Nkimba Isembe ya Yesu ‘Yikubasatula Buli-buli Abantu Abinji’?
Vyo Ibayibolo likwamula
U Chala akapeleka u Yesu ukuba sembe ukuti apoke abanthu ku mbibi ni mfwa. Ibayibolo likunena ukuti ibanda lya Yesu likakupuliwa ukuti atusatule. (Aba Efeso 1.7; 1 Pitala 1.18, 19) Chochobene u Yesu akanena ukuti akiza ukuti ‘abape ubumi bwache ukuti apoke abanthu abinji.’—Matayi 20.28, King James Version.
Choni cho u Yesu akalondiwa ukupeleka ‘ubumi bwache ukuti apoke abanthu abinji’?
Umunthu uwabwandilo, u Adamu akaba mugholosu sona atakaba ni mbibi. Ichifukwa chakuti u Adamu atakamwivwila u Chala, akatagha ulusako ulwakwikala nu bumi kwa bwila na bwila. (Ubwandilo 3.17-19) Abana bosi aba Adamu bakapapiwa ni mbibi. (Aba Loma 5.12) Ibayibolo likulangizya ukuti u Adamu “aghulizyiwe” ku buzya ubwa mbibi ni mfwa poka na bana bache. (Aba Loma 7.14) Pakuti abanthu bambula ukufikapo, nayumo yo angapyanizizya papo vyo u Adamu akatagha.—Salimo 49.7, 8.
U Chala akabapelela ichisa abana aba Adamu ichifukwa chakuti batakaba nu lusubilo lulilosi. (Yohani 3.16) Ichifukwa chakuti u Chala wabwanaloli nge atakasulako bulo imbibi zyabo pamo ukubahobokela ukusita ichifukwa ichakwivwika. (Salimo 89.14; Aba Loma 3.23-26) U Chala abaghanite abanthu cho chifukwa akapeleka izila iyakuti abahobokele nu kubatabula ku mbibi zyabo. (Aba Loma 5.6-8) Izila iyi sembe iya Yesu.
Nkhimba ukusatuliwa chochoni?
Mu Bayibolo amazyu aghakuti “ukusatuliwa” ghakung’anamula ivinthu vitatu ivyakukonkhapo ivi:
Amalipilo.—Ukubaligwa 3.46, 47.
Indalama zyo zikupelekiwa ukuti umunthu apokiwe.—Ukusoka 21.30.
Umutengo uwakuyana bulo ni chinthu cho chaghuliwa.a
Ennya mo amazyu agha ghakukolelana ni sembe iyakusatula iya Yesu Kilisitu.
Amalipilo. Ibayibolo likunena ukuti Abakilisitu ‘baghuliwe nu mtengo uwapamwanya nkhani.’ (1 Aba Kolinti 6.20; 7.23) Umutengo ughu libanda ilya Yesu lyo ‘akamughulila u Chala abanthu abaluko losi na baneno zyosi sona abainkho zyosi izya banthu.’—Ubuvumbuli 5.8, 9.
Ukupokiwa. Isembe iya Yesu yoyo ‘yikatupoka’ ku mbibi.—1 Aba Kolinti 1.30; Aba Kolosi 1.14; Aba Hebeli 9.15.
Umutengo uwakuyana bulo. Isembe yo u Yesu akapeleka mtengo uwakuyana bulo nu bumi ubwakufikapo bo u Adamu akatagha. (1 Aba Kolinti 15.21, 22, 45, 46) Ibayibolo likunena ukuti: ‘Pakuti ukuyana na mumo abanthu abinji bakabila ba mbibi pachifukwa ichakusita kwivwila ukwa munthu weka, umwakuyana bulo, abanthu abinji bakwiza pakuneniwa ukuti bagholosu pamaso pa Chala pachifukwa ichakwivwila ukwa munthu weka.’ (Aba Loma 5.19) Ivesi ili likulongosola mo imfwa iya munthu weka yingasatulila abanthu abinji ku mbibi. Ubwanaloli bwakuti isembe ya Yesu ‘yikabasatula abanthu bosi’ bo bakuyezyayezya ukubomba cho chiza.—1 Timoti 2.5, 6.
a Mu Bayibolo ilizyu ilyakuti “ukusatuliwa” likunena ivya mutengo pamo ichinthu ichapamwanya cho chikupelekiwa pakutabula ichinthu chimo. Umwakufwanikizya, ilizyu ilya Chihebeli ilyakuti ka·pharʹ likung’anamula ukuti “ukumata.” (Ubwandilo 6.14) Akabalilo akinji likunena ivya kukupikila imbibi. (Psalm 65:3) Ilizyu ilyakuyana ni lizyu ilyakuti koʹpher likung’anamula umutengo gho ghukupelekiwa ukuti bakupikile imbibi. (Ukusoka 21.30) Umwakuyana bulo ilizyu ilya Chigiliki ilyakuti lyʹtron, lyo likung’anamula ukuti “ukusatuliwa” lingabomba sona pakunena izya ‘kupoka abanthu.’ (Matayi 20.28; The New Testament in Modern Speech, by R. F. Weymouth) Abasimbi Abachigiliki bakabombezya ilizyu ili pakunena izya mutengo gho ghukupelekiwa ukuti bamusatule umunthu yo bamukola ku nkhondo pamo umuzya.