O Wutuluka nga i Nzil’a Luvuluku?

NKIA mvutu olenda vana mu kiuvu kiaki: “Nga wawutuluka kala?” Ndonga muna Kikristu kia Kimpangila mu nza yawonso bevutulanga vo, “elo!” Bekwikilanga vo awana kaka bewutulukanga i Akristu akieleka, ye luwutuluku i nzil’a luvuluku. E ngindu zau ngwizani zina ye z’afidi a mabundu nze Robert C. Sproul wa mfimpi a mambu ma Nzambi ona wasoneka vo: “Avo muntu kawutulukidi ko, . . . ke Nkristu ko.”

Nga u mosi mun’awana bekwikilanga vo o wutuluka i nzil’a luvuluzu? Avo i wau, nanga ozola sadisa yitu ye akundi aku kimana basolola e nzila yayi yo kangalela mo. Kansi, muna vanga wo bafwete zaya nswaswani ya muntu wawutuluka y’ona walembi wutuluka. Aweyi olenda kubasongela e nsasa ya wutuluka?

Ndonga bekwikilanga vo o mvovo “wutuluka” uyikanga muntu osianga nsilu wa sadila Nzambi yo Kristu. Tuka kiakina ovangulukanga, vana fulu kia kala wafwa muna mwanda, okitukana se wamoyo. Dicionário dia Merriam-Webster’s Collegiate Dictionary​—⁠Eleventh Edition disasilanga vo: O wutuluka “i ntangwa in’o muntu kekitukanga se Nkristu, ovangulukidi yovo osidi umbangi wa lukwikilu lwandi musungula vava kewokesanga salu kiandi muna dibundu.”

Ng’olenda sivika mu zaya vo Nkand’a Nzambi ke diau ko kelonganga? Ng’ozolele zaya dina kieleka kelonganga o Nkand’a Nzambi mu kuma kia wutuluka? Olenda baka nluta muna toma badika e diambu diadi. Ekuma? E kuma kadi o zaya e nsasa ya wutuluka dilenda soba e mpila osadilanga e zingu kiaku ye vuvu kiaku kia kusentu.

O Nkand’a Nzambi Adieyi Kelonganga?

O mvovo wau “wutuluka,” wasonama muna Yoane 3:​1-12, usonganga e moko kia Yesu ye mfumu a dibundu muna Yerusaleme. Lusansu lwalu lwa Nkand’a Nzambi lwasonama muna kunku kina muna lukaya lulende. Tulombele watanga kio ye sungididi kiawonso.

Muna moko kiaki, Yesu wayika mambu mayingi mu kuma kia “wutuluka.”a Kieleka, e moko kia Yesu kilenda kutusadisa mu vana mvutu za yuvu tanu yamfunu eyi ilende:

◼ O wutuluka nkia mfunu kwina?

◼ O wutuluka nga i nzengo kalenda baka o muntu yandi kibeni?

◼ O wutuluka adieyi i kani diandi?

◼ O wutuluka nkia mpila kuvangamenanga?

◼ O wutuluka nki’ekani kulungisanga?

Yambula twafimpa e yuvu yayi kimosi kimosi.

[Mvovo Vana Yand’a lukaya]

[Babu/​ Foto ina muna lukaya lwa 4]

“Nuwutuluk’aka”

‘Vakala Mfarisi, nkumbu andi Nikodemo, wa nkuluntu a Ayuda: Andioyu kakwiza kwa Yesu o fuku, umvovese vo: E Nlongi, tuzeye wo vo nge i nlongi watuka kwa Nzambi: Kadi ke ven’on’olend’o vanga sinsu in’ovanga ko, nanga o Nzambi kakala yandi. O Yesu umvutwidi vo: Kieleka, kieleka, isamunwini vo, o muntu, ovo kalembi wutuluka, kalendi mona kintinu kia Nzambi ko. O Nikodemo umvovese vo, o muntu on’onunuvini, nkia ngutuluka kelend’o wutuluka? Lenda kwandi o kota nkota ina yezole muna vumu kia ngw’andi, kawutuk’e? O Yesu ovutwidi vo, kieleka, kieleka, isamunwini vo, o muntu, ovo kalembi wutwa kwa maza yo mwanda, kalendi kota muna kintinu kia Nzambi ko. Eki kiwutwa kwa nitu, nitu; eki kiwutwa kwa mwanda, mwanda. Kusalukwa ko wau ivovese vo, nuwutuluk’aka. E mpemo ivekomoka konso oku iyizolèle, o mazu mandi owidi, kansi kuna itukidi, kuzeye ko ko, ngatu kuna ikwenda: i una konso ona wawutwa kwa mwanda. O Nikodemo umvutwidi vo, nkia nkala mekala mambu mama? O Yesu umvutwidi vo: Ngeye i nlongi a Isaele, kuzeye mama ko e? Kieleka, kieleka, isamunwini vo, una tuzeye i tuvova, una tumwene i tusila umbangi; o umbangi weto wau ke nutambudi. Ovo inuvovese oma mansi, yeno ke nukwikidi, nkia nkwikila nukwikila, ovo ikunuvoves’oma mezulu?’​—⁠Yoane 3:​1-12.

O Wutuluka Nkia Mfunu Kwina?

MUNA moko kiandi yo Nikodemo, Yesu watoma songa vo o wutuluka mfunu kikilu kwina. Aweyi kakiesesela diambu diadi?

Tala una Yesu kasongela o mfunu wawutuluka muna moko kiandi yo Nikodemo. Wavova vo: “O muntu, ovo kalembi wutuluka, kalendi mona kintinu kia Nzambi ko.” (Yoane 3:⁠3) E mvovo “ovo” ye “kalendi” misonganga o mfunu wa wutuluka. Muna bong’e nona: Kele vo muntu ovovele, “ovo ntangwa ka dungumukini ko, ka kulendi baya mwini ko,” edi kazolele vova vo ntangwa mfunu kikilu kena muna vaikisa mwini. Diau adimosi mpe, Yesu wasonga vo o muntu muna mona Kintinu kia Nzambi kafwete wutuluka.

Nanga muna katula lukatikisu mu kuma kia diambu diadi, Yesu wavova vo: “Nuwutuluk’aka.” (Yoane 3:⁠7) Dialudi, Yesu wasonga vo wutuluka i diambu divavwanga mu “kota muna kintinu kia Nzambi.”​—⁠Yoane 3:⁠5.

Wau vo Yesu wabadikila o wutuluka se diambu disundidi o mfunu, Akristu bafwete toma bakula diambu diadi. Kasikil’owu, ng’obenze vo Nkristu yandi kibeni olenda baka nzengo za wutuluka?

[Foto ina muna lukaya lwa 5]

“Ovo ntangwa ka dungumukini ko, ka kulendi baya mwini ko”

O Wutuluka nga i Nzengo Kalenda Baka o Muntu Yandi Kibeni?

NANI owutululanga o muntu? Vava bevovesanga nkangu au wakituka Akristu awutuluka, alongi a mabundu mvovo mia Yesu besadilanga: “Nuwutuluk’aka.” (Yoane 3:⁠7) Alongi awaya besadilanga e mvovo miami nze nsiku. Belonganga vo konso nkwikidi kafwete lemvokela Yesu yo vava wutuluka. Muna ngindu zau, o wutuluka i nzengo kalenda baka muntu yandi kibeni. Nga ngindu zazi ngwizani zina ye dina kavova Yesu kwa Nikodemo?

Avo otomene tanga e mvovo mia Yesu, obakula vo Yesu kalonga ko vo o wutuluka yovo lembi wutuluka i nzengo kalenda baka muntu yandi kibeni. Ekuma? E mvovo wa Kingerekia wasekolwa vo “wutuluka” ulenda sekolwa mpe vo “wutululwa kuna ntandu.”a Muna nsekola yayi, o wutululwa “kuna ntandu” disonganga vo wutululwa “kun’ezulu” yovo “kw’Ese.” (Yoane 19:11; Yakobo 1:​17) Kieleka, Nzambi owutululanga o muntu.​—⁠1 Yoane 3:⁠9.

Avo tusungamene e mvovo wau “kuna ntandu,” ka dikala mpasi ko mu bakula vo o muntu kalendi kiwutulula ko yandi kibeni. Yindula e ngutuk’aku. Nga mu luzolo lwa ngeye kibeni wawutukil’e? Ve kikilu! Mu luzolo lwa mase maku wawutukila. Diau adimosi, tulenda wutuluka avo Nzambi kaka w’Es’eto ezulu ozolele wo. (Yoane 1:​13) Muna kuma kiaki, Petelo wa ntumwa wavova vo: ‘Okembelwa o Nzambi w’Es’andi a Mfumu eto Yesu Kristu, ona wina vo, muna nkenda zandi zayingi, watuwutulwila muna vuvu kiamoyo, muna lufuluku lua Yesu Kristu, muna mafwa.’​—⁠1 Petelo 1:⁠3.

O Wutuluka nga Nsiku?

Akaka balenda yuvula, ‘wau vo o wutuluka ka luzolo lwa muntu yandi kibeni ko, ekuma Yesu kakanikina vo: “Nuwutuluk’aka”?’ E kiuvu kiaki mfunu kina. Avo Yesu nsiku kasia, tulenda vova vo diambu katuma dina katulendi vanga ko. Kalendi wo vanga ko. Ozevo, aweyi tufwete bakulwila e mvovo “nuwutuluk’aka”?

Avo tutomene fimpa e mvovo wau muna ndinga Kingerekia, tubakula vo ka nsiku ko. Kansi, ziku kia diambu. Muna mvovo miakaka, vava Yesu kavova vo “nuwutuluk’aka,” ziku kia diambu kasonga, kavana nsiku ko. Wavova vo: “Diamfunu nwawutululwa kuna ntandu.”​—⁠Yoane 3:​7, nsekola ya Modern Young’s Literal Translation.

Kasikil’owu, tala e nona kisonganga nswaswani a nsiku ye ziku kia diambu. Yindula mbanza ina ye sikola zayingi. E sikola imosi yavaulwa mu kuma kia wana bawutukila muna mbanza yayina. Lumbu kimosi, nleke anzenza walomba kwa mfumu a sikola vo: “Nzolele tangila mu sikol’aku.” Mfumu a sikola wamvovesa vo, “muna tangila mu sikola yayi, ofwete kala mungutukil’a mbanza yayi.” E mvovo mia mfumu a sikola ka nsiku ko. Kavovesa nleke ko vo “Kituka mungutukil’a mbanza yayi!” Kansi, edi kamvovesa vo, “muna tangila mu sikola yayi, kafwete kala mungutukil’a mbanza.” O mfumu a sikola ziku kia diambu kasongele yovo dina divavwanga muna tangila mu sikola yayi. Diau adimosi, vava Yesu kavova vo: “Nuwutuluk’aka,” ziku kia diambu kasonga, i sia vo dina divavwanga mu “kota muna kintinu kia Nzambi.”

Wau vo Kintinu kia Nzambi ngwizani kina ye diambu dia wutuluka, tala kiuvu kiamfunu divaikisanga: Nkia kuma kifwete wutulukilwa? Ozaya e mvutu za kiuvu kiaki i nsabi muna toma bakula e nsas’a wutuluka.

[Mvovo Vana Yand’a lukaya]

[Foto ina muna lukaya lwa 6]

Nkia diambu dia ngutuk’eto dina ngwizani ye wutuluka?

O Wutuluka Adieyi i Kani Diandi?

NDONGA bekwikilanga vo muntu muna vuluka kafwete wutuluka. Kansi, tala dina kavova Yesu mu kuma kia wutuluka: “O muntu, ovo kalembi wutuluka, kalendi mona kintinu kia Nzambi ko.” (Yoane 3:⁠3) Muna kuma kiaki, o muntu ofwete wutuluka mu kota muna Kintinu kia Nzambi, kansi ke mu vuluzwa ko. Akaka nanga balenda yindula vo, ‘okota muna Kintinu yo vuluzwa nsendo umosi kwandi.’ Ediadi ke dialudi ko. Muna zaya e nswaswani a kota muna kintinu yo vuluzwa, yambula twafimpa e nsas’a “kintinu kia Nzambi.”

E kintinu i luyalu. Muna kuma kiaki, o mvovo “kintinu kia Nzambi” usonganga vo “luyalu lwa Nzambi.” Nkand’a Nzambi ulonganga vo Yesu Kristu wa “mwan’a muntu,” i Ntinu muna Kintinu kia Nzambi. Kristu keyala yandi mosi ko, una ye wantu keyala yau. (Daniele 7:​1, 13, 14; Matai 26:​63, 64) Vana ntandu, e mona-meso kiasongwa kwa Yoane wa ntumwa kisonganga vo awana beyala yo Kristu basolwa “muna makanda mawonso, ye ndinga, ye nsi, ye zula,” beyala “se atinu ova nza.” (Lusengomono 5:​9, 10; 20:⁠6) Nkand’a Nzambi usonganga mpe vo, awana beyala se atinu “finkambi-kambi” “basumbuk’ova nza.” Lutangu lwau 144.000.​—⁠Luka 12:32; Lusengomono 14:​1, 3.

Kintinu kia Nzambi akweyi kiyadila? “E kintinu kia Nzambi” kiyikilwanga mpe vo “kintinu ki’ezulu,” ediadi disonganga vo Yesu ye akw’andi atinu beyala tuka kun’ezulu. (Luka 8:10; Matai 13:​11) Muna kuma kiaki, Kintinu kia Nzambi i luyalu lw’ezulu lwavewa kwa Yesu Kristu ye akw’andi atinu ana basolwa ova nza.

Ozevo, Yesu adieyi kazola vova vava kayika vo muntu kafwete wutuluka muna “kota muna kintinu kia Nzambi”? Edi kazola vova vo, muntu kafwete wutuluka muna kituka se ntinu yo yala kumosi yo Kristu kun’ezulu. Mu mvovo mia kiá, ekani dia wutuluka, i kubika fibuka fia wantu kimana bavwila Kintinu kun’ezulu.

Owau tumwene vo wutuluka mfunu kwina, Nzambi owutululanga wantu, yo kubakubika kimana bayala kun’ezulu. Kansi, wantu nkia mpila bewutulukilanga o unu?

[Babu ina muna lukaya lwa 7]

Ekani dia wutuluka i kubika fibuka fia wantu bavwila Kintinu kun’ezulu

[Foto ina muna lukaya lwa 7]

Kintinu kia Nzambi i luyalu lw’ezulu lwavewa kwa Yesu Kristu ye akw’andi atinu ana basolwa ova nza

O Wutuluka Nkia Mpila Kuvangamenanga?

MUNA moko kiandi ye Nikodemo, Yesu kasonga kaka ko ekani, y’etuku dia wutuluka, kansi wasonga mpe e mpila muntu kalenda wutulukila. Yesu wavova vo: “O muntu, ovo kalembi wutwa kwa maza yo mwanda, kalendi kota muna kintinu kia Nzambi ko.” (Yoane 3:⁠5) I kuma vo, muntu owutulukanga muna maza yo mwanda. Kansi, o mvovo “maza yo mwanda” nki miyikanga?

Nki i “Maza yo Mwanda”?

Wau vo nlongi kakala muna nsambil’a Yuda, ka lukatikisu ko Nikodemo wazaya wo vo “o mwand’a Nzambi” i ngolo za Nzambi zilenda fila muntu mu vanga masivi. (Etuku 41:38; Luvaiku 31:3; 1 Samuele 10:⁠6) I kuma vo, vava Yesu kasadila e mvovo “mwanda,” Nikodemo wabakula wo vo, mwand’avelela kayika, una vo i ngolo za Nzambi.

Adieyi tuvova mu kuma kia maza kayika Yesu? Yindula dina diateka vangama ye dina dialanda vava kamokena yo Nikodemo. Lusansu lusonganga vo Yoane wa Mvubi ye alongoki a Yesu mu maza bavubilang’o wantu. (Yoane 1:​19, 31; 3:22; 4:​1-3) Luvubu lwalu lwatoma zayakana muna Yerusaleme. I kuma vo, vava Yesu kayika maza, Nikodemo wabakula wo vo Yesu luvubu lwa maza kayika.a

Vubilwa “Muna Mwand’avelela”

Wau vo “wutwa kwa maza” i vubilwa muna maza, o ‘wutwa kwa mwanda’ nki disonganga? Una Nikodemo kamokene ko yo Yesu, o Yoane wa Mvubi wasamuna vo, kuna sentu, wantu ke bevubilwa kaka mu maza ko, kansi bevubilwa mpe muna mwanda. Wavova vo: “Omono inuvubìdi muna maza; vo i yandi [Yesu], okunuvubila muna mwand’avelela.” (Maku 1:​7, 8) Nsangu zambote za soneka Maku zisonganga e nkumbu antete lwavangama luvubu lwa mwanda. Wasoneka vo: “Muna lumbu yayina i kayiz’o Yesu tuka kuna Nazarete a Ngalili, ovubilu kwa Yoane muna Yodani. Vava katombokele aka muna maza, omwene ezulu dibakukini, yo mwanda, nz’eyembe, s’ekunkulumukina.” (Maku 1:​9, 10) Vava kadimunwa muna Yodani, Yesu wavubwa muna maza. Vava katambula mwand’avelela wakulumuka kun’ezulu, wavubwa muna mwand’avelela.

Vioka mvu ntatu tuka luvubu lwandi, Yesu wazayisa alongoki andi vo: “Ke lumbu yingi ko, nuvubilwa muna mwand’avelela.” (Mavangu 1:⁠5) Nkia ntangwa dia lungana?

Muna lumbu kia Pentikosti ya mvu wa 33 wa tandu kia Kristu, tezo kia 120 m’alongoki a Yesu bakutakana mu nzo mosi muna Yerusaleme. “Kuna kinsalukisa, valueke ezu dituka kun’ezulu, nga mpekomok’a tembwa kiangolo, dizele nzo yawonso, ina bavwende. Vezidi kubamoneka tubini tukuvambulanga, tuna nze tiya; . . . Yawonso bazele yo mwand’avelela.” (Mavangu 2:​1-4) Muna lumbu kiakina, o nkangu muna Yerusaleme wawondelelwa bavubwa muna maza. Petelo wa ntumwa wabavovesa vo: “Nuvilukw’e ntima, yo vubilwa konso muntu vana kena muna nkumbu a Yesu Kristu muna luyambulwilu lua masumu meno; nwatambul’o lukau lwa mwand’avelela.” Aweyi bavanga? “Ana batambwidi e diambu diandi bavubilu; e lumbu kina mwayikama tezo kia mazunda matatu ma wantu.”​—⁠Mavangu 2:​38, 41.

Vubwa Nkumbu Miole

O luvubu lwalu nkia ngwizani luna ye diambu dia wutuluka? Disonganga vo awana bewutulukanga bafwete vubwa nkumbu miole. Sungamena vo Yesu wavubwa ntete muna maza. I bosi katambula mwand’avelela. Diau adimosi mpe, alongoki antete bavubwa muna maza (akaka kwa Yoane wa Mvubi), i bosi batambula mwand’avelela. (Yoane 1:​26-​36) Diau adimosi mpe 3.000 m’alongoki ampa, ntete bavubwa muna maza, i bosi batambula mwand’avelela.

Wau tubakwidi luvubu lwavangama kina kia Pentikosti ya mvu a 33 wa tandu kia Kristu, o muntu nkia mpila kalenda wutulukila o unu e? Wauna wavubilwa antumwa za Yesu y’alongoki antete. Entete muntu kafwete vilukw’e ntima muna masumu mandi, yo yambula mavangu mambi, i bosi kafwete yekola zingu kiandi kwa Yave muna kunsambila yo kunsadila yo songa sinsu kia kiyekola kwandi muna luvubu lwa maza. Kuna kukwiziwa, kele vo Nzambi unsolele kakala se nyadi muna Kintinu kiandi, okunkusa muna mwand’avelela. (O luvubu lwantete lwa maza) mu luzolo lwa muntu yandi kibeni luvangamenanga; vo i (luvubu lwazole muna mwanda) mu luzolo lwa Nzambi luvangamenanga. Avo muntu o vubilu nkumbu miami miau miole, ozevo, o wutulukidi.

Muna moko kiandi yo Nikodemo, ekuma Yesu kasadila e mvovo “wutwa kwa maza yo mwanda”? Muna songa vo awana bevubwanga muna maza yo mwanda e zingu kiau kisobanga emvimba. Elongi dilanda dikiesesa diambu diadi dia wutuluka.

[Mvovo Vana Yand’a lukaya]

[Foto ina muna lukaya lwa 9]

Yoane wavuba Aneyisaele ana bavilukw’e ntima, muna maza

O Wutuluka Nki’ekani Kulungisa?

EKUMA Yesu kasadila e mvovo ‘wutwa kwa mwanda’ vava kayika luvubu lwa mwand’avelela? (Yoane 3:⁠5) Avo usadilu nze nona, e mvovo “wutwa” usonganga vo “lubantiku.” Kasikil’owu, lubantiku lwa zula lulenda yikilwa vo “luwutuku lwa zula.” Muna kuma kiaki, e mvovo “wutuluka” i “lubantiku lwampa.” I kuma vo, e nona kia “wutwa” ye “wutuluka” kisonganga vo vesinga kala ye ngwizani yampa kwa Nzambi y’awana bevubwa muna mwand’avelela. E ngwizani yayi aweyi ivangamenanga?

Vava ntumwa Paulu kavova una Nzambi kekubikilanga awana beyala kun’ezulu, wasadila e nona kia zingu ki’esi nzo. Wasoneka kwa Akristu muna lumbu yandi vo ‘bekituka nze wana,’ Nzambi okadila yau ‘nze wan’andi.’ (Ngalatia 4:5; Ayibere 12:⁠7) Muna zaya una nona kia wan’ansansi kilenda sadisila mu bakula diambu disobanga muna zingu ki’awana bevubwanga muna mwand’avelela, tufimpa diaka e nona kia kindende kianzenza kizolele tangila mu sikola yavaulwa mu kuma kia mingutukil’a mbanza.

Diambu Disobanga kwa Wan’ansansi

Muna nona kiaki, e kindende ke kiafwana tangila mu sikola yayina ko, kadi ka mungutukil’a mbanza ko. Yindula vo diambu disobele muna zingu kia kindende kiaki. Yakala dimosi dianzodi wa mungutukil’a mbanza yayina untambwidi yo kunsonekesa muna nkanda mia luyalu nze mwan’andi. Nkia diambu dilenda soba muna zingu kia kindende? Wau katambwilu nze mwana, okala ye nswa wavwa malau mawonso mevewa kwa wan’amingutukil’a mbanza, kumosi y’elau dia tangila muna sikola yayina. Ediadi disoba mvimba zingu kiandi.

E nona kiaki kitoma songanga edi disobanga muna zingu ki’awana bewutulukanga. Tala maka mambu mafwanana muna nona kiaki. Muna nona, e kindende, muna tondwa muna sikola ya mingutukila, kafwete lungisa edi divavwanga, i sia vo kakala nze mungutukil’a mbanza. Kansi, kalendi lungisa e nsiku wau mu luzolo lwa yandi kibeni ko. Diau adimosi, wantu akaka bevewa fulu muna Kintinu kia Nzambi yovo luyalu lw’ezulu, bafwete lungisa e nsiku a “wutuluka.” Kansi, kabalendi lungisa e nsiku wau mu luzolo lwa yau kibeni ko, kadi Nzambi o wutululanga wantu.

Nki kiasoba e zingu kia kindende? Ese ona wansonekesa muna nkanda mia luyalu nze mwan’andi. Kieleka, diambu diadi ke diasoba mpw’a kindende ko. Vava kalungisa mawonso mavavwanga muna nsiku, e kindende watambula kisi nsi kiampa. Kalukatikisu ko, tulenda vova vo wayantika zingu kiampa yovo wawutuluka. Wakituka se mungutukil’a mbanza, ediadi diamvana elau dia tangila muna sikola yo kala se mwana muna nzo a se diandi diansansi.

Diau adimosi, Yave osolanga buka kia wantu alembi lunga yo kubatambula nze wan’andi. Paulu wa ntumwa, mosi muna buka kia wantu awaya, wasoneka kw’akw’andi akwikidi vo: “Nwatambula kaka mwand’a kiwana, una tukazila vo, Aba, e Tata. O mwanda kibeni osianga umbangi kumosi yo mwand’eto, ovo tu wan’a Nzambi.” (Roma 8:​15, 16) Elo, wau vo okubatambulanga nze wana, Akristu awaya bekitukanga se esi nzo yovo esi kanda dia Nzambi yovo ‘wan’a Nzambi.’​—⁠1 Yoane 3:1; 2 Korinto 6:⁠18.

Kieleka, awana kesolanga Nzambi nze wan’andi, ke besobanga nkal’au ko, kadi bakinu ye usumuki. (1 Yoane 1:⁠8) Kansi, Paulu wasonga vo vava belungisanga mana mevavwanga yo tambulwa nze wana, bevwanga kisi nsi kiampa. Vana vau, mwand’a Nzambi ukubafilanga mukala ye ziku vo kumosi bezinga yo Kristu kun’ezulu. (1 Yoane 3:⁠2) E ziku kiaki kia mwand’avelela kikubafilanga mu zitisa o moyo. (2 Korinto 1:​21, 22) Kieleka, tulenda vova vo bewutulukanga yo yantika zingu kiampa.

Muna kuma kia wan’a Nzambi, Nkand’a Nzambi uvovanga vo: “Bekala kaka se nganga za Nzambi yo Kristu, beyala yandi mun’ezunda dia mvu.” (Lusengomono 20:⁠6) Kumosi yo Kristu, wan’a Nzambi bekala se atinu muna Kintinu kia Nzambi yovo luyalu lw’ezulu. Petelo wa ntumwa wavovesa akw’andi akwikidi vo, betambula “evwa dilembi wolakana, yo safuka” ‘mun’ezulu.’ (1 Petelo 1:​3, 4) Ekwe evwa diantalu!

Kansi, diambu diadi dia luyalu kiuvu kiakaka divaikisanga. Wau vo awana bewutulukanga beyala se atinu kun’ezulu, akinani beyala? E kiuvu kiaki kisinga fimpwa mun’elongi dilanda.

[Foto ina muna lukaya lwa 10]

Paulu adieyi kavova mu kuma kia wan’ansansi?