Tukangalela Nze Una Yesu Kristu Kakangalela
‘Ndion’ovovele vo mu yandi [Nzambi] kekalanga, kafwete kangalela una [Yesu] kakangelela.’—1 YOANE 2:6.
1, 2. O sia e sungididi muna Yesu adieyi kuvavanga?
PAULU wa ntumwa wasoneka vo: ‘Mbula twalundumukina kuna luzindalalu o nkula tusidilu, twasi’ak’o meso muna Yesu w’etuku yo nzikudi a lukwikilu lueto.’ (Ayibere 12:1, 2) O landa e nzil’a unsongi divavanga vo twasia kaka o meso muna Yesu Kristu.
2 O mvovo wasekolwa vo ‘sia kaka o meso,’ nze una usadilwanga muna Sono ya Kingerekia ya Kikristu, usonganga vo “sia e sungididi muna muntu, lembi vukumunwa kwa lekwa kiakaka.” Dicionário mosi isasilanga vo: “Vava o nlundumuki a mwisi Ngerekia kayambulanga o sia e sungididi muna nkula ye mun’ekani kalundumukinanga, kana nkutu mu fikolo yo vukumukina o tala o nkangu, o nswalu andi wakulukanga. Diau adimosi mpe dibwilanga Akristu.” Vunzanesa e ngindu kulenda kutusimba mu lembi nungunuka muna mwanda. Tufwete sianga e sungididi kieto muna Yesu Kristu. Nki tutalanga muna Yesu w’Etuku? O mvovo wa Kingerekia wasekolwa vo “Etuku” usongele vo “mfidi, ona ovitanga o ntu muna konso diambu yo songa e mbandu.” Sia e sungididi muna Yesu divavanga vo twalanda e mbandu andi.
3, 4. (a) O kangalela nze una Yesu Kristu kakangalela aweyi divavanga kwa Yeto? (b) Nkia yuvu tufwete badika?
3 Muna Nkand’a Nzambi tutanganga vo: ‘Ndion’ovovele vo mu yandi [Nzambi] kekalanga, kafwete kangalela una [Yesu] kakangalela.’ (1 Yoane 2:6) Tufwete kwamanananga kala yo Nzambi muna lemvokelanga e nkanikinu mia Yesu nze una kalemvokela mina mia S’andi.—Yoane 15:10.
4 O kangala nze una Yesu kakangalela, divavanga vo twansia e sungididi nze Mfidi yo landa e ntambi zandi. E yuvu yamfunu tufwete badika i yayi: O Kristu aweyi kekutufidilanga o unu? O tanginina una kakangalela aweyi difwete vanga kwa yeto? O landa e mbandu yasisa Yesu Kristu nkia nluta ditwasanga?
O Kristu Aweyi Kefidilanga Alandi Andi?
5. O Yesu una katombokele ko kun’ezulu, nkia nsilu kasila alandi andi?
5 Una katombokele ko kun’ezulu, Yesu Kristu wamoneka kwa alongoki andi yo kubavana salu kiamfunu. Wabavovesa vo: “Nwenda, nwakitula wantu a zula yawonso s’alongoki.” I bosi, wabasila nsilu vo okala yau ekolo belungisa e salu kiaki. Wavova vo: “Tala, ngina yeno e lumbu yawonso, yakuna nsuk’a tandu.” (Matai 28:19, 20) O Yesu aweyi kekadilanga y’alandi andi oku nsuk’a tandu kiaki?
6, 7. O Yesu aweyi kekutufidilanga muna mwand’avelela?
6 Yesu wavova vo: “O nsadisi, wa mwand’avelela, ona otuminwa kwa Se muna nkumbu ame, yandi okunulonga mawonsono, yo kunususwila mawonso mana inuvovese.” (Yoane 14:26) O unu, o mwand’avelela watumwa muna nkumbu a Yesu, ukutufilanga yo kutukumika. Ukututemonanga muna mwanda yo kutusadisa mu bakula “oma masina ma Nzambi.” (1 Korinto 2:10) Vana ntandu, e fu nze ‘zola, kiese, luvuvamu, luzindalalu, walakazi, unsongi, kwikizi, lembama, volo’ i “mbongo a mwanda.” (Ngalatia 5:22, 23) Muna lusadisu lwa mwand’avelela, tulenda yima e fu yayi.
7 Vava tulongokanga o Nkand’a Nzambi yo sia ngolo za sadila mana tulongokanga, o mwand’a Yave ukutusadisanga mu wokesa e ngangu, umbakuzi, zayi ye ndwenga. (Ngana 2:1-11) O mwand’avelela ukutusadisanga mpe mu zizidila e ntonta ye mpasi. (1 Korinto 10:13; 2 Korinto 4:7; Filipo 4:13) Akristu belukiswanga vo ‘bayikiànzisa muna nsafu wawonso wa nitu yo mwanda, bazikul’o velela.’ (2 Korinto 7:1) Nga tulenda zingila e ngwizani ye nsiku miavelela mia Nzambi kondwa lusadisu lwa mwand’avelela? O unu, Yesu okutufidilanga muna mwand’avelela una Yave wa Nzambi kamvanina nswa kasadila.—Matai 28:18.
8, 9. O Kristu aweyi kesadilanga “ntaudi akwikizi yo lulungalalu” mu fila e nkutakani?
8 Tubadika mpila yakaka ina Kristu kefidilanga e nkutakani o unu. Vava kayika e ngiz’andi ye mbaninu a tandu kiaki, Yesu wavova vo: “Nani i ntaudi akwikizi yo lulungalalu, ina isiwa kwa mfumu andi e kiyekwa kia nzo andi, kabavana madia muna ntangw’andi? Nkwa nsambu e ntaudi ina iwanwa kwa mfumu andi vo wau ivanganga, ovo wizidi. Kieleka inusamunwini vo, Kakunsi’e kiyekwa kia salanganu yandi yawonso.”—Matai 24:3, 45-47.
9 O “mfumu” i Yesu Kristu. O “ntaudi” i buka kia Akristu akuswa bena ova ntoto. O ntaudi akwikizi yo lulungalalu wavewa e mbebe ya lunga-lunga mavwa ma Yesu ova ntoto yo kubika madia ma mwanda. O “ntaudi akwikizi yo lulungalalu” osunzulwanga kwa Buka kia Selo Yambuta, i sia vo fibuka fia akuluntu azikuka bakuswa muna mwanda. Befilanga e salu kia samun’e nsangu zambote omu nza yawonso yo kubika madia ma mwanda muna ntangwa yafwana. I kuma vo, o Kristu ofilanga e nkutakani muna “ntaudi akwikizi yo lulungalalu” ye Buka kiandi kia Selo Yambuta.
10. Aweyi tufwete badikilanga akuluntu? Ekuma?
10 E mpila yakaka in’o Kristu kefidilanga e nkutakani i ‘tukau twa wantu’—Akuluntu Akristu yovo akengi. Besiwanga ‘muna fwanis’aveledi, muna salu kia uselo, muna vangames’e to kia Kristu.’ (Efeso 4:8, 11, 12) Muna Ayibere 13:7, tutanganga mu kuma kiau vo: “Nuyindulang’awana bakedi ye wisa vovo nwina, ana banusamunwinang’e diambu dia Nzambi; nubadik’e nsuk’a nkal’au, nwatanginina lukwikilu luau.” Akuluntu bevitanga o ntu muna nkutakani. Wau vo Yesu Kristu betangininanga, lukwikilu lwau lwafwana tangininwa. (1 Korinto 11:1) Tulenda songa luyangalalu lweto muna nkubika ya akuluntu muna lemvokela yo sakalela o ‘tukau’ twatu.—Ayibere 13:17.
11. O Kristu nkia mpila kefidilanga alandi andi o unu? Adieyi divavwanga muna kangalela nze una kakangalela?
11 Elo, Yesu Kristu osadilanga mwand’avelela, “ntaudi akwikizi yo lulungalalu”, y’akuluntu a nkutakani mu fila alandi andi o unu. Muna kangalela nze una Kristu kakangalela, tufwete zaya yo sakalela e nkubika zina kesadilanga mu fila e nkutakani. Ediadi divavanga mpe vo twatanginina e mpila kakangalela. O Petelo wa ntumwa wasoneka vo: ‘Muna diambu diadi i nwabokelwa: kadi o Kristu wanumwen’e mpasi, wanusisil’e mbandu, nwalanda muna ntambi zandi.’ (1 Petelo 2:21) Mu nkia mambu tufwete landila e mbandu a Yesu?
Sadila e Wisa Muna Tezo
12. Nkia mbandu a Kristu bafwete landa akuluntu muna nkutakani?
12 Kana una vo Yesu wavewa wisa kiayingi kwa S’andi, mu tezo kesadilanga kio. Awonso muna nkutakani, musungula akuluntu, bafwete yambula vo ‘unleka wau, wazayakana kwa wantu awonso.’ (Filipo 4:5; 1 Timoteo 3:2, 3) Wau vo akuluntu bavwidi wisa muna nkutakani, diamfunu balandanga e ntambi za Kristu muna sadila kio.
13, 14. Akuluntu nkia mpila balenda tanginina Kristu vava bekasakesanga akaka mu sadila Nzambi?
13 Yesu wazayanga e tezo kia alongoki andi. Kavavanga ko vo bavanga dina ke balendi vanga ko. (Yoane 16:12) Lembi kubakomekena, Yesu wakasakesa alandi andi ‘basiamanana’ muna vanga luzolo lwa Nzambi. (Luka 13:24) Wavanganga wo muna vitang’o ntu muna salu kia Nzambi yo kubakasakesa basadila Nzambi muna nsi a ntima wawonso. Diau adimosi mpe o unu, akuluntu Akristu ke bafwete vumisanga akaka ko mu sadila Nzambi mu wonga. Kansi, kubakasakesanga basadila Yave muna songanga zola kwa Nzambi, kwa Yesu ye akw’au.—Matai 22:37-39.
14 Yesu kasadila wisa kavewa mu mpila yambi ko, i sia vo, bangika wantu. Kabasila nsiku miampasi ko ngatu ulolo wa nkanikinu. Ekani diandi i kasakesa akaka balemvokela malongi makala muna nsiku miavewa kwa Mose. Muna tanginina Yesu Kristu, akuluntu bevenganga e fu kia sia nsiku miampasi yovo komenena akaka e ngindu za yau kibeni. Muna mambu ma vwata yo kuyikubika yovo nsaka, akuluntu besianga ngolo za kotesa e nkanikinu mia Nkand’a Nzambi muna ntima mia wantu nze mina miyikwanga muna Mika 6:8; 1 Korinto 10:31-33; 1 Timoteo 2:9, 10.
Kala Nkwa Nkenda yo Lolokanga Akaka
15. Yesu aweyi kabadikilanga vilwa w’alongoki andi?
15 Kristu watusisila mbandu ambote muna mpila kabadikilanga o vilwa w’alongoki andi. Mambu mole tubadika mabwa muna fuku wansuka wa zingu kiandi ova ntoto. Vava balwaka kuna Ngetesemane, Yesu ‘wanata Petelo yo Yakobo yo Yoane’, wabavovesa vo ‘bayingila.’ I bosi ‘wavauka fiakete kuna ntu, obwidi o mambukama, osambidi.’ Vava kavutuka ‘wabawana ku nsi a tulu.’ O Yesu adieyi kavanga? Wavova vo: “O mwand’ele uzolele, kansi e nitu yatovoka.” (Maku 14:32-38) Vana fulu kia tumba Petelo, Yakobo yo Yoane, wabafwila e nkenda. Muna fuku wauna, Petelo wavanina Yesu nkalu nkumbu ntatu. (Maku 14:66-72) O Yesu aweyi kabadikila Petelo? O Nkand’a Nzambi uvovanga vo: “O Mfumu ofulukidi kikilu, omonekene kwa Simone [Petelo].” (Luka 24:34) Uvovanga diaka vo: ‘Wamoneka kwa Kefa; i bosi kwa yau ekumi ye zole.’ (1 Korinto 15:5) Vana fulu kia kumfungila makasi, Yesu waloloka Petelo ona waviluka o ntima yo kunkasakesa. Kuna kwakwiziwa, Yesu wavana Petelo mbebe yampwena.—Mavangu 2:14; 8:14-17; 10:44, 45.
16. Aweyi tulenda kangalela nze una Yesu kakangalela vava mpangi zeto Akristu bekutukendelekanga yovo vanga e mbi?
16 Vava mpangi zeto Akristu bekutukendelekanga yovo vanga e mbi mu kuma kia usumuki, yeto mpe tufwete kubafwilanga e nkenda yo kubaloloka nze una Yesu kavanga. Petelo wavovesa minkwikizi akw’andi vo: “Yeno awonso nukala yo ntima mosi, akwa ngyambani muna mpasi yo wete, ye nzolani a ungudi, yo walakazi, yo lusakalalu lua ntima: ke nuvutula mbi muna mbi ko, ngatu malevo muna malevo; deke nwasambula kaka.” (1 Petelo 3:8, 9) Adieyi tuvanga kele vo muntu kazolele kutufwila nkenda ko yovo kutuloloka nze una Yesu kavanganga? Kana nkutu i wau, tuvwidi mbebe ya sia ngolo za tanginina Yesu yo vanga nze una kadi vanga.—1 Yoane 3:16.
Tusia Mambu ma Kintinu va Fulu Kiantete
17. Adieyi disonganga vo Yesu luzolo lwa Nzambi kasianga va fulu kiantete muna zingu kiandi?
17 Vena diaka ye mpila yakaka tufwete kangalela nze una Yesu Kristu kakangalela. Yesu wasianga e salu kia samun’e nsangu zambote va fulu kiantete muna zingu kiandi. Vava kamana sila umbangi kwa nkento a mwisi Samaria, lukufi ye mbanz’a Sika, Yesu wavovesa alongoki andi vo: ‘Okwame dia yavanga luzolo lua ndiona wantuma, yamanisa mpe salu kiandi.’ (Yoane 4:34) O vanga luzolo lwa S’andi kwakumika Yesu ye kwakala nze madia mambote kwa yandi. Nga tanginina Yesu muna sianga luzolo lwa Nzambi va fulu kiantete, mu zingu kia kondwa mfunu ye kiese kukutufila?
18. O kasakesa wana mu kota mu salu kia ntangwa ke ntangwa nkia nluta ditwasanga?
18 Vava amase bekasakesanga wan’au bakota mu salu kia ntangwa ke ntangwa, yau kibeni yo wan’au nsambu zayingi bebakanga. Ese dimosi dia mapasa wakasakesanga wan’andi mu sala salu kia kimviti a nzila tuka kileke kiau. Vava bafokola sikola, mapasa bakota mu salu kia kimviti a nzila. Muna yindula kiese kamonanga, ese diadi wasoneka vo: “Wan’eto ke batukendeleka ko. Tulenda vova ye kiese kiawonso vo ‘wana se lukau lwa Yave.’ ” (Nkunga 127:3) Nkia nluta bebakanga o wana muna sala e salu kia ntangwa ke ntangwa? Ngudi mosi a wan’atanu wavova vo: “E salu kia kimviti a nzila kiasadisa wan’ame awonso mu wokesa e ngwizani au yo Yave. Kiabasadisa mu kala y’elongi dia yau kibeni dia Nkand’a Nzambi, kiabalonga o toma sadila ntangwa yo sia mambu ma mwanda va fulu kiantete muna zingu kiau. Kana una vo mayingi basoba muna zingu kiau, ke vena mosi ko mu yau okuyibanzanga mu kuma kia salu basola.”
19. Aleke nkia makani ma kusentu bafwete toma badika?
19 Aleke, ameyi i makani meno ma kusentu? Nga sadila mu kompani yovo sala salu kia ntangwa ke ntangwa? Paulu walukisa vo: ‘Nutoma tala nkangala nukangala, ke nze minkondwa-ngangu ko, nze akwa ngangu kaka; nwiyisumbilang’e ntangwa, e kuma kadi e lumbu ibì.’ I bosi wakudikila vo: ‘Muna diadi ke nukadi minkondwa-zayi ko, nuzay’ak’owu win’o luzolo lua Yave.’—Efeso 5:15-17.
Kala Nkwa Kwikizi
20, 21. O Yesu nkia mpila kasongela kwikizi? Aweyi tulenda tanginina kwikizi kiandi?
20 Muna kangalela nze una Yesu kakangalela, tufwete tanginina kwikizi kiandi. Muna kuma kia kwikizi kia Yesu, owu tutanganga muna Nkand’a Nzambi: ‘Ova kakala muna mpw’a Nzambi, kabadikila wo uma wa kafinina ko, owu wa kala nze Nzambi, wayisisa nkatu, kabaka mpw’a ntaudi, wakituka se fwaniswa kia muntu, wau kawanuka muna mpil’a muntu, kakusakidika, kalemvoka yamuna fwa, musungul’e mfwa vana nti.’ Yesu wayikama e kimfumu kia Yave ye kwikizi kiawonso muna sakalelanga luzolo lwa Nzambi. Walemvoka yamuna lufwa vana nti ampasi. Tufwete ‘kala yo nyindu wau’ yo sakalela o vanga luzolo lwa Nzambi ye kwikizi kiawonso. —Filipi 2:5-8.
21 Yesu wasonga mpe kwikizi kwa ntumwa zandi za kwikizi. Kana una vo basumukanga, Yesu wabazola “yakuna nsuka.” (Yoane 13:1) Oyeto mpe ke tufwete yambula ko vo usumuki wa mpangi zeto watufila mu fu kiambi kia kumbanga akaka.
Tulanda Mbandu Yasisa Yesu
22, 23. O landa e mbandu yasisa Yesu nkia nluta ditwasanga?
22 Wau vo tu asumuki, katulendi landa e ntambi za Yesu una ufwene ko. Kansi tulenda sia ngolo za landa ntambi zandi. Ediadi divavanga vo twabakula una Kristu kefidilanga e nkutakani yo landa e mbandu kasisa.
23 O tanginina Kristu nluta miayingi kutwasanga. E zingu kieto kikitukanga kiamfunu ye kiese kadi tusianga luzolo lwa Nzambi va fulu kiantete, ke mu lweto ko. (Yoane 5:30; 6:38) Tukalanga ye ntona zambote yo kala se mbandu kw’akaka. Yesu obokelanga awonso befuntukanga, bena yo mazitu beza kwa yandi yo solola vundu kia mioyo miau. (Matai 11:28-30) Avo tutanginini e mbandu a Yesu, yeto mpe tulenda kasakesa akaka vava tukalanga yau entwadi. Muna kuma kiaki, yambula twakwamanana kangala nze una Yesu kakangalela.
Nga Osungamenanga?
• O Kristu aweyi kefidilanga alandi andi o unu?
• Akuluntu aweyi balenda tanginina Kristu muna mpila besadilanga wisa bavewa kwa Nzambi?
• Aweyi tulenda tanginina e mbandu a Yesu mu kuma kia mpilakanu z’akaka?
• Aleke aweyi balenda sila Kintinu va fulu kiantete?
[Mvovo mia Fwaniswa mina muna lukaya lwa 15]
Akuluntu Akristu bekutusadisanga mu lemvokela Kristu
[Mvovo mia Fwaniswa mina muna lukaya lwa 16]
Aleke, adieyi nuvanga muna kala ye zingu kiakiese kia Kikristu?