LONGI DIA 03
Nga Olenda Bunda e Vuvu Muna Bibila?
Bibila kisianga nsilu miayingi yo vana malongi mayingi mambote. Nanga ozolele zaya mana Bibila kilonganga, kansi lukatikisu una lwau mu bunda mo e vuvu. Nga wafwana bunda e vuvu muna nsilu ye malongi ma nkanda wau wankulu? Nga olenda kwikila mu mana Bibila kilonganga mu mpila tulenda kadila ye zingu kiakiese o unu ye kuna ntwala? Ndonga bekwikilanga muna malongi mama. Yambula twavovela mambu malenda kusadisa mu kwikila muna malongi mama.
1. Nga o tusansu tuna muna Bibila twaludi yovo savu kwandi?
Bibila kivovanga vo e mvovo mina mo “mialudi ye sikididi.” (Kimpovi 12:10) E mambu yo wantu beyikwanga muna Bibila bakieleka. (Tanga Luka 1:3; 3:1, 2.) Azingudi a tusansu ye asatuludi ayingi bevovanga vo e lumbu yamfunu, wantu, fulu ye mambu meyikwanga muna Bibila maludi kikilu.
2. Ekuma tulenda vovela vo e Bibila ke kiaviokela ntangwa ko?
Bibila nkumbu miayingi kiyikanga mambu mana ke mazayakana ko vava kiasonekwa. Muna bonga e nona, kivovelanga mambu ma ngangu za nza (ciência). Vava kiasonekwa mambu mama, wantu ayingi ke bakwikilanga mo ko. Kansi owau, ngangu za nza zisonganga e ziku vo mana masonama muna Bibila makieleka. Mambu mama ‘mafwana bundwa e vuvu, tuka wau yamu mvu ya mvu.’—Nkunga 111:8.
3. Ekuma tufwete bundila e vuvu mu mana Bibila kivovanga mu kuma kia kusentu?
Muna Bibila muna ye ungunzaa uyikanga “mambu ke mavangamene ko.” (Yesaya 46:10) Kiyikanga mambu mayingi ye sikididi kiawonso vitila mavangama. Kitoma vovelanga mpe mambu mayingi mevangamanga mu lumbu yeto. Mu longi diadi, tulongoka wankaka muna ungunza una muna Bibila. E mpila ungunza wau walunganena yasivi kikilu.
ZAYA DIAKA MANKAKA
Tala una e ngangu za nza zinina e ngwizani ye Bibila, fimpa mpe waka ungunza wasivi una muna Bibila.
4. Ngangu za nza ngwizani zina ye Bibila
Kuna nz’ankulu, wantu bakwikilanga vo vena ye lekwa kisimbininanga o ntoto. Tala e VIDEO.
Tala dina diasonama muna nkand’a Yobi se vioka mvu 3.500. Tanga Yobi 26:7, i bosi, vana e mvutu za kiuvu eki:
Ekuma e mvovo, o ntoto ‘wamanikwa muna nkatu’ minina miasivi?
O wantu muna mvu mia 1800 kaka bayiza bakula una uvangamenanga e mvula. Kansi tala dina Bibila kivovanga se vioka 3.500 za mvu. Tanga Yobi 36:27, 28, i bosi, vana e mvutu za yuvu eyi:
Ekuma e mvovo mia sono kiaki miyikanga una e mvula zivangamenanga minina miasivi?
Nga e sono kiaki kikumikini e vuvu kiaku muna Bibila?
5. Bibila kiasakula mambu mamfunu
Tanga Yesaya 44:27–45:2, i bosi, vana e mvutu za kiuvu eki:
Nkia mambu masakulwa muna Bibila mvu 200 vitila Babele yafwaswa?
Lusansu lusonganga vo Kurese wa Ntinu a Parasa ye makesa mandi bafwasa mbanz’a Babele muna mvu wa 539 V.T.K.b Batima mvuila mu kulula maza ma nkoko wataninanga e mbanza. Wau vo mielo mia mbanza miaziuka miakala, bakota muna mbanza yo kutumuna yo lembi nuana. O unu vioka 2.500 za mvu, Babele yakituka se zumbu. Owau, tala dina diasakulwa muna Bibila.
Tanga Yesaya 13:19, 20, i bosi, vana e mvutu za kiuvu eki:
Aweyi ungunza wau walunganena?
Fulu kiakala e mbanz’a Babele kuna Iraque
6. Bibila kiasakula mambu tumonanga o unu
Bibila kivovanga vo mu “lumbu yambaninu” tuzingilanga. (2 Timoteo 3:1) Tala dina Bibila kiasakula mu kuma kia lumbu yayi:
Tanga Matai 24:6, 7, i bosi, vana e mvutu za kiuvu eki:
Adieyi Bibila kivovanga mu kuma kia lumbu yambaninu?
Tanga 2 Timoteo 3:1-5, i bosi, vana e mvutu za yuvu eyi:
Adieyi Bibila kivovanga mu kuma kia fu ya wantu muna lumbu yambaninu?
Muna fu iyikilu mu sono kiaki, nkia fu omonanga kwa wantu?
AVO MUNTU UVOVESE VO: “Bibila nkanda wa savu kwandi.”
Kuna kwa ngeye, nkia mambu mesonganga vo tulenda bunda e vuvu muna Bibila?
MAMBU MASINA MA LONGI DIADI
Tusansu, ngangu za nza yo ungunza, mawonso mesonganga vo olenda bunda e vuvu muna Bibila.
Nkia Mambu Olongokele?
E Bibila, nkand’a tusansu twakieleka yovo nkand’a savu kwandi?
Nkia maka mambu ma ngangu za nza mena ngwizani ye Bibila?
Nga okwikilanga vo e Bibila kisakulanga mambu mevangama kuna sentu? Ekuma?
TALA MPE OMA MALENDE
Nga mana Bibila kivovanga mu kuma kia ngangu za nza maludi?
“Nga e Bibila Ngwizani Kina ye Ngangu za Nza?” (Longi dina muna jw.org)
Nkia mambu mesonganga vo mu “lumbu yambaninu” tuzingilanga?
“Ungunza 6 wa Nkand’a Nzambi ulungananga o Unu” (Eyingidilu dia Yuli-Setemba, 2011)
Zaya una ungunza wa Bibila mu kuma kia luyalu lwa ngolo lwa Ngerekia walunganena
Tala una ungunza una muna Bibila wasobela e ngindu za muntu mosi mu kuma kia Bibila.
a Ungunza i nsangu za Nzambi mu kuma kia mambu mevangama kuna sentu.
b V.T.K. disongele vo “Vitila Tandu Kieto,” T.K. disongele vo “Tandu Kieto.”