Mgelo wa Yehova Oomuteteza Hezekiya

Senakeribu unoyo ali mwene wa Asuri oogonji-a umwene wa Isaraeli wa mafuko 10. Eno oofuna teto gonji-a umwene wa Yuda wa mafuko men’li. Liye oowambeela gonji-a mizinda da Yuda. Mzinda unoyo aufuna liye vinjinji wali wa Yelusalemu. Koma Senakeribu kaaiziwa ira Yehova ooteteza mzindoyo.

Hezekiya unoyo ali mwene wa Yuda, oomuva-a Senakeribu ndalama dinjinji ira kawake mzinda wa Yelusalemu. Senakeribu oowachela ndalamado komave ootumiza gulu lae la asilikali wu Yelusalemu. Athu amumzindoyo kangavwile ira asilikalayo ka-alile vang’ono fiya koova vinjinji. Koma Hezekiya oowawandela ira: ‘Kamuove. Pivyoona ira Asuri mbakopolo, komave Yehova unonikami-a.’

Senakeribu oomutumiza Rabisake ira adowe wu Yelusalemu ira adowe aonge na Ayuda. Rabisake ooimela unde wa mzindola nokuwa ira: ‘Nyo Hezekiya kaupusi-eni. Yehova kanaukami-eni. Kavali mulungu unoyo unanilepeli-e ugonji-ani.’

Hezekiya oomuvepa Yehova ira aakami-e iziwa vyofwanela panga. Yehova oosomeda ira: ‘Kamuove na vyevyo Rabisake unaonga liyevyo. Senakeribu kanagonji-e Yelusalemu.’ Vanduli viwa Hezekiya oowachela makalata okumela wa Senakeribu. M’makalatayo mwali mawu oonga ira: ‘Kakedani somedela ira mugonja. Yehova kanauvulumucheni.’ Vyangaireile eno Hezekiya oopempela wa Yehova ira: ‘Yehova ninavepa ira munivulumuche ira uliwetene aiziwe ira nyo muli Mulungu oona.’ Yehova oomuwandela ira: ‘Mwene wa Asuri kanafiya wu Yelusalemu. Miyo ndinoteteza mzindangola.’

Senakeribu akeda ona ira unogonji-a Yelusalemu ba-i. Koma dambo limo-i, Yehova ootumiza mgelo umalo wewo asilikali a Asuri kagonaathu. Mgeloyo oopha asilikali 185,000. Asilikali etene akopolo a Senakeribu kakhwele vevo. Vyevi vyangaireile Senakeribu ooiziwa ira ugonja moi akede ambeela ulendo owelela waniwa. Va Yehova ookwakwaneli-eda lonjezo lae loi unoza amuteteze Hezekiya koma teto mzinda wa Yelusalemu. Kodi aakale ira nyo munakala wu Yelusalemu moomuroromela Yehova?