Nkimba Abavwilizi Bakubomba Mbombo Buli?

Ibayibolo likunena izya banavuli amagulu ghabili bo bali na mabudindo mu chipanga, abasongo na “bavwilizi.” (Aba Filipi 1.1) Mu chipanga chilichosi mukuba abasongo sona nabavwilizi. Nkimba abavwilizi bakubomba mbombo buli yo yikutwavwa?

Bakwavwa igulu ilya basongo. Abavwilizi bakuba pabukamu ubukulu nkani nu Yehova, bakuba basubaliwa, abololo sona bamo bakuba bachilumendo na bachasongo. Bakubomba imbombo izyakulondiwa nkani izyakupambanapambana zyo zikulondiwa amaka mu chipanga. Vinivi vikwavwa abasongo ukukwanisya imbombo yabo iya kumanyisya nu kulyesya.

Bakubomba imbombo zyo zikwavwa ichipanga. Abavwilizi bamo bakuba ni mbombo iyakupokelela abantu bo bakwiza pa nkomano. Bamo bakwenelezya ivyakwimbila, bamo bakugaba amabuku na magazini, bamo bakwenelezya ivya ndalama, sona bamo bakugaba ivigaba ivyakulumbililako. Bamo bakwavwa ukuyannya ivintu vyo vikomanikite pa Nyumba iya Bumwene. Abasongo aba chipanga bangabalaba abavwilizi ukuti baye babavwe abachasongo. Abavwilizi bakwiyipa ukubomba imbombo yosi yo bangabapa. Ivi vikupangisya ukuti ichipanga chibachindikaye.—1 Timoti 3.13.

Bakulangizya inkalo inyiza pakuba Bakilisitu. Ukuti basaliwe ukuba bavwilizi bakuba ni nkalo inyiza pakuba Bakilisitu. Pala bakuba ni vigaba pa nkomano, bakughomya ulusubilo lwitu. Nanti bakulimbikila pa mbombo iya kulumbilila vikwavwa ukuti nuswe tubombaghe umwakuyana bulo. Pala bakukolelana ni gulu ilya basongo abachipanga vikwavwa ukuti babe bakuhoboka sona nukukolelana. (Aba Efeso 4.16) Nanti akabalilo kendapo, bope bangasaliwa ukuba basongo.

• Nkimba abavwilizi bantu buli?

• Ka abavwilizi bakwavwa buli-buli ukuti ichipanga chendaye akiza?