Bisalu bia Bantumwa
24 Bilumbu bitanu ha manima, mfumu-nganga-nzambi Ananiase wakôka na bakuluntu bakaka na nzonzi* yimosi yeri na nkumbu Tertuluse, mpe bafunda Paulo kwe guvernere. 2 Bu batâ mbila Paulo, Tertuluse wabatika mu mu funda, bu katâ:
“Mu bungu ti tidzunu tia tinene tie neto mu bungu dia nge, mpe mu bungu ti misamu mia ku matu talaka, ntomosono zita salama mu nsi yi, 3 buna Mfumu Felikse, tuzololo mu tomo ku vuturila matondo mu bungu dia misamu mio ntangu zazansoni na mu mbuka zazansoni. 4 Kâ mu lembo ku bonga ntangu yayingi, nikulombele mu mutima’aku wa mbote mu tu wirikila mwa ntangu. 5 Mu bungu ti tumweni ti bakala di timpumbulu tiena mpe vwandi katulumunaka ha kati dia Bayuda babansoni babêlaka ha mutoto wa mukaka, mpe ntwarisi yena ya tinzambi-nzambi tia Bisi-Nazarete. 6 Wayêlele mpe mu vweza tempelo, ntiangu tumukengi. 7* —— 8 Bu mu yula biyuvu, nge beni mbo mona ti misamu miamiansoni mi tuta mu fundila mia matieleka miena.”
9 Bayuda mpe bakota musamu wo, bu basingasa ti misamu mio mia matieleka miena. 10 Guvernere bu kalomba kwe Paulo mu zonza, wavutula:
“Ntomono zaba ti nge mfundisi ya kanda di yena tûka mvula zazingi, ntiangu ntamburi mu zonza me beni mu tinwanina. 11 Ntiana bu lendi wa taluzula nge beni, bilumbu 12 ka bieka’eti yôka ko tûka ti naneki ku Yerusaleme mu kwe sambila; 12 mpe ka bakumweni’â ko bu nabele bakanaka na muntu mu tempelo, peleko bu nabele kutakasaka bantu mu sa vwandi ni bu wubâ ku sinagoge peleko ku mumvuka. 13 Ka balendi’â mpe bakusongela ko ti misamu mi bata kunkwikisila mia matieleka miena. 14 Kâ musamu ewu nita tambula ha matu maku ti, ni mu landa nzila yi batêle tinzambi-nzambi nita sala tisalu tia santu kwe Nzambi ya nkaka zani, bu nikwikilaka misamu miamiansoni mie mu Musiku na mi batsoneka kwe Bambikuri. 15 Mpe tivuvu tie nani mu Nzambi, tivuvu ti kêlaka mpe bantu eba ti mbo kubâ mvumbukulu ya ba fwa ya bantu ba sungama na balembolo ba sungama. 16 Mu bungu dia musamu wo, ntangu zazansoni ngolo nisarilaka mu lunda ngindu ya mbote* ha matu ma Nzambi na ma bantu. 17 Bwawu bu, ha manima ma mvula zazingi zi nalembolo kwa bâ, nayiziri mu hana makabu ma bamputu kwe kanda diani na mu hana mikayulu. 18 Bu nabele yirikaka misamu mio, bayizi kumbwana mu tempelo wa tsema ntiana bu lombaka Musiku, kâ ka nakutakase’â bantu ko peleko ka natulumuni’â vwandi ko. Kâ Bayuda bakaka ba tizunga tia Azi babêle kûna 19 bafweti bâ hâ mu kumfunda ha matu maku tala ti nkatika musamu wubêle nawu na meno. 20 Peleko babakala bê hâ, batâ bawu beni ntia musamu wa mbi bamweni kwe meno bu natelamane ha matu ma Sanedre, 21 diambu’eti bakumfunda mu musamu ewu wa wumosi wu nakawula ha kati diawu: ‘Mu bungu dia tivuvu tia mvumbukulu ya ba fwa bata kumfundisila!’”
22 Kâ, Felikse watomo zaba misamu mitariri Nzila yo, wabalomba mu kâla tilumbu tiakaka mpe watâ: “Mbo nizenga musamu’eno bu kwiza Liziase, komanda ya binwani.” 23 Mpe wahana ntumunu ya lunda Paulo ku boloko, kâ bamuhana mwa timpwanza mpe bahana nzila kwe ndiku zandi mu kipa nsatu zandi.
24 Ha manima ma mwa bilumbu, Felikse wayiza na mukento’andi Drusila wabâ Muyuda. Watumisa Paulo mpe wamuwirikila bu keri zonzelaka timinu mu Yezu Kristo. 25 Kâ Paulo bu keri zonzelaka misamu mitariri buderede, tifu tia tiyimina na mfundusu yita kwiza, Felikse bunkuta bwamubaka mpe wavutula: “Lendi kwenda bwawu bu, kâ bu nibâ na ntangu mbo nivutu ku tumisa.” 26 Mu ntangu yîna kwa wabanza ti Paulo mbongo kaketi mu hana, ntiangu keri vulu mu tumisaka mpe keri zonzaka na yandi. 27 Kâ ha manima ma mvula zole, Porsiuse Festuse wayingasa Felikse; mpe mu bungu ti Felikse wazolo ti Bayuda bamutambula, wasisa Paulo ku bokolo.