Like

8 Ntangu fioti ha manima, Yezu wayenda mu mimvuka na mu mahata ma swaswana mu samuna na mu zonzela nsangu za mbote za Timfumu tia Nzambi, mpe ba 12 na yandi beri, 2 na bakento bakaka ba bakûla mu mpeve za mbi mpe ba bawasisa: Maria wu beri tâka Magdala, mpe wu badukisa demo 7; 3 Yoana, mukento wa Suza weri kipaka nzo ya Erode, Suzane na bakento bakaka babîngi beri sarilaka Yezu mu bima biabâ nawu.

4 Pôka dia bantu bu diavukana na bô batûka nandi mu mimvuka mia swaswana, wabazonzela mu nzila ya tifwani: 5 “Muntu wukunaka wudukiri mu kuna mbutu zandi. Bu kata kwe kuni, mbutu zakaka zibwiri ha ndeko nzila, badieti zo, mpe nuni za mazulu zidiri zo. 6 Zakaka zibwiri ha tari, zimenene mpe ziyumini mu bungu ti tiototo kâni. 7 Mbutu zakaka zibwiri ha kati dia nsende, nsende zikuriri ha timosi na miturila mpe zifietakase mio. 8 Kâ mbutu zakaka zibwiri ha mutoto wa mbote, mpe bu zimeni mena zibutiri mbutu yôka 100.” Bu kamanisa mu tâ misamu mio, watâ mu ngolo: “Bîka ti wô wê na makutu mu wâ, kawâ.”

9 Kâ milongoki miandi miamuyula nsasa ya tifwani tio. 10 Yezu watâ: “Beno lenda die neno dia bakula mansweki ma santu ma Timfumu tia Nzambi, kâ kwe bakaka bifwani kwa biena, mu bungu ti ni bu sa ti tala batalaka, ka bamonaka ko mpe wâ bawâka kâ ka babakulaka nsasa ko. 11 Nsasa ya tifwani ni eyi: Mbutu ni zu dia Nzambi. 12 Zo zibwiri mu ndeko nzila ni bantu bawîri zu dia Nzambi, ha manima Diabulu wiziri mpe katuri zu mu mitima miawu ngatu balembo kwikila mpe balembo vûka. 13 Zo zibwiri ha tari, ni bantu bawîri zu mpe batamburi dio na nsayi, kâ ka bena na midza ko. Buna bakwikiri mwa ntangu, kâ mu ntangu ya ntontolo ka basiri’â na lukwikulu ko. 14 Zo zibwiri ha kati dia nsende, ni bantu bawîri zu, kâ maniongo, bimvwama, na nsayi za luzingu bu zibanataka, zibafietakase mpe zisiri ti balembo yela. 15 Zo zibwiri ha mutoto wa mbote, ni bantu bo, bu bameni wâ zu mu mutima wa mbote na wa toma, balundiri dio mpe babutiri mbutu na luvivululu.

16 “Ka kwena muntu ko bu kameni namisa mwinda, yabikaka wo ndonga peleko tûlaka wo ku nsi’a mfulu, kâ ha zulu titûlulu tia mwinda katûlaka wo ngatu bô bakota bamona mutsamina. 17 Mu bungu ti ka kwena tima tia swekama ko tilembo kwizi zabakana, mpe ka kwena tima ti batomo sweka ko tilembo kwizi moneka, mpe ti balembo dzukula. 18 Buna seno keba mu mpila yi luwirikilaka, mu bungu ti wô têkela na tima mbo bamuyikila tima; kâ wô lembolo na tima, banza tio ti kata banza ti tie nandi mbo bamukatula tio.”

19 Ha manima, nguri’andi na mpangi zandi bayiza kwe yandi, kâ ka babâ na lenda ko dia pusana ha kabâ mu bungu dia pôka dia bantu. 20 Buna bamuhana nsangu: “Nguri’aku na mpangi zaku ku mbazi bena, wê nawu bakumona.” 21 Yandi wabavuturila: “Nguri’ani na mpangi zani ni bô bawâka zu dia Nzambi mpe basarilaka dio.”

22 Tilumbu timosi, yandi na milongoki miandi bakota mu bato, mpe wabatêla: “Tasabukeno ku simu diakaka dia mamba.” Buna bayenda. 23 Kâ bu beri kwe yende mu mamba, Yezu wayizi bwa tolo. Ha manima titembo tia ngolo tiabatika mu pûpa mu mamba, bato’awu yabatika mu fuluka mu mamba, mpe bayizi bâ mu mpasi. 24 Buna baye mu vumbula mpe batâ: “Mulongi, Mulongi, ntamana mbo tufwa!” Buna watelama, wabamina titembo na mamba meri nangukaka mu ngolo, biayizi lembama, mpe tidzunu tiakota. 25 Ha manima yandi wabatêla: “Ngano timinu tieno kwe tiena?” Kâ bunkuta bwabwingi bweri nawu, bayituku, mpe batâ bawu na bawu: “Muntu wu nani wena? Mu bungu ti bitembo na mamba kata tuma, mpe yandi bita tumamana.”

26 Batula ku tizunga tia Bisi-Geraza tie ku simu diakaka dia Galile. 27 Buna Yezu bu kakôka mu bato, bakala dimosi dieri na demo mu mumvuka wo diayizi mu bwana. Tûka ntama keri’â lwataka binkuti ko mpe keri’â bêlaka mu nzo ko, kâ ha kati dia mpiema. 28 Bu kamona Yezu, wakawula, wabwa ha matu mandi mpe watâ mu zu dia ngolo: “Ntia musamu wê nani na nge Yezu Mwana wa Nzambi Yatomo Zangama? Mulemvo’aku, kunkwamisandi!” 29 (Mu bungu ti Yezu watuma mpeve yo ya mbi mu duka mu bakala dio. Mbala zazingi yeri mu kotaka,* bantu chaîne beri vulu mu kangaka mu moko na malu, mpe kêla beri mu kêlaka. Kâ chaîne keri tabulaka, mpe demo mu mbuka za hengama yeri mu nataka.) 30 Yezu wamuyula: “Nkumbu’aku nani?” Demo yatâ: “Mukangu,” mu bungu ti demo zazingi zakota mu bakala dio. 31 Mpe batatamana mu mu lemberela ngatu ka ba lombandi benda mu bulu dia dila. 32 Twila dia dinene dia ngulu dieri diaka ku mongo, buna bamulomba ka bahana nzila mu kota mu ngulu, mpe wabahana nzila. 33 Dieka bo demo zo zaduka mu bakala dio, zayenda mu ngulu, mpe twila diadiansoni diatilosa mu mamba tûka ku zulu mpe diayambuka. 34 Kâ bantu beri kêlaka ngulu bu bamona musamu watula, badioka mpe baye wa zonzela ku mumvuka na ku mahata meri pene-pene.

35 Buna bantu baduka mu tala musamu watula. Bayiza kwe Yezu, mpe bamona bakala di badukisa demo wazakala ha malu ma Yezu na binkuti mpe mabanza ma sungama meri nandi. Dieka bo bunkuta bwababaka. 36 Bô bamona misamu miatula, babatêla bwe bakala diabâ na demo diawasila. 37 Ha manima bantu babingi ba tizunga tia Bisi-Geraza batêla Yezu mu kwenda mala na bawu mu bungu ti bunkuta bwabwingi bwababaka. Buna wakota mu bato mpe wayenda. 38 Kâ bakala di badukisa demo diatatamana mu mu lemberela ngatu kenda nandi, kâ Yezu wamukarisa bu katâ: 39 “Kâla ku nzo’aku, mpe tatamana mu zonzela misamu mi yirikiri Nzambi mu nge.” Buna wayenda, mpe wasamuna misamu mia yirika Yezu mu yandi ku mumvuka wawansoni.

40 Yezu bu kakâla, yungi dia bantu diamubwana na nsayi, mu bungu ti babansoni yandi beri kêlaka. 41 Kâ tala! Bakala dimosi dieri na nkumbu Zayiruse, dieri ntwarisi mu sinagoge, diayiza. Wabwa ha malu ma Yezu mpe wabatika mu mu lemberela mu kwiza mu nzo’andi, 42 mu bungu ti mwana’andi wa wumosi wa wukento weri na mvula kampe 12, fwa keri fwaka.

Yezu bu keri kwe yende, pôka dia bantu yandi dieri fietakasaka. 43 Mpe mukento wumosi weri hâna weri dukaka menga tûka mvula 12, mpe muntu kâni walenda mu mu wasisa. 44 Wapusana ha manima mandi, mpe wasimba nsongi ya tinkuti tiandi tia zulu, mpe hô nkatika bendo menga mandi ka meri’â vutu dukaka ko. 45 Buna Yezu watâ: “Nani kunsimbiri?” Babansoni bu beri kalaka, Piere watâ: “Mulongi, pôka dia bantu dikuzungiriri mpe dita ku fietakasa” 46 Kâ Yezu watâ: “Muntu kunsimbiri mu bungu ti nzebi ti ngolo zikundukiri.” 47 Mukento wo bu kamona ti musamu’andi wuzabakane, wapusana mu tintekoto, wafukama ha matu mandi mpe watâ ha meso ma bantu babansoni mu bungu dia nti kasimbila tinkuti tiandi mpe bwe kawasila mbala mosi. 48 Kâ Yezu wamutêla: “Mwana’ani timinu tiaku tikuwasisi. Yenda mu tidzunu.”

49 Ka timanisina ko mu zonza, muntu wumosi watûka mu nzo ya ntwarisi ya sinagoge wayiza mpe watâ: “Mwana’aku wa wukento wufwiri, kuvutuandi kwamisa Mulongi.” 50 Bu kawâ bo, Yezu wamuvuturila: “Kubândi na bunkuta, bâ kwa na timinu, mpe mbo kavûka.” 51 Bu katula ku nzo ka bîka na kani muntu ko kakota na yandi, kâ Piere kwa, Za, Zaki, tata na nguri ya mwana mukento wo. 52 Kâ bantu babansoni dila beri dilaka mpe ntulu beri bulaka mu tiari mu bungu dia yandi. Buna Yezu watâ: “Bîkeno mu dila, mu bungu ti ka fwiri’â ko kâ tolo kata bwa.” 53 Buna babatika mu mu sehesela, mu bungu ti bazaba ti wafwa. 54 Kâ wamusimba koko, mpe wamutêla: “Mwana, telama!” 55 Mpeve’andi* yakâla, hô nkatika bendo watelama, mpe Yezu walomba bamuhana tima tia dia. 56 Bibuti biandi biafuluka mu nsayi, kâ wabalomba mu lembo tâ musamu watula kwe muntu.