, 2; Yoane 3:16.