Zayi Ukutukitulanga se Akundi a Nzambi
O Mvangi eto ke ngolo zankatu ko. Ovuidi fu yamfunu. Ozolele vo twalongokanga oma ma kiwuntu kiandi kimana twakala se akundi andi. (Yoane 17:3; Yakobo 4:8) Kiaki i kuma kesenzekelanga e kiwuntu kiandi.
O Mvangi Eto Una ye Nkumbu
“Yambula o wantu bazaya wo vo, ngeye una ye nkumbu Yave, Nge kaka i Mpungu-nene omu nza yawonso.”—NKUNGA 83:18.
E Bibila kilonganga vo Yave i Nzambi aludi. Yandi i Mvangi a nsema ye mioyo miawoso. Yandi kaka tufwete sambilanga.—Lusengomono 4:11.
Yave i Nzambi Anzodi
“Nzambi i zola.”—1 YOANE 4:8.
Yave osadilanga Bibila ye lekwa ina kasema muna sengomona e fu yandi. O zola i fu kiandi kisundidi o mfunu. Mawonso kevanganga mu zola kevangilanga mo. Avo tutomene longoka oma ma Yave, tutoma kunzola.
Yave i Nzambi a Nloloki
“Ngeye u Nzambi wakubama mu loloka.”—NEKEMIYA 9:17.
Yave ozeye wo vo tu asumuki. Muna kuma kiaki, ‘wakubama muna kutuloloka.’ Avo tunlombele ndoloki yo vanga e ngolo mu yambula vanga mambu mambi, okutuloloka. Ke singa kututumba ko mu kuma kia masumu mana mavioka.—Nkunga 103:12, 13.
Yave Owanga e Sambu Yeto
“Yave ofinamene awonso bekumbokelanga, . . . Owánga kazu kiau yo kubavuluza.”—NKUNGA 145:18, 19.
Yave kevavanga ko vo twasadilanga sinsu ngatu teke muna kunsambila. Owanga e sambu yeto wauna se dianzodi kewilanga ndomba za wan’andi anzolwa.