ICHIMANYILO 10

Ukusinta-sinta Amazyu

Isya Mbupingamu 8.4, 7

IFUNDO INKULU: Ukuti inkani yinyu yivwike akiza, mubaghiye ukusinta-sinta amazyu sona ni sipidi yinyu iyakanenele.

Mukwezyange pamo mwisyange amazyu. Mukukwezyange amazyu ukuti mulangizye ifundo inkulu sona ukuti abantu babikeko amahala ku nkani yinyu. Mubombaghe umwakuyana bulo pala mukubelenga isimbo lyo lili na mazyu agha bulongi. Mungisya amazyu ghinyu ukuti mubavwe abantu ukuti balindilile ukwivwa amazyu gho ghakulongosola ivintu vyo vingabapangisya ukuti babe ni lyogha pamo ukupasya.

Mutakakwezyange amazyu ghinyu pipipipi ichifukwa chakuti bamo bangakimiwa ni nkani yinyu. Mutakanenaghe inkani yinyu umwalwangalo pamo umwamadilama.
Ukusinta akivwikile aka mazyu. Nanti chakwitikiziwa mu chinenolo chinyu, mungakwezya amazyu ukuti mulangizye ifundo inkulu pamo ukuti mulongosole ubutali bwa chintu pamo ubupimpa bwache. Mungisya amazyu ukuti mulongosole ivintu ivyachitima pamo ivintu vyo vingapangisya ukupasya.
Ukusinta isipidi iya mazyu. Munganena umwalubilo-lubilo ukulangizya ukuti muhobokite. Munganena Umwapanandi-panandi nanti mwanda pakulongosola ifundo izyakulondiwa.

Ukuti mutakabaswighisye abantu, mutakasinte amazyu ghinyu umwakuchenusya. Mutakanenaghe umwalubilo-lubilo umwakuti abantu bafike na pakupotwa ukwivwisya vyo mukunena ichifukwa ichakuti vyo mukunena vitakwivwika akiza.