Yave ovingilanga vo yakala ona wasompa kazolanga o nkaz’andi, katoma kunlunga-lunganga tuka muna kinitu yamuna kimwanda. O yima e fu nze, zitisa o nkento aku yo kumbunda e vuvu, dikusadisa mu kala se yakala diambote vava okazala. Avo osompele, nanga okituka se. Nkia mambu olenda longoka muna Yave mana mekusadisa mu kala se diambote? (Efe. 6:4) Yave wavovesa Yesu wa Mwan’andi vana meso ma ndonga vo otoma kunzolanga ye kunyangalela. (Mat. 3:17) Avo okitukidi se, kukadi ye nsoni ko mu vovesa wan’aku vo otoma kubazolanga. Ubasanisinanga muna mambu mambote bevanganga. Mase ana betangininanga mbandu a Yave, besadisanga wan’au mu kituka se Akristu azikuka. Olenda kubama tuka owau muna lungisa kiyekwa kiaki kuna sentu. Olenda wo vanga muna zolanga e yitu yaku yo toma lunga-lunga ampangi muna nkutakani. Kukadinge ye nsoni ko muna kubavovesa vo otoma kubazolanga yo kubavua o mfunu.—Yoa. 15:9. w23.12 28-29 ¶17-18

Kana una vo tusadilanga Yave ye kwikizi kiawonso, tubwilwanga mambu mampasi yo bakama mayela, wauna uvangamanga kwa wantu awonso. Vana ntandu, tuzizidilanga lubangamu lwa awana bemenganga o nkangu a Nzambi. Yave ke vengomonanga mambu mama mampasi ko, osianga kaka nsilu vo okutusadisa muna ntangw’ampasi. (Yes. 41:10) Muna lusadisu lwandi, tulenda tatidila e kiese kieto, baka nzengo zambote yo sikila ye kwikizi kana nkutu muna mambu masundidi e mpasi. Yave osianga nsilu vo okutuvana “luvuvamu lwa Nzambi.” (Fili. 4:6, 7) O luvuvamu lwalu i luvuvamu lwa ntima tukalanga lwau muna zaya vo tuna ye ngwizani ambote yo yandi. O luvuvamu lwalu “luviokele umbakuzi wawonso” ye lwamfunu kikilu. Nga wamona kala vo kuna nima samba kwa Yave ye nsi a ntima yawonso o ntim’aku wavuvama? E mpila ina o ntim’aku wavuvamena i yau iyikilwanga vo “luvuvamu lwa Nzambi.” w24.01 20 ¶2; 21 ¶4

O zola muna Nzambi kwafila wantu akwikizi mu sanisina nkumbu andi ye nsi a ntima yawonso. Davidi wazaya wo vo okembelela e nkumbu a Yave diau dimosi kwandi yo kembelela yandi kibeni Yave. Vava tuwanga e nkumbu a Yave tusungamenanga e mpila muntu kena, fu yandi yawonso ye mavangu mandi. Davidi wabadikilanga e nkumbu a Se diandi dia zulu vo yavauka yo kembelela yo. Wavanganga wo ye “yawonso” kakala yau, i sia vo, ye nsi a ntima yawonso. Diau dimosi mpe ye Anelevi, bavitanga o ntu muna sanisina Yave. Kuna lulembamu lwawonso bavova vo mawonso bavanganga ke mafwana ko mu sanisina e nkumbu avauka ya Yave una ufwene. (Nek. 9:5) Ka lukatikisu ko vo o lulembamu basonga muna sanisina Yave ye nsi a ntima, lwatoma yangidika ntim’a Yave. w24.02 9 ¶6