NTU A DIAMBU WA FUKWA | YESU OKUTUVULUZA—MUNA NKI?
Ekuma Tuvuididi Mfunu a Luvuluzu?
“O muntu wawutwa kwa nkento wa lumbu yandwelo, wazala ye mpasi. Nze mvuma, ovaika yo zengwa, otina nze kini, kezingila ko.”—Yobi 14:1, 2.
Tuka kuna nza nkulu, wantu bekalanga yo luzolo lwa kwamanana aleke ye mavimpi mambote yo zinga yakwele mvu. Kansi, e ludi i kiaki: Yeto awonso fwa tufwanga. E mvovo mia Yobi miayikwa se vioka 3.000 ma mvu mina ova ntandu misonganga e ziku kia diambu diadi.
Wantu awonso ova nza bena yo luzolo lwa zinga yakwele mvu. Nkand’a Nzambi ukutuzayisanga vo Nzambi wasia luzolo lwa zinga yakwele mvu mu ntima mieto. (Kimpovi 3:11) Nga Nzambi a nzolwa wadi vanga wantu ye luzolo lwalu lembi lo lungisa? Ve. Diambu dia Nzambi diyikilanga lufwa vo mbeni, disianga mpe nsilu vo lufwa “lusukiswa mvimba.”—1 Korinto 15:26.
Ka lukatikisu ko vo lufwa mbeni. Ka vena muntu ko ozolanga lufwa. Vava vonza kifinamanga tuvanganga mawonso muna suama yovo tina. Vava tuyelanga, tuvavanga mawuku muna sasuka. Tuvanganga mawonso muna venga konso diambu dilenda kutufila muna lufwa.
Nga vena ye kuma kilenda kutukwikidisa vo mbeni yayi osukiswa mvimba? Elo. Yave wa Nzambi wa Mvangi, kavanga wantu ko bazinga kolo kiakete yo fwa. O lufwa ke lwakala mu kani diandi ko. Nzambi ozolele vo wantu bazinga yakwele mvu ova ntoto, e kani diandi dilungana kikilu.—Yesaya 55:11.
Aweyi lufwa lusukisilwa e mvimba? Kuna nza nkulu wantu bavanga mawonso muna fokola lufwa, kansi ke balenda ko. O unu mpe wantu bakinu vava e mpila ya fokolwela lufwa. Akwa ngangu bevaikisanga nlongo milenda fokola e yaka yimbevo. Befimpanga e lekwa ya moyo muna zaya una yavangilwa. O unu, muna nsi zankaka wantu mvu miayingi bezinganga ke mu tandu kiavioka ko. Kansi, yamu wau wantu bakinu fwa. Nkand’a Nzambi uvovanga vo: “Awonso muna ntoto i bevutuka.”—Kimpovi 3:20.
Ka vena muntu ko olenda sukisa lufwa. Kansi, vena ye nsangu zambote, Yave wa Nzambi wavanga nkubika kimana twakûlwa muna lufwa. Nzambi wasola Yesu Kristu muna kutuvuluza.