LONGI DIA 11
Aweyi Olenda Bakila e Nluta Vava Otanganga e Bibila?
Nga wavanga kala nkubika mu sala salu kiampwena yo mona vo kiampasi kikilu? Nanga muna lenda kio sala, diavavanga vo wasalanga kio ndambu-ndambu. I diau mpe divavuanga muna tanga Bibila. Ezak’e ntangwa olenda kukiyuvula: ‘Aveyi ngiantikila?’ Mu longi diadi, tufimpa mambu malenda kusadisa mu yangalela tanga yo longoka e Bibila.
1. Ekuma tufwete tangilanga e Bibila lumbu yawonso?
O muntu otanganga e Bibila yovo “nsiku a Yave” lumbu yawonso, okala ye kiese ye mawonso kevanga mesikila. (Tanga Nkunga 1:1-3.) Kuna lubantiku, olenda kio tanganga mu miniti miakete konso lumbu. Vava oyantika kulukilwa e Diambu dia Nzambi, e kiese kiaku muna tanga e Bibila kiwokela.
2. Nkia diambu dilenda kusadisa mu baka e nluta vava otanganga e Bibila?
Muna baka e nluta vava otanganga e Bibila, ofwete ningamanga yo yindula mana otangidi. O tanga yo ‘yindula’ mfunu kwina. (Yosua 1:8, mvovo va yanda lukaya) Ekolo oyindulanga, ukiyuvula: ‘Mana ntangidi adieyi mandongele mu kuma kia Yave wa Nzambi? Aweyi ndenda mo sadila muna zingu kiame? Aweyi ndenda mo sadila muna sadisa akaka?’
3. Adieyi olenda vanga mu kala ye ntangwa ya tanganga e Bibila?
Nga diampasi dikalanga kwa ngeye mu vaula e ntangwa ya tanga e Bibila? Avo i wau, zaya wo vo kuna ngeye mosi ko. Vanga e ngolo muna toma ‘sadilanga e ntangw’aku.’ (Efeso 5:16) Olenda wo vanga muna sikidisa e ntangwa yambote muna tanganga e Bibila konso lumbu. Wantu ankaka bevaulanga e ntangwa muna mene mu tanga e Bibila. Akaka muna mwini, dilenda kala muna ola ya vunda kuna salu yovo kuna sikola. Kansi, akaka betanganga e Bibila muna fuku vitila benda leka. Nkia ntangwa omwene vo yambote kwa ngeye?
ZAYA DIAKA MANKAKA
Zaya una olenda kitulwila e ntangilu aku a Bibila se yakiese. Zaya mpe una olenda toma kubamena mu baka e nluta vava olongokanga e Bibila.
Olenda yantika yangalela tanga e Bibila nze una olenda yangalela dia madia mana kwateka dia ko
4. Adieyi olenda vanga mu kitula e ntangilu aku a Bibila se yakiese?
Dilenda kala diampasi mu yantika tanga e Bibila. Kansi, avo otezele olenda yantika yangalela tanga e Bibila nze una olenda yangalela dia madia mana kwateka dia ko. Tanga 1 Petelo 2:2, i bosi, vana e mvutu za kiuvu eki:
Nga o tanga e Bibila lumbu yawonso, dikusadisa mu yangalela kio yo kwamanana kio tanga?
Tala e VIDEO muna zaya una akaka bavanga mu yangalela tanga e Bibila. I bosi, vana e mvutu za yuvu ilende.
Nze una omwene muna video, nkia nkakalakani aleke basunda?
Nki kiabasadisa mu kwamanana tanga e Bibila?
Nkia mambu bavanga mu kitula e ntangilu au a Bibila se yakiese?
Mambu malenda kusadisa mu yantika:
Sola nsekola ya Bibila ya ziku ye yaleboka. Olenda sadila Nsekola ya Nz’ampa, ina muna ndinga zayingi.
Yantikila muna tusansu tuna oyangalelanga. Tala ngindu zina muna babu “Yantika Tanga e Bibila.”
Tulanga e sinsu vana ofokolwele o tanga. Sadila e babu “Tala vana wafokolwele” kina muna nkanda wau.
Sadila aplicativo JW Library®. Muna aplicativo yayi olenda tanga yovo wá audio ya ntangilu a Bibila konso fulu una muna sadila telefone yovo salanganu kiankaka.
Sadila nkudika ina muna Nsekola ya Nz’ampa. Muna nkudika yayi muna ye mapa, babu ye nsas’a mvovo. Mambu mama malenda kusadisa mu yangalela e ntangilu aku a Bibila.
5. Toma kubama mu baka nluta muna longi diaku dia Bibila
Tanga Nkunga 119:34, i bosi, vana e mvutu za kiuvu eki:
Ekuma dinina diamfunu mu sambanga vitila wayantika tanga e Bibila yovo vitila wayantika kubika e longi diaku dia Bibila?
Aweyi olenda bakila e nluta muna konso longi? Ekolo okubikanga e longi mu nkanda wau, teza sadila e ndekwa zilende:
Tanga tini yantete ya longi.
Tanga e sono ya Bibila yo vava bakula e ngwizani ina ye longi.
Sia sinsu muna mvovo yovo nlonga miasina mivananga e mvutu za konso kiuvu, ediadi dikusadisa mu badika e longi yo nlongi aku.
Nga ozeye?
Mbangi za Yave besadilanga nsekola zayingi za Bibila. Kansi, betoma sadilanga Bibila—Nsekola ya Nz’ampa kadi e nsekola yayi yaziku, yatoma kiá ye isadilanga e nkumbu a Nzambi.—Tala e longi dina muna jw.org “Nga e Bibila kia Mbangi za Yave Kiaswaswana?”
AVO MUNTU UVOVESE VO: “O longoka e Bibila ntangwa yayingi ye ngolo divavanga, kina ye ntangwa yayi ko.”
Adieyi okumvovesa?
MAMBU MASINA MA LONGI DIADI
Muna baka e nluta mia Diambu dia Nzambi, vaulanga e ntangwa yatanga, samba muna bakula mana otanganga yo kubika e longi diaku dia Bibila.
Nkia Mambu Olongokele?
Nkia mambu malenda kusadisa mu baka e nluta muna ntangilu aku ya Bibila?
Adieyi olenda vanga mu kala ye ntangwa ya tanga yo longoka e Bibila?
Ekuma dinina diambote wateka kubamanga vitila wayantika longoka e Bibila?
TALA MPE OMA MALENDE
Tala ndekwa zankaka zilenda kusadisa mu baka e nluta muna ntangilu aku ya Bibila.
“Nki Kilenda Kusadisa mu Bakula Nkand’a Nzambi?” (Eyingidilu No. 1 2017)
Zaya ndekwa tatu olenda sadila mu tanga e Bibila.
“Aweyi Bibila Kilenda Kunsadisila?—Ndambu 1: Toma Zaya e Bibila Kiaku” (Longi dina muna jw.org)
Zaya una olenda yangalela ntangilu a Bibila.
Zaya ndekwa besadilanga awana betanganga e Bibila mu mvu miayingi.