U Kalata Uwakufuma ku Kagulu Akakwenelezya

Baghaniwa Bakamu na Bayemba:

Ichifukwa chakuti tumughanite u Chala na bantu tukwivwila ululaghilo ulwakuti, ‘bukagha pakasi pa bantu aba luko losi nu kubapela pakuba bamanyili bane sona mubozyanje.’ (Mata. 28.19, 20; Mali. 12.28-31) Ulughano ulwakufuma pasi pa moyo lwamaka nkani. Lungabavwa abantu bo bali ‘ni nyinong’ono inyiza zyo zingabavwa ukubwagha ubumi ubwa bwila na bwila’ ukuti basinte.—Imbo. 13.48, NW.

Kunyuma kosi uku, tukabikaghapo umoyo pakusungila vyo twaya pakunena mu bulumbilili sona ukugabila amabuku. Loli pa kabalilo aka tukulondiwa ukubukilila ukubikapo umoyo ukuti tube nu luso pa nkani iyakunenezannya na bantu mu bulumbilili. Tukulonda ukulangizya ukuti tubaghanite abantu umwakunena inkani zyo bazighanite. Ukuti tubombe bunubu tukulondiwa ukuba swe bakwisengannya ukusinta sona ukumanya intamyo izya muntu aliwesi pamwene sona na vyo avighanite. Nkimba akabuku aka, inti katwavwe buli-buli?

Akabuku aka kali ni mitu 12 yo yili ni nkalo zyo zingatwavwa ukuti tubaghanaghe abantu sona ukuti tubamanyisyanje akiza. Umutu ghulighosi wafuma munkani iya mu Bayibolo yo yikulingannya mo u Yesu pamo umulumbilili uwa mu kabalilo aka batumiwa akalangizizya inkalo yimo mu bulumbilili. Akabuku aka katasimbiwe ukuti katwavwe ukusungila vyo twaya pakunena mu bulumbilili awe, loli ukuti katwavwe ukulangizya ukuti tubaghanite abantu. Napo inkalo zyosi zyakulondiwa mu bulumbilili, loli inti twennye ichifukwa cho inkalo zimo zyakulondiwa nkani pa kabalilo ko tukwanda pa kunenezannya nu muntu, pakabalilo akakunyokelako sona waghe twanda pakumanyila nawe Ibayibolo.

Po mukwennya umutu ghulighosi, mwinong’onele nkani mo mungalangizizya inkalo iya mutu ugho pa kabalilo ko mukunenezannya nu muntu ko mukwikala. Mubikepo umoyo ukuti mumughane nkani u Yehova sona abantu. Ukuchila chilichosi, ulughano ulu, lungabavwa ukuti mubamanyisye abantu ukuba Bakilisitu.

Tukupalizya nkani ichifukwa chakubombela poka numwe imbombo umwakukolelana. (Zefa. 3.9) U Yehova abasaye po mukubukilila ukubaghana abantu nu kubamanyisya!