Choni cho u Yesu Akwitiziwa Ukuti Mwana wa Chala?

Vyo Ibayibolo likwamula

Ibayibolo likunena ukuti u Yesu “Mwana wa Chala.” (Yohani 1.49) Amazyu aghakuti “Mwana wa Chala” ghakulangizya ukuti u Chala weyo Mupeli sona weyo Chiziba chabumi ukongannyapo nu bumi bwa Yesu bulo. (Salimo 36.9; Ubuvumbuli 4.11) Ibayibolo likuti u Chala atakapapa nadi u Yesu ngati mo abanthu bakupapila abana.

Ibayibolo likunena sona ukuti abanthumi bana ba ‘Chala uwa bwanaloli’ (Jobu 1.6) Likunena sona ukuti umunthu uwabwandilo u Adamu akaba “Mwana wa Chala” (Luka 3.38) Loli Ibayibolo likunena ukuti u Yesu weyo u Chala akandila pakupela sona likulangizya ukuti weyo Mwana umughaniwa nkhani uwa Chala.

• Nkhimba u Yesu akikalagha naloli kumwanya bo achili atizite pachisu ichapasi?

• Nkhimba u Yesu akabombagha choni bo achili atizite pa chisu chapasi?

Nkhimba u Yesu akikalagha naloli kumwanya bo achili atizite pachisu ichapasi?

Inga. U Yesu akaba chipeliwa ichabuzimu bo achili atapapiwe ngati munthu pachisu. U Yesu akanena ukuti: ‘ane inkhafuma kumwanya.’—Yohani 6.38; 8.23.

U Chala akandila pakupela u Yesu bo achili atapelite chilichosi. Pakunena ivya Yesu Ibayibolo likunena ukuti:

• “U Kilisitu . . . we katote yuyo ali pamwanya pavipeliwa vyosi.”—Aba Kolosi 1.15.

• Weyo “u Chala akandila pakupela.”—Ubuvumbuli 3.14.

U Yesu akakwanilisya ubulaghuzi bo bukunena ivya munthu ‘yo akabako ukufuma kale nkhani, mumasiku aghakale nkhani.’—Mika 5.2; Matayi 2.4-6.

Nkhimba u Yesu akabombagha choni bo achili atizite pa chisu chapasi?

Akaba nu budindo ubwa pamwanya nkhani kumwanya. U Yesu akanena ivya budindo bwache po akiputa ukuti: ‘Tata. . . umphe ubuchindamu bubo inkhaba nabo poka nawe, bo ichisu ichapasi chichili pakupeliwa.’—Yohani 17.5.

Akamwavwa u Tata wache pakupela ivinthu vyosi. U Yesu akabombela poka nu Chala ngati ‘we fundi.’ (Isya Mbupingamu 8.30) Pakunena ivya Yesu lbayibolo likuti: ‘Pakuti ukwendela mumwache, u Chala akapela ivinthu vyosi ivya kumwanya ni vya muchisu ichapasi ichi.’—Aba Kolosi 1.16.

U Chala akendela mwa Yesu ukuti apele chilichosi. Ivipeliwa ivi vikongelezyapo ivipeliwa ivyabuzimu vyosi vyo viliko sona ni chipeliwa cho tukuchennya na maso. (Ubuvumbuli 5.11) U Yesu nu Chala bakakolena pakubomba ivinthu ngati mo akubombela uwakusimba amapulani gha nyumba nu wakuzenga. Yumo akusimba ipulani iya nyumba po ufundi akuzenga.

Akaba Mazyu. Ibayibolo likunena ukuti bo u Yesu atizite pachisu ichapasi akaba “Mazyu.” (Yohani 1.1) Ivi vikulangizya ukuti u Chala akamubombezyanga Umwana wache pakupeleka ubutenga sona ubulongozi ku banthumi.

Vikulangizya sona ukuti u Chala akamutumagha u Yesu ukuti anene na banthu pachisu ichapasi. U Chala abaghiye ukuti akamutumagha u Yesu pakuba Mazyu ukuti amupe ubulongozi u Adamu nu Eva mu mughunda ubwa Edeni. (Ubwandilo 2.16, 17) U Yesu abaghiye ukuti weyo akatangililagha Abaizilayeli munkholongo sona Abaizilayeli babaghiye ukuti bakivwanga amazyu ghache.—Ukusoka 23.20-23.a