Choni cho Tukwaghiwapo pa Nkomano Inkulu?

Choni cho abantu aba bakuboneka bakuhoboka? Bali pa lukomano ulukulu. Kale, ababombi aba Chala bakabuzyiwa ukuti bakomanaye poka katatu umwaka ghulighosi. Ngati mo vikabela kale, nuswe bulo tukukomana poka mubwinji bwitu. (Ukukumbusya Indaghilo 16.16) Umwaka ghulighosi tukuba ni nkomano katatu: Ulukomano ulwa isiku lyoka tukupanga kabili pamwaka sona nu lukomano ulwa chigaba, ulwa masiku matatu. Ka tukupindula buli-buli ni nkomano izi?

Zikughomya ubukamu na Bakilisitu abamwitu. Abaizilayeli bakahobokagha pakumupala u Yehova pa nkomano zyabo. Nuswe bulo tukuhoboka pakumwiputila poka pa nkomano zyitu inkulu. (Salimo 26.12; 111.1) Inkomano izi zikutukomannya poka na Bakaboni abamwitu abakufuma mu vipanga ivyakupambanapambana, sona akabalilo kamo bakufuma na ku vyisu ivinji. Pamusanya, tukulyela poka ichakulya pa malo agha lukomano. Aka kakuba kabalilo akakuhobosya nkani. (Imbombo 2.42) Pa nkomano izi, tukwiyenezya swebene mo ulughano lukutukomanizya poka na ‘abitiki abamwitu’ pa chisu chosi.—1 Pitala 2.17.

Zikutwavwa pabumi bwitu uwabuzimu. Abaizilayeli bakapindulagha nanti bivwisya amasimbo gho abamanyisi bakabalingannyanga. (Nehemiya 8.8, 12) Nuswe tukupalizya ifundo izya mu Bayibolo zyo tukumanyila pa nkomano zyitu. Ulukomano losi, umutu wache ghukufuma mu Bayibolo. Tukumanyila mo tungabombela ubwighane ubwa Chala ukwendela mu nkani zyo zikuneniwa, po zimo zikuba zyakulekelana. Pakuba sona ivifwanikizyo ivya vintu vyo vikabombiwa naloli. Pala tukwivwa mo abamwitu bajimbila ni ntamyo, nukubukilila ukuba basubaliwa, nuswe bulo tukukazyiwa. Pa lukomano ulwa chigaba pakuba amadilama gho ghakutwavwa ukwivwisya inkani izya mu Bayibolo, sona nukumanyilapo kamo. Pa lukomano lulilosi abantu bakoziwa, ukwilangizya ukuti bayipa kwa Chala.

• Choni cho inkomano zikuba zyakuhobosya?

• Ka mungapindula buli-buli nanti mwaghiwapo pa lukomano?