Olembiwa na Maliko
11 Sopano aluwa kangaandamele wu Yelusalemu, wu Betefage na wu Betaniya va Mwango wa Maolivi, Yesu oowaruma ofunjedae ambin’li. 2 Liye ooawandela ira: “Dowani mudela lelo munaliona nyo. Wewo, munodowa mwafwanye bulu kangamumangelele limo-i na mwanae walombwana unoyo kanaambeele gweliwavo na muthu. Mudowe mwamumasule mumuzena wa miyo. 3 Muthu uliwetene aufukani ira, ‘Chifukwa n’ni munamumasula bulula?’ Mudowe mwamuwandele ira, ‘Mbwiye unaamufuna moi akeda mari-a mu-indi-eda chito unomuzana thawi ineyo.’” 4 Eno aluwa koodowa moi koomufwanya bulu walombwana angamangeleliwe vande, mpepetele mwa sewu. Moi aluwa koomumasula. 5 Koma athu amo-iwa anayo kali kangaimelile vevo koowafuka ira: “Chifukwa n’ni munamumasula bulula?” 6 Aluwa kooawandela vyevyo Yesu aongile liye moi koowalola ira kadowe.
7 Athwayo koomudowana buluyo wa Yesu. Vanduli viwa aluwa koo-ela malaiwa aunde vathana va buluyo moi liye oogwelavo. 8 Koma teto athu anjinji kootandela malaiwa aunde musewu moi athu amo-iwa kookotola thambi da mitengo dedo dali mpepetele mwa sewu. 9 Ndiye athu anayo kali usogolo koma teto munduli mwae kookuwa ira: “Muvulumucheni! Odalisiwa ngunoyo unaza muzina la Yehova!* 10 Odalisiwa ngu Umwene wa Babi-u Davide unoyo unazoyo! Muvulumucheni nyo anayo muli udimu!” 11 Liye oofiya wu Yelusalemu novolowa mu kachisi. Ndiye ooing’ana vyongo vyetene vyevyo vyali mwemo, koma voi thawi yali ingamalile, oodowa wu Betaniya limo-i na ofunjedae 12.
12 Dambo lo-arela, vevo kakumaathu wu Betaniya, Yesu ookaana ndala. 13 Ndiye angali vandendai, oowona tengo wa nankuyu unoyo wan’na matakuru. Moi liye oodowa vevo ira aone akala unafwanyemo ipaso. Koma angafiile vevo vali tengoyo, kaafwanyilemo ipaso iliyetene koma matakuru oka chifukwa kayali thawi ineyo tengo wa nankuyu wabalaathu vipaso. 14 Eno liye oowandela tengoyo ira: “Muthu kanaza adja vipaso vyawo mpakana walewale.” Moi ofunjedae koovwa vyevi.
15 Sopano aluwa koofiya wu Yelusalemu. Vanduli viwa Yesu oovolowa mukachisi notamangi-a athu etene anayo kaguli-a koma teto anayo kagula vyongo mu kachisimo, teto oogubuducha matebulo a athu anayo kachenja ndalama koma teto mipando da athu anayo kaguli-a kangaiwa. 16 Liye kaalolile ira muthu uliwetene avire mukachisimo angatukulile katundu. 17 Liye oofunji-a moi ooawandela athwayo ira: “Kodi Malemba katinaonga ira, ‘Nyumbanga inoza iromoliwe nyumba yopempelelamo athu a mitundu detene’? Koma nyo muichenja kala malo ovitalelamo mambava.” 18 Asembe alukulu na alembi koovwa vyevi, moi koowambeela saelasaela ndila ira kamuphe koma aluwa koomuova voi gulu letene la athu loodabwa na vyevyo afunji-a liye.
19 Mazulo a dambo lelo, aluwa kookuma mu mzindoyo. 20 Koma mamawa vevo kaviraathu, koowona ira tengo wa nankuyule uuma na michichi dene. 21 Eno Petulo, ooumbuwela moi aongile ira: “Rabi, kaonani! Tengo wa nankuyu unoyo mwautembelele nyoole uuma.” 22 Yesu oowasomeda ira: “Muroromelenga Mulungu. 23 Ndithu ndinaauwandelani ira muthu uliwetene owandela mwangola ira, ‘Venyavo vano udowe wavivoche munyanja,’ moi kanakaikela m’murimani mwae koma ukaana iroromelo ira vyevyo uongile liye vinoireya, vinoza viireye. 24 Chichifukwa iwa ndinauwandelani ira, vyongo vyetene vyevyo munavepa nyo mupempelo, muroromelenga ira muviwachela wale moi munoza muviwachele. 25 Teto mwaimela nopempelanga, mukululukenga yongo iliyetene ineyo muthu auchimweleni liye ira Babinyu waudimu aukululukeleni teto machimwinyu.” 26* ——
27 Vanduli viwa aluwa koofiya nawili wu Yelusalemu. Moi vevo aenda liye mukachisi, asembe alukulu, alembi na andimuwa kooza 28 nomufuka ira: “Kodi mukaana ulamulilo opangela vyongo vyevi? Kapena ngu mbaani unoyo auva-ileni ulamulilo unola?” 29 Yesu oowasomeda ira: “Ndinoufukani yofuka imo-i. Mundisomede, moi namiyene teto ndinouwandelani unoyo andiva-ile ulamulilo unoyo ndinapangela miyo vyevi. 30 Kodi ubatizo unoyo Yohani apanga liye wali okumela udimu kapena wa athu? Ndisomedeni.” 31 Ndiye aluwa koowambeela kambilana ira: “Naonga ira, ‘Wakumele udimu,’ liye unonifuka ira, ‘Nanga chifukwa n’ni kamwamuroromele?’ 32 Nanga nionge ira ‘Wakumele wa athu?’” Aluwa koowova gulu la athu, chifukwa athu etene anayo koororomela ira Yohani ali namaongela. 33 Eno aluwa koomusomeda Yesu ira: “Kaninaiziwa.” Ndiye Yesu ooawandela ira: “Namiyene teto kandinauwandelani unoyo andiva-ile ulamulilo unoyo ndinapangela miyo vyongo vyevi.”