Za

19 Buna Pilate wabonga Yezu mpe wamuwinda bisikoti. 2 Mpe binwani biayirika mpu ya nsende, bamutûla yo ku mutu, bamulwika tinkuti tia mbwaki ya ngolo, 3 bapusana kwe yandi mpe bamutêla: “Mbote, nge Mutinu wa Bayuda!” Bamuwinda mpe mbata ku tidiri. 4 Pilate wavutu duka ku mbazi mpe wabatêla: “Tala! Yandi nilunatinini ku mbazi ngatu lwazaba ti ka mbakiri’â musamu wu nimuzengela mambu ko.” 5 Buna Yezu waduka ku mbazi, na mpu ya nsende ku mutu mpe na tinkuti tia mbwaki ya ngolo. Mpe Pilate wabatêla: “Taleno bakala!” 6 Kâ mfumu za banganga-nzambi na mfumu za binwani bu bamumona, bakawula: “Mu tûla ha poto! Mu tûla ha poto!”* Pilate wabatêla: “Mu bongeno beno beni mpe mu hondeno, mu bungu ti ka mbakiri’â musamu wu nimuzengela mambu ko.” 7 Bayuda bamuvuturila: “Musiku wê neto, mpe tintwari na musiku wo, fweti fwa mu bungu ti tisiri yandi beni mwana wa Nzambi.”

8 Pilate bu kawâ misamu mi beri tâka, wayizi tomo vutu bâ na bunkuta bwabwingi, 9 wavutu kota mu nzo ya guvernere mpe watâ kwe Yezu: “Ntia kuma watûka?“ Kâ Yezu ka mu hana mvutu ko. 10 Buna Pilate wamutêla: “Ngano kala ta kala mu zonza na meno? Kuzebi’â ko ti lutumu lwe nani lwa ku yambula mpe lutumu lwe nani lwa ku honda?”* 11 Yezu wamuvuturila: “Ka waketi’â bâ na kani na lutumu mu meno ko tala ti ka bakuhana lo ko tûka ku zulu. Ntiangu muntu wukuntekele kwe nge, disumu diandi diyôkele bunene.”

12 Ntiangu Pilate keri tatamanaka mu dinga mpila yi kaketi mu yamburila. Kâ Bayuda bakawula: “Tala ti yamburi bakala di, buna nge ka wena ndiku ya Sezare ko. Muntu wawansoni wutisaka mutinu yandi beni, Sezare katelamanaka.” 13 Ha manima Pilate bu kawâ misamu mio, wanata Yezu ku mbazi, mpe wazakala ha chaise ya mfundusu, ha mbuka yi batâka Dalete ya Matari, kâ mu Ebre, Gabata. 14 Tilumbu tia Nkubukulu ya Pake tiabâ; kampe 12 heure yeri. Mpe watâ kwe Bayuda. “Taleno mutinu’eno!” 15 Kâ, bakawula: “Mu honda! Mu honda! Mu tûla ha poto!”* Pilate wabatêla: “Ngano nahonda mutinu’eno?” Mfumu za banganga-nzambi bavutula: “Ka twena na mutinu wakaka ko diambu’eti Sezare.” 16 Ha manima wamuhana ha moko mawu ngatu bamukanga ha poto.

Buna babonga Yezu mpe bamunata. 17 Bu keri kwe nati poto dia matimuna* yandi beni, wayenda ku mbuka yi batâka Mbuka ya tihisi tia mutu, yi batâka Golgota mu Ebre. 18 Kûna bamukoma ha poto na bantu bole bakaka, mosi ku lweka elu wakaka ku lweka lwakaka, na Yezu ha kati. 19 Pilate watsoneka mpe mwa musamu mpe watûla wo ha zulu poto dia matimuna.* Batsoneka: “Yezu Musi-Nazarete Mutinu wa Bayuda.” 20 Bayuda babingi batanga musamu wo, mu bungu ti mbuka yi bakomena Yezu ha poto pene-pene yabâ na mumvuka, mpe watsonama mu Ebre, mu Latin, na Mu Greke. 21 Kâ, mfumu za banganga-nzambi na Bayuda batâ kwe Pilate: “Kutsonekandi, ‘Mutinu wa Bayuda,’ Kâ tsoneka ti watâ, ‘Meno ni Mutinu wa Bayuda.’” 22 Pilate wavutula: “Mio mi ntsonekene mia nititsonekene.”

23 Binwani bu biakoma Yezu ha poto, babonga binkuti biandi bia zulu mpe bakaba bio mu bikunku biyà, muna tinwani tiabaka tikunku timosi, babonga mpe tinkuti tiandi tia ku nsi. Kâ tinkuti tiandi tia ku nsi ka tiabâ tia tungu ko, mulele kwa wabâ tûka ku zulu tii ku banda. 24 Buna batâ bawu na bawu: “Ka tutendandi tio, kâ bîkeno tabula madzeke mu zaba tia nani tibâ.” Wabêla bo ngatu matsonoko ema malungana: “Bakabana binkuti biani bawu na bawu, mpe baburila tinkuti tiani madzeke.” Buna binwani basila bo.

25 Nguri ya Yezu na mpangi ya yikento ya nguri’andi batelama pene-pene na poto dia matimuna* dia Yezu. Maria mukento wa Klopase na Maria Magdala ni kûna mpe babâ. 26 Buna Yezu bu kamona nguri’andi na mulongoki wu keri tomo zoloko batelama hâna, watâ kwe nguri’andi: “Mukento, tala mwana’aku!” 27 Ha manima watâ kwe mulongoki: “Tala nguri’aku!” Mpe tûka ntangu yîna, mulongoki wamubonga ku nzo’andi.

28 Ha manima ma misamu mio, Yezu bu kazaba ti misamu miamiansoni mialungana, mu lungisa matsonoko watâ: “Nsatu mamba ye nani.” 29 Yuki dimosi dieri hâna diafuluka mu vinu dia nsa. Buna babonga taba diafuluka mu vinu dia nsa di bakwika ha zulu muti wa izope* mpe bapusa dio ha munwa wa Yezu. 30 Bu kabimba vinu dia nsa Yezu watâ: “Wulungane!” Bu kakondamasa mutu, wafwa.*

31 Mu bungu ti tilumbu tia Nkubukulu tiabâ, Bayuda balomba kwe Pilate mu ba tiamuna malu na mu katula mvumbi, ngatu mvumbi ka zitatamanandi mu bâ ha mapoto ma matimuna mu tilumbu tia Sabala, (mu bungu ti Sabala yo ya yinene yeri). 32 Buna binwani biayiza mpe biatiamuna malu ma bakala dia ntete na ma bakala diakaka diabâ ha poto ha lweka lwa Yezu. 33 Kâ bu batula kwe Yezu bamona ti watifwila, buna ka bamutiamuna malu ko. 34 Kâ wumosi wa binwani wamutobola lweka lwa lubanzi na dionga, mpe mbala mosi menga na mamba maduka. 35 Mpe muntu wamona misamu mio watâ timbangi, timbangi tiandi tia matieleka tiena mpe zebi ti misamu mi kata tâ mia matieleka miena, ngatu beno mpe lwakwikila. 36 Diangana, misamu mio miatula ngatu matsonoko ema malungana: “Ka batiamuna na kani tihisi tiandi ko.” 37 Matsonoko makaka matâ: “Mbo batala muntu wu batobole.”

38 Ha manima ma misamu mio, Yozefe dia ku Arimate, wabâ mulongoki wa Yezu kâ mu mansweki mu bungu ti bunkuta bwa Bayuda bwabâ nandi, walomba kwe Pilate tala ti lendi bonga mvumbi ya Yezu, mpe Pilate wamuhana nswa. Buna Yozefe wayiza mpe wanata mvumbi ya Yezu. 39 Nikodeme, bakala diaye toko tala Yezu mu mpimpa, yandi mpe wayiza, wanata mire yi bavukasa na aloe, yabâ kampe 33 kilo.* 40 Buna babonga mvumbi ya Yezu mpe bazinga yo mu binkuti bia line na mananazi, buna bweri zikilaka Bayuda mvumbi zawu. 41 Pene-pene na mbuka yi bahondela Yezu,* nsaba yabâ kûna. Mpe ku nsaba yango, mpiema yabâ ko, yi balembo toko tûla muntu. 42 Mu bungu ti tilumbu tia Nkubukulu tia Bayuda tiabâ, mpe mpiema yo pene-pene yabâ, batûla Yezu kûna.