Balipo balinga Abakaboni ba Yehova bo umwe mubamenye? Swe bamo swe bapalamani binu, tukubombela poka imbombo, pamo tukumanyila poka isukulu. Lumo tukanenezannyapo ivya Bayibolo numwe. Ka swe bawenu nkani-nkani? Choni cho tukubabuzyako abamwitu vyo tukusubila?

Swe bantu bulo. Tufumite mu maluko aghakupambanapambana sona tukwagha umwakupambana. Swe bamo tukaba mu vipanga ivyakupambanapambana sona bamo batakasubilagha ukuti u Chala aliko. Bo tuchili ukuba Bakaboni ba Yehova, tukamanyila tasi vyo Ibayibolo likumanyisya. (Imbombo 17.11) Tukitikizya vyo tukamanyila, ukufuma apo, tukasala sweka ukumwiputa u Yehova.

Tukupindula na vyo tukumanyila mu Bayibolo. Swe bosi tukukomana ni ntamyo sona tukupuvya. Loli pakuti tukuyezyayezya ukubombezya ifundo izya mu Bayibolo, pakabalilo aka ivintu vikutwendela akiza. (Salimo 128.1, 2) Cho chifukwa tukubuzyako abamwitu ivintu ivyiza vyo tukumanyila mu Bayibolo.

Tukukonka ifundo izya mu Bayibolo. Ifundo izi zikutwavwa ukuti twikalaye akiza. Tukubachindika abamwitu, sona tukuba basubaliwa na bachisa. Abantu bo bakwendela ifundo izya mu Bubayibolo bakuba biza, bakwikala akiza na bamwabo mutwaya na mumbumba, sona bakuba ni nkalo inyiza. Pakuti “u Chala atakwennya icheni icha muntu,” cho chifukwa nuswe tuli pabukamu ubukulu na bamwitu pa chisu chosi. Tutakusalana amaluko sona tutakwitikizya ukuti ivipani vitupaghulannye. Napo swe bantu bulo, loli tupambanite ivyakubomba na bamwitu.—Imbombo 4.13; 10.34, 35.

• Nkimba Abakaboni ba Yehova bakuyana buli-buli na bamwabo?

• Nkimba Abakaboni ba Yehova bakumanyila nkalo buli mu Bayibolo?

Abantu abinji bakwinong’ona ukuti izina ilyakuti Bakaboni ba Yehova lya chipanga cho chanda lunulu. Loli, imyaka iyakupululila 2,700 yo yendapo, ababombi aba Chala bakitizyiwanga ukuti “bakaboni” bache. (Yesaya 43.10-12, nwt) Ukufuma kwisinda mpaka 1931, tukamanyikwanga ukuti Bamanyili ba Bayibolo. Choni cho tukanda ukwitizyiwa Bakaboni ba Yehova?

Likwimila u Chala witu. Kale po Ibayibolo likasimbiwanga, izina ilya Chala, Yehova, likaghiwanga mu malo amasawuzandi aminji. Mu Mabayibolo aminji gho abantu basanuzya, batakusimbamo izina ilya Chala, loli bakusimbamo amapalo aghakuti Mwene pamo Chala. U Chala uwabwanaloli akivumbula mwene kwa Mozesi ni zina lyakuti Yehova. U Chala akati: “Ili lyo lizina lyane bwila na bwila.” (Ukusoka 3.15, nwt) Apa, u Chala akiyipambanisya ku bachala ababumyasi. Swe bakuhoboka ukumanyikwa ni zina ilya Chala.

Likulingannya izya mbombo yitu. Ukwanda kale nkani, abantu bakulangizya ukuti bali nu lusubilo mwa Yehova. Uwabwandilo akaba we Abelu. Kukaba sona abakaboni abanji, u Nowa, u Abulahamu, u Sala, u Mozesi, u Devedi, na bamwabo. Bosi aba bali mu “chilundilo ichikulu nkani icha bakaboni.” (Aba Hebeli 11.4–12.1) Ngati mo umuntu akumwimila ubukaboni uwamwabo ku khoti, nuswe bulo tukumwimila ubukaboni u Chala nu kunena ubwanaloli bwache.

Tukukonka u Yesu. Ibayibolo likumwitizya “umusubiliwa, sona nu kaboni uwanaloli.” (Ubuvumbuli 3.14) U Yesu akati ‘akalifumusya’ izina ilya Chala nukubukilila ‘ukusimikizya’ ubwanaloli bwache. (Yohani 17.26; 18.37) Cho chifukwa bosi bo bakumukonka u Yesu mubwanaloli babaghiye ukwitizyiwa ni zina lya Yehova sona nukulivumbula. Ivi vyo Abakaboni ba Yehova bakubomba.

• Choni cho Abamanyili ba Bayibolo bakanda ukwitizyiwa ukuti Bakaboni ba Yehova?

• U Yehova akanda liyi ukuba na bakaboni pa chisu?

• Wenu yo we Kaboni umukulu uwa Yehova?

Ibayibolo likanenela zila ukuti pala u Kilisitu afwa, abamanyisi abamyasi inti bakize pakasi pa Bakilisitu nu kuvulungannya ubwanaloli. (Imbombo 20.29, 30) Pakati penda akabalilo, vikabombiwa naloli. Bakanda ukongannya ivimanyilo ivya Yesu ni vyabumyasi. Vinivi vikapangisya ukuti pabe Ichikilisitu ichabumyasi. (2 Timoti 4.3, 4) Ka tungamanya buli-buli ukuti amasiku ghano chilipo ichimanyisyo ichenecho ichakufuma mu Bayibolo?

Akabalilo kakakwana ukuti u Yehova avumbule ubwanaloli.  U Yehova akanenela zila ukuti mumasiku aghabumalilo ubwanaloli bukwiza ukumanyikwa. (Danieli 12.4) Mu 1870, abantu abanandi bulo bakanda ukufufuza ubwanaloli. Bakiza bamanya ukuti ivimanyilo ivyinji ivya vipanga vitakufuma mu Bayibolo. Ukufuma apo, bakanda ukufufuza ukuti bamanye ubwanaloli ubwenecho ubwa mu Bayibolo. U Yehova akabasaya. Akabavwa ukuti bivwisye akiza amasimbo.

Bakalimbikilagha Ukumanyila Ibayibolo. Abamanyili ba Bayibolo aba, bakabombezya izila yo nuswe tukubombezya amasiku ghano. Bakasalagha umutu mu Bayibolo nu kunenezannya. Nanti bagha ukuti batakwivwisya vyo Ibayibolo likunena, bakalondagha amavesi aghamwabo ukuti bivwisye akiza. Pabumalilo, nanti bagha ukuti amavesi ghakukolelana, bakasimbagha. Bakabombezya Ibayibolo ukuti lyamulaghe lyene. Mu zila yiniyi, bakamanya izina ilya Chala nu Bumwene bwache, ichifukwa cho akapelela abantu ni chisu, cho chikubombiwa pala umuntu afwa, sona ukuti abakufwa bakwiza ukuzyuka. Bakati bamanya ubwanaloli, bakasatuliwa ku vimanyisyo ivyabumyasi ni miteto.—Yohani 8.31, 32.

Ukufika mu 1879 Abamanyili aba Bayibolo bakamanya ukuti akabalilo kafika akakuti abantu bamanye ubwanaloli. Po mumwaka bunubu, bakanda ukupanga Gongwe la Mulinda—Likupharazga Ufumu wa Yehova. Amagazini agha ghachili ghakusimbiwa mpaka akabalilo kano. Pakabalilo kano, tukubabuzyako ubwanaloli ubwa mu Bayibolo abamwitu mu vyisu ivyakukwana 240 sona muvinenelo ivyakupululila 750. Ubwanaloli po bwamanyikwa nkani ukuchila kunyuma kosi!

• U Kilisitu akati afwa, choni cho chikabombiwa nu bwanaloli?

• Choni cho chatwavwa ukuti tumanye sona vyo Amzyu agha Chala ghakumanyisya?

Kale, Abakaboni ba Yehova bakabombezyanga Amabayibolo gho abantu abanji bakasanuzya. Loli tukennya ukuti chiza ukuba ni Bayibolo lyo lingavwa abantu ukuti “babumanye ubwanaloli.” Ubu bo bwighane ubwa Chala. (1 Timoti 2.3, 4) Ukufuma mu 1950, tukanda ukufumya Ibayibolo ilya New World Translation muvigaba-vigaba. Ibayibolo ili, lyasanuziwa akiza nkani muvinenelo ivyakupululila 130.

Tukalondiwanga Ibayibolo ilyakwivwika akiza. Ichinenelo chikusinta pala akabalilo kendapo. Cho chifukwa Amabayibolo ghamo ghali na mazyu aghakale nkani sona gho ghatamye ukughivwisya. Sona kwaghiwa amabuku aghakale nkani gho ghakutwavwa ukumanya mo amasimbo ghakabela pabwandilo. Vinivi vyatwavwa ukwivwisya akiza Ichihebele, Ichialamu, ni Chigiliki.

Tukalondiwanga Ibayibolo lyo likunena ubwanaloli. Bo bakusanuzya Ibayibolo bakulondiwa ukuba abasubaliwa. Bateneleye ukusinta amazyu gho u Chala atupiye. Loli, mu Mabayibolo aminji gho abantu basanuzizye, izina ilya Chala, Yehova, litakwaghiwamo nalumo.

Tukalondiwanga Ibayibolo lyo likumuchindika umwenecho. (2 Samueli 23.2) Mu New World Translation, banyosyezizyemo izina ilya Chala mu malo ghache. Ma mabuku aghakale nkani, izina ilya Chala likaghiwangamo mu malo aghakukwana 7,000 ngati mo mungenezya muntende umu. (Salimo 83.18) Ichifukwa chakuti bakafufuza umwakukwana, Ibayibolo ili likwivwika akiza, sona likutwavwa ukumanya mo u Yehova akwinong’onela. Nanti muli nalyo Ibayibolo ilya New World Translation pamo mute nalyo muchinenelo chinu, loli mubaghiye ukubelenga Amazyu agha Yehova isiku ni siku.—Yoswa 1.8; Salimo 1.2, 3.

• Choni cho tukalondiwanga Ibayibolo ilinji?

• Nkimba yo akulonda ukumanya ubwighane ubwa Chala abombaye ichoni?