LONGI DIA 8
Ekuma Nzambi Keyambulwilanga e mbi ye Mpasi?
1. E mbi aweyi yayantikila?
Nzambi wayambula vo wantu bakiyala mu kolo kiandá mu songa vo ke balendi fokola mpasi za wantu ko
E mbi yayantika ova ntoto vava Satana kavova luvunu lwantete. Kuna lubantiku, Satana mbasi alunga kakala, kansi ‘kasikila mu ludi ko.’ (Yoane 8:44) Wazola vo kasambilwa vana fulu kifwanukinu kaka Nzambi. Satana wavuna Eva wa nkento antete, wanleba kimana kanlemvokela vana fulu kia lemvokela Nzambi. Adami wayikama Eva muna kolamena Nzambi. O ukolami wa Adami watwasa mpasi yo lufwa.—Tanga Etuku 3:1-6, 19.
Vava Satana kafila Eva mu kolamena Nzambi, wayantika telamena e wisa kia Nzambi kia yala. Ulolo wa wantu beyikamanga Satana muna bembola Luyalu lwa Nzambi. Muna kuma kiaki, Satana wakituka se ‘nyadi a nza yayi.’—Tanga Yoane 14:30; 1 Yoane 5:19.
2. Nga Nzambi mu mpila yambi kasemena vangwa yandi?
Vangwa yawonso ya Nzambi yalunga. Nzambi wasema wantu ye mbasi mu mpila ina balenda kunlemvokela una ufwene. (Nsiku 32:4, 5) Nzambi watuvanga ye nswa wa sola edi diambote yovo edi diambi. O nswa wau ukutuvananga elau dia songa o zola kweto muna Nzambi.—Tanga Yakobo 1:13-15; 1 Yoane 5:3.
3. Ekuma Nzambi keyambulwilanga e mpasi yamu wau?
Se vioka kolo, Yave oyambulanga vo kimfumu kiandi kiatelamenwa. Ekuma? Muna songa vo kondwa kwa luyalu lwa Nzambi, ke vena luyalu lwakaka ko lulenda twasa mawete kwa wantu. (Kimpovi 7:29; 8:9) E mvu 6.000 miviokele kala misonganga e ziku kia diambu diadi. O luyalu lwa wantu lwafunga, ke lulendanga fokola vita ko ngatu umpumbulu, nsoki ye mayela.—Tanga Yeremiya 10:23; Roma 9:17.
Nswaswani ye luyalu lwa wantu, awana betondanga luyalu lwa Nzambi, nluta bebakanga. (Yesaya 48:17, 18) Ke kolo ko, Yave ofwasa tuyalu twawonso twa wantu. Awana kaka bena kun’esambu dia Luyalu lwa Nzambi bezingila ova nza.—Yesaya 11:9.—Tanga Daniele 2:44.
Tala e video Por que existe tanto sofrimento?
4. Luzindalalu lwa Nzambi nki’elau lukutuvananga?
Satana wavova vo ke vena muntu ko osadilanga Yave muna zola. Nga olenda vunisa luvunu lwalu? Elo, olenda. O luzindalalu lwa Nzambi lukutuvananga elau dia sola kana vo tuzolele yalwa kwa Nzambi yovo kwa wantu. E mpila zingu kieto kisonganga kana vo luyalu lwa nani twasola.—Tanga Yobi 1:8-12; Ngana 27:11.
5. Aweyi tulenda solela Nzambi se Nyadi eto?
E nsola zeto zisonganga kana vo ku sambu dia Luyalu lwa Nzambi twina
Tulenda sola Nzambi se Nyadi eto muna longokanga oma ma Nzambi ye yikama e nsambil’aludi ina e ngwizani ye Nkand’a Nzambi. (Yoane 4:23) Nze Yesu, tulenda bembola luyalu lwa Satana muna lembi kuyisia mu mambu ma mbumba yovo nwana e vita.—Tanga Yoane 17:14.
Satana osadilanga nkum’andi muna nungununa mavangu masafu. Vava tubembolanga mavangu mama, akundi eto ye yitu yeto balenda kutuveza yo kutusia e kitantu. (1 Petelo 4:3, 4) Muna kuma kiaki, tufwete sola. Nga tuvanga kikundi y’awana bezolanga Nzambi? Nga tulemvokela nsiku miandi miangangu ye miansongi? Avo tuvanga wo, tusonga vo Satana vuna kavuna vava kavova vo ka vena muntu ko olenda lemvokela Nzambi muna ntangw’ampasi.—Tanga 1 Korinto 6:9, 10; 15:33.
O zola kwa Nzambi muna wantu kusonganga vo e mbi ye mpasi zifokoka. Awana besonganga vo bekwikilanga muna diambu diadi, bezinga yakwele mvu ova ntoto.—Tanga Yoane 3:16.