“Nuyingila” Kadi E Ntangw’a Mfundisa Ifwene

“Nuyingila: kadi ke nuzeye kio ko, e lumbu kikwiz’o Mfumu eno.”​—⁠MATAI 24:⁠42.

1, 2. O Yesu ye nani katezanisa e ngiz’andi?

AWEYI wadi vanga kele vo ozeye vo mwivi mu yiya kena muna nzo ya mfinangani aku? Wasikama okala mu yingila o wana ye mavwa maku. Kansi, o mwivi, kezayisanga ko e lumbu kekwiza. Ku kinsalukisa kekwizilanga.

² Yesu nkumbu miayingi kayika evangu dia mwivi muna nona yandi. (Luka 10:30; Yoane 10:​10) Vava kasonga mambu mebwa mu lumbu yambaninu, Yesu walukisa vo: “Nuyingila: kadi ke nuzeye kio ko, e lumbu kikwiz’o Mfumu eno. Ediadi nuzeye dio, o vwanzo, kala vo wiyizayil’e ngingila ikwiza mwivi, nga yingila kayingila, ke mu yambula nzo andi yatimwa ko.” (Matai 24:​42, 43) Ozevo, Yesu watezanisa e ngiz’andi ye mwivi, ku kinsalukisa kekwizila.

3, 4. (a) Adieyi divavwanga muna lemvokela lulukisu lwa ngiz’a Yesu? (b) Nkia yuvu yiyuvulwanga?

³ E nona kiaki kiafwana kikilu, kadi e lumbu kia ngiz’a Yesu ke kizayakene ko. Yesu wavova mpe: “Owu wa lumbu kiakina ye ola, ke vena on’ozeye wo ko, kana mbasi ezulu, yovo Mwana, nangu Se kaka.” (Matai 24:​36) E kiaki i kuma Yesu kavovesela awana kalonganga vo: “Oyeno mpe, se nukubama.” (Matai 24:​44) Awana belemvokelanga lulukisu lwa Yesu bakubama bekala, yo kala nkal’ambote konso ntangwa ketwasa lufundisu lwa Yave.

⁴ E yuvu yamfunu yiyuvulwanga i yayi: Nga Yesu kwa wantu a nza kaka kavana lulukisu lwalu? Nga Akristu akieleka mpe bafwete “yingila”? Ekuma dinina diamfunu twakwamanan’o “yingila” ye adieyi divavwanga?

Lulukisu​—⁠kwa Nani?

5. Aweyi tuzayidi vo o lulukisu lwa ‘yingila’ kwa Akristu akieleka luvewanga?

⁵ Dialudi vo, o Mfumu okwiza nze mwivi kwa esi nza, ana ke belemvokelanga lulukisu lwa lufwasu ko. (2 Petelo 3:​3-7) Adieyi tuvova mu kuma kia Akristu akieleka? Paulu wa ntumwa wasonekena minkwikizi y’akw’andi vo: “Oyeno kibeni nutomene wo zay’e ziku, ovo e lumbu kia Mfumu, nze mwivi o fuku, i ngiza kikwiza.” (1 Tesalonika 5:⁠2) Ka tuna ye lukatikisu ko vo e “lumbu kia Yave” mu kwiza kina. Nga diadi difwete kulula mfunu wa yingila? Tala dina kavova Yesu kw’alongoki andi: “Muna ntangwa ilembi yindulwa ikwiz’o Mwan’a muntu.” (Matai 24:​44) Vava kavovesa alongoki andi ‘batombel’ekulu e kintinu’ o Yesu wabalukisa vo: “Nukubama kweno: e kuma kadi, muna ntangwa ilembi yindulwa ikwiz’o Mwan’a muntu.” (Luka 12:​31, 40) Ediadi disonganga vo Yesu alongoki andi kalukisa vo ‘bayingila.’

6. Ekuma tufwete ‘yingilanga’?

⁶ Ekuma tufwete ‘yingila’ yo ‘kubama’? Yesu wavova vo: “Akala wole kuna mpatu; omosi obongwa, omosi osala: akento wole bebandana vana su; omosi obongwa, owaka osala.” (Matai 24:​40, 41) Ana bekala ‘bakubama,’ ‘bebongwa,’ yovo bevuluka, vava wantu a nza balembi vuminanga Nzambi befwaswa. Akaka ‘besala’ yovo befwaswa kadi ke belemvokelanga lulukisu ko wau besianga mambu ma yau kibeni va fulu kiantete muna zingu kiau. Kumosi mpe y’awana bazeye e ludi kansi ke beyingilanga ko.

7. O lembi zaya e lumbu kia mbaninu nki’elau dikutuvananga?

⁷ O lembi zaya e lumbu kia mbaninu a nza yayi dikutuvananga elau dia songa vo tusadilanga Nzambi y’ekani diambote. Mu nkia mpila? Nanga dilenda moneka vo e mbaninu mu zingila ina. Diankenda kikilu vo Akristu ana beyindulanga mpila yayi beyambulanga vo etima diau muna salu kia Yave diavola. Kansi vava twakiyekola, twatambika e zingu kieto kwa Yave mu kunsadila. Ana bazeye Yave bena ye ziku vo oyandi ke vunwa ko kw’awana besonganga etima dia kivunina muna lumbu yayi yambaninu. Ozeye makani ma ntima mia wantu.​—⁠1 Samuele 16:⁠7.

8. O zola kwa Yave aweyi kukutufidilanga mu yingila?

⁸ Wau vo tuzolanga Yave, tuyangalelang’o vanga luzolo lwandi. (Nkunga 40:8; Matai 26:​39) Tuzolele kunsadila yakwele mvu. Ediadi diamfunu kikilu kana una vo tufwete vingila kwayingi ke mu una twayindulanga ko. Vana ntandu, tukwamanana yingila kadi tuzeye mana kevanga o Yave muna lungisa makani mandi. O luzolo lwa yangidika Nzambi yo lemvokela Nsiku miandi lukutufila mu sia mambu ma Kintinu va fulu kiantete muna zingu kieto. (Matai 6:33; 1 Yoane 5:⁠3) Yambula twabadika una o yingila kufwete fidila nzengo tubakanga ye mawonso tuvanganga muna zingu kia lumbu ke lumbu.

Zingu Kiaku Akweyi Kikwendanga?

9. Ekuma dinina diamfunu vo wantu bazaya e sinsu ya ntangwa tuzingilanga?

⁹ Wantu ayingi bemonanga e mpasi za mambu ma nsoki mevangamanga lumbu yawonso, yo lembi yangalela e mfoko a zingu kiau. Kansi, nga bazeye kieleka e nsasa za mambu mebwanga ova nza? Nga bazeye wo vo mu ‘lumbu yambaninu a nza’ yayi tuzingilanga? (Matai 24:⁠3) Nga bazeye wo vo e fu ki’eloko, nsoki yo lembi vumina Nzambi i sinsu ya “lumbu yambaninu”? (2 Timoteo 3:​1-5) Bafwete bakula e nsas’a mambu mama mawonso, ye kuna kukwendanga e zingu kiau.

10. Adieyi tufwete vanga mu yingila?

¹⁰ Adieyi tuvova mu kuma kieto? Lumbu yawonso tunwananga ye mambu tufwete bakila nzengo, nze ma salu, vimpi wa nitu, mambu ma esi nzo ye ma nsambil’eto. Tuzeye dina kevovanga Nkand’a Nzambi ye tusianga ngolo za sadila mo. Mu kuma kiaki, tufwete kiyuvula: ‘Nga iyambulanga vo o tokanena mambu ma zingu kwafwasa kimwanda kiame? Nga iyambulanga vo e ngindu z’akwa ngangu za nza zansonga dina mfwete vanga?’ (Luka 21:​34-36; Kolosai 2:⁠8) Tufwete songa vo Yave tubundanga e vuvu yo ntim’eto wawonso ke mu umbakuzi weto ko. (Ngana 3:⁠5) Muna mpila yayi tulenda “simb’o moyo wina vo moyo kikilu,” moyo a mvu ya mvu muna nz’ampa ya Nzambi.​—⁠1 Timoteo 6:​12, 19.

11-13. Adieyi tulenda longoka muna nona kia mana mabwa (a) muna lumbu ya Noa? (b) muna lumbu ya Loti?

¹¹ O Nkand’a Nzambi uvwidi mbandu zayingi za lulukisu zilenda kutusadisa mu yingila. Yindula dina diabwa muna lumbu ya Noa. O Nzambi una katwese kizalu ko, watuma vo lulukisu lwavewa. Kansi, wantu ke bavanga diambu ko, Noa kaka y’esi nzo andi balemvokela lulukisu. (2 Petelo 2:⁠5) Muna kuma kiaki, Yesu wavova vo: “Nze i una wa lumbu ya Noa, i una ukal’e ngiz’a Mwan’a muntu. Okala vo kadi, wauna muna lumbu yayina, ina ivitidi e kizalu, badianga yo nuanga, basompanga yo sompesanga, yamuna lumbu kiakota Noa muna nzaza, ke bazaya wo ko, yavana kiayiz’e kizalu, kiabakùkulwisa yau awonso; i una ukal’e ngiz’a Mwan’a muntu.” (Matai 24:​37-​39) Adieyi tulongokele muna diadi? Kele vo mosi mu yeto ofwasanga ntangwa yayingi mu mambu ma nza, oma malenda yiya ntangwa ya sala e salu kia Nzambi, kana nkutu ke mambi kwandi ko, kafwete kuyifimpa muna diambu diadi.​—⁠Roma 14:⁠17.

¹² Sungamena mpe dina diabwa muna lumbu ya Loti. E mbanza Sodomo, ina kazingilanga o Loti y’esi nzo andi mbanza kimvwama yakala, kansi yazala mpe ye zumba. O Yave watuma mbasi zandi mu fwasa mbanza yayina. Entete, bavovesa Loti y’esi nzo andi bavaika muna Sodomo yo lembi tala kunima. Muna lukasakeso lwa mbasi, bavaika muna mbanza. Kansi, nkaz’a Loti nanga kimvwama kayindulanga kina basisa muna Sodomo. Wakolamena lulukisu, watala kunima. Wavidisa moyo andi. (Etuku 19:​15-​26) Yesu watulukisa vo: “Nuyindula nkaz’a Loti.” Nga tulemvokelanga lulukisu lwalu?​—⁠Luka 17:⁠32.

¹³ Ana balemvokela lulukisu lwa Nzambi bavuluka. Nze Noa y’esi nzo andi yo Loti ye wan’andi amakento. (2 Petelo 2:⁠9) Ekolo tuyindulanga lulukisu lwalu, tulukiswanga mpe muna nsangu za luvevoko lw’awana bezolanga unsongi. Zisiamisanga e vuvu kieto muna ndungan’a nsilu a Nzambi ‘w’ezulu diampa ye nz’ampa,’ muna mukala e “ndungidi.”​—⁠2 Petelo 3:⁠13.

“Ntangw’a Mfundisa Ifwene”

14, 15. (a) Nki i “ntangw’a” mfundisa? (b) Adieyi divavwanga muna “vumina Nzambi, yo kumvan’o nkembo”?

¹⁴ Adieyi tulenda vingila ekolo tuyingilanga? O nkand’a Lusengomono usonganga ndandani za mambu mesonga e ndungana ya nsilu mia Nzambi. O lemvokela mana uvovanga dikutusadisa mu kwamanana yingila. Uyikanga mambu mebwa muna “lumbu kia Mfumu,” eki kiayantika tuka Kristu kayadikwa kun’ezulu muna mvu a 1914. (Lusengomono 1:​10) Muna Lusengomono 14:​6, 7, tulukiswanga kwa mbasi ona wina ye “nsangu zambote za mvu ya mvu, mu samunwina,” wantu. “Ovovele muna nding’angolo vo, nuvumina Nzambi, yo kumvan’o nkembo; kadi e ntangw’a mfundis’andi ilueke.” E “ntangw’a” mfundisa, kolo kiandwelo kaka; i ntangwa isamunwa yo lunganesa e mfundisa za Nzambi ziyikwanga muna ungunza wau. Mu kolo kiokio tuzingilanga o wau.

¹⁵ Una ke yafokokele ko e ntangw’a mfundisa, tulukiswanga vo: “Nuvumina Nzambi, yo kumvan’o nkembo.” Aweyi disongele ediadi? O vumina Nzambi dikutusadisa twamenga o bi. (Ngana 8:​13) Avo tuvumina Nzambi, tukunwila yo kunzitisa. Katukondwa ntangwa ko ya tanganga Nkand’a Nzambi. Katuveza ko elongi dia lungananga muna tukutakanu tw’Akristu. (Ayibere 10:​24, 25) Tuyangalela elau twavewa dia samuna nsangu zambote za Kintinu kia Masia. Tubunda Yave e vuvu e ntangwa zawonso ye nsi a ntim’eto wawonso. (Nkunga 62:⁠8) Avo tuzeye vo Yave i Mfumu a Nz’amvimba, tulemvokela Kimfumu kiandi muna zingu kieto. Nga ovuminanga Nzambi yo kumvana o nkembo muna mambu mama mawonso?

16. Ekuma tulenda vovela vo e mfundis’a Babele Anene iyikwanga muna Lusengomono 14:8 mu lungana ina?

¹⁶ E kapu kia 14 kia Lusengomono mambu mayingi mpe kiyikanga mebwa muna ntangw’a mfundisa. Babele Anene, ina vo i kintwadi kia nsambila zawonso za luvunu ova nza, i diantete diyikwanga. “E mbasi ina yezole ilende, oku vo, ibwidi, ibwidi, e Babele anene.” (Lusengomono 14:⁠8) Elo, vana meso ma Nzambi e Babele Anene yabwa kala. Muna mvu a 1919, selo ya Yave yakuswa bavevolwa muna ubundu wa malongi ye mavangu ma Babele mana meyalanga wantu ye zula se tuka kolo. (Lusengomono 17:​1, 15) Bayivana mu nungununa nsambila aludi. Tuka kolo kiakina, e nsangu zambote za Kintinu kia Nzambi zisamunwanga muna nza yawonso.​—⁠Matai 24:⁠14.

17. Adieyi divavwanga muna vaika mu Babele Anene?

¹⁷ Vena mpe ye mambu makaka ma mfundis’a Nzambi mu kuma kia Babele Anene. O lufwasu lwandi emvimba lufinamene. (Lusengomono 18:​21) Muna kuma kiaki, Nkand’a Nzambi uvovesanga wantu muna fulu yawonso vo: “Numvaika, [muna Babele Anene] . . . ke nwakala yandi e ntwadi muna masumu mandi.” (Lusengomono 18:​4, 5) Aweyi tulenda vaikila muna Babele Anene? Mayingi mevavwanga ke yambula kaka nsambila ya luvunu ko. Wisa kia Babele kimonekanga muna fu ya kisi nsi ye muna nkinzi mia nkangu, mavangu ma zumba ye nsaka zisadilanga e mpandu ye makaka mpe. Muna yingila, diamfunu twasonga muna mavangu ye mvovo mieto vo twavambana kikilu ye Babele Anene muna mambu mawonso.

18. Nze una uyikwanga muna Lusengomono 14:​9, 10, nki bafwete venga Akristu ana beyingilanga?

¹⁸ Muna Lusengomono 14:​9, 10 tutanganga diambu diakaka mu kuma kia ‘ntangw’a mfundisa.’ Mbasi yakaka ivovele vo: “O muntu, ovo okundidi e bulu ye teke kiandi, yo tambula dimbu kiandi vana luse luandi, yovo vana koko, kanua vinyo a makasi ma Nzambi.” Ekuma? “E bulu ye teke kiandi” i tuyalu twa wantu tulembi zayanga e kimfumu kia Yave. Akristu beyingilanga ke beyambulanga ko vo bavukumunwa yovo tambula e dimbu muna mavangu ye fu yau ngatu kala muna ubundu nze awana balembi zayanga kimfumu kia Yave wa Nzambi aludi. Akristu bazeye wo vo e Kintinu kia Nzambi kiayala kala kun’ezulu, kisukisa tuyalu twawonso twa wantu, yo sikila yakwele mvu.​—⁠Daniele 2:⁠44.

Kuyambula Yingila Ko

19, 20. (a) Ekolo lumbu yambaninu ifinamanga kumfoko, adieyi tulenda vingila o vangwa kwa Satana? (b) Adieyi tukwamanana vanga?

¹⁹ Ekolo lumbu yambaninu ifinamanga kumfoko, e mpasi ye ntonta wokela kaka ziwokela. Ekolo tuna mu nza yayi yambi, kumosi ye usumuki weto, mayingi mekutubwilanga nze mayela, kinunu, lufwa lwa nzolw’eto, lukendalalu lwa ntima, kendalala vava wantu balembi tambulwilanga e nsangu zambote tusamunanga ye makaka mpe. Katuvilakana ko vo o Satana ovavanga sadila e mpasi zeto mu kutufila twayambula samuna nsangu zambote yo zindalala muna nsiku mia Nzambi. (Efeso 6:​11-​13) Eyayi ke ntangw’a yambula yingila ko.

²⁰ Yesu wazaya wo vo vekala ye ntonta zayingi zilenda kutufila mu bembola e ludi, ikuma kalukisila vo: “Nuyingila: kadi ke nuzeye kio ko, e lumbu kikwiz’o Mfumu eno.” (Matai 24:​42) Yambula twayingilanga ntangwa zawonso. Yambula twayingila mu kuma kia ntambu mia Satana mina milenda kutubwisa. Tuzindalala samuna nsangu zambote za Kintinu kia Nzambi y’etima diawonso. Tukwamanana yingila muna mambu mawonso ekolo tulemvokelanga lulukisu lwa Yesu vo: “Nuyingila.” Muna vanga wau, tusambulwa kwa Yave yo tambula moyo a mvu ya mvu.

Nkia Mvutu Ovana?

• Aweyi tuzayidi wo vo o lulukisu lwa Yesu lua “yingila” kwa Akristu akieleka lwavewa?

• Nkia mbandu za lulukisu zina muna Nkand’a Nzambi zilenda kutusadisa mu “yingila”?

• Ntangw’a mfundisa i nki? Adieyi tulukiswanga mu vanga una ke yifokokele ko?

[Mvovo mia Fwaniswa mina muna lukaya lwa 23]

E mambu mena mu longi diadi mabongelo muna finkanda Mantenha-se Vigilante! fia vaikiswa muna lukutakanu lwa mvivu lwa 2004/05.

[Mvovo mia Fwaniswa mina muna lukaya lwa 26]

Lufwasu lwa Babele Anene lufinamene