LONGI DIA 24
Aki Nani i Mbasi ye Nkia Salu Besalanga?
Yave ozolele vo twazaya e kanda diadi dina kuna zulu. E kanda diadi i mbasi ana beyikilwanga vo ‘wan’a Nzambi.’ (Yobi 38:7) Adieyi Bibila kivovanga mu kuma kia mbasi? Nkia mambu bevanganga? Nga mbasi zawonso bena muna kanda dia Nzambi?
1. Aki nani i mbasi?
Yave wavanga ambasi vitila kavanga o ntoto. Nze Yave, mbasi ke bemonekanga ko, kuna zulu bezingilanga. (Ayibere 1:14) Vena ye ulolo wa mbasi, konso mbasi una ye kiwuntu kiandi. (Lusengomono 5:11) ‘Belungisanga diambu dia Yave yo lemvokela nding’andi.’ (Nkunga 103:20) Kuna nz’ankulu, ezak’e ntangwa Yave wasadilanga mbasi muna zayisa nsangu zandi, sadisa nkangu andi yo vuluza selo yandi. O unu, mbasi besadisanga Akristu mu solola awana bena ye luzolo lwa longoka Diambu dia Nzambi.
2. Nani i Satana ye aki nani i nkuya?
Mbasi zankaka ke basikila ye kwikizi ko kwa Yave. Mbasi antete wakolamena Nzambi oyikilwanga vo “Nkadi ampemba ye Satana, ona ovukumunanga nza yawonso.” (Lusengomono 12:9) Satana wakala yo luzolo lwa yala akaka, muna kuma kiaki wavukumuna Adami yo Eva, i bosi, mbasi zankaka banyikama. Mbasi zazi zakolamena Nzambi ziyikilwanga vo nkuya. Yave wabayinga kuna zulu, owau bena ova ntoto. Kansi, ke kolo ko befwaswa.—Tanga Lusengomono 12:9, 12.
3. Aweyi Satana ye nkuya bevavilanga kutuvukumuna?
Satana ye nkuya miandi besadilanga mpandu mu vukumuna wantu ayingi. Muna bonga e nona, wantu ankaka bekwendanga kwa afimpi a ntetembwa, nganga za ngombo, abikudi ye nganga za nkisi. Akaka bevavanga mpila mawuku mesadilanga mpandu. Satana ovukumunanga mpe wantu kimana bakwikila vo balenda mokena ye wantu bafwa. Kansi, Yave okutulukisanga vo: “Ke nuendi kwa nganga za matombola ko, ke nuendi kwa nganga za ngombo ko.” (Levitiku 19:31) Watuvana lulukisu lwalu muna kututanina muna ntambu mia Satana ye nkuya. Oyau mbeni za Yave ye bevavanga kutuvanga e mbi.
ZAYA DIAKA MANKAKA
Zaya e mambu mambote mbasi bevanganga ye vonza kiasadila e mpandu. Zaya mpe una tulenda kukitanina mu lembi bwa muna ntambu wa Satana ye nkuya.
4. Mbasi besadisanga wantu mu longoka mambu ma Yave
Ambasi ke besilanga umbangi kwa wantu ko. Kansi, befilanga asambidi a Yave kwa wantu ana bazolele longoka Diambu dia Nzambi. Tanga Lusengomono 14:6, 7, i bosi, vana e mvutu za yuvu eyi:
Ekuma tuvuididi o mfunu wa lusadisu lwa ambasi muna salu kia umbangi?
Nga ke diambote ko mu zaya vo mbasi balenda kusadisa mu solola wantu ana bazolele longoka e Bibila? Ekuma?
5. Venga e mpandu
Satana ye nkuya miandi mbeni za Yave ye mbeni zeto mpe. Tanga Luka 9:38-42, i bosi, vana e mvutu za kiuvu eki:
Adieyi nkuya bevanganga kwa wantu?
Ke tuzolele vukumunua kwa nkuya ko. Tanga Nsiku 18:10-12, i bosi, vana e mvutu za yuvu eyi:
Mu nkia mpila nkuya bevavilanga kutuvukumuna yo mokena yeto? Nkia mavangu ma mpandu wantu besadilanga omu zunga kiaku?
Nga Yave ndungidi kena yau mu kutusima mavangu ma mpandu? Ekuma?
Tala e VIDEO, i bosi, vana e mvutu za yuvu ilende.
Nze una omwene muna video, Palesa wasia nsing’a lutaninu muna koko kwa mwan’andi, nga ediadi diavonza? Ekuma?
Nkia diambu o Palesa kafwana vanga muna kuyitanina muna mianda mia nkuya?
Tuka kolo Akristu akieleka besianga e nkuya e kitantu. Tanga Mavangu 19:19 ye 1 Korinto 10:21, i bosi, vana e mvutu za kiuvu eki:
Ekuma dinina o mfunu mu fwasa konso lekwa una kiau kina e ngwizani ye mpandu?
6. Sunda Satana ye nkuya miandi
Satana oyalanga e nkuya. Kansi, mbasi zakwikizi beyalwanga kwa Mikaele wa mbasi ambuta, i sia vo, kwa Yesu. Nkia mpila nkuma Mikaele kena wau? Tanga Lusengomono 12:7-9, i bosi, vana e mvutu za yuvu eyi:
Nani osundidi o nkuma, Mikaele ye mbasi zandi yovo Satana ye nkuya miandi?
Nga obenze vo alandi a Yesu bafwete mwena Satana ye nkuya miandi o wonga?
Olenda sunda Satana ye nkuya miandi. Tanga Yakobo 4:7, i bosi, vana e mvutu za kiuvu eki:
Aweyi olenda kukitanina muna ntambu mia Satana ye nkuya miandi?
AVO MUNTU UVOVESE VO: “Ke diambi kwandi ko mu bula e videogame yovo tala filme zisonganga mavangu ma mpandu. Nsaka kwandi!”
Ekuma ngindu zazi zinina za vonza?
MAMBU MASINA MA LONGI DIADI
E mbasi zakwikizi bekutusadisanga. Satana ye nkuya miandi mbeni za Yave, besadilanga mpandu muna vukumuna wantu.
Nkia Mambu Olongokele?
Aweyi mbasi za Yave besadisilanga wantu mu longoka mambu ma Yave?
Nani i Satana ye aki nani i nkuya?
Ekuma ozolele vengela mavangu ma mpandu?
TALA MPE OMA MALENDE
Tala e ziku kisonganga vo Yesu i Mikaele wa mbasi ambuta.
Tala ziku kisonganga vo Nkadi ampemba muntu kieleka, ke mbi ko ina muna ntim’a muntu.
Tala una nkento mosi kayivevolwela muna wisa kia nkuya.
“Ela Descobriu que a Vida tem Objetivo” (Eyingidilu dia 1 dia Yuli, 1993)
Zaya una Satana kesadilanga e mpandu mu vukumuna o wantu.
“Ludi mu Kuma kia Mpandu, Loka Nkisi ye Kindoki” (E Nzila Moyo, kunku kia 5)