Za

11 Bakala dimosi diabâ na nkumbu Lazare dieri na timbevo; Musi-Betani wabâ, hata dia Maria na yaya’andi Marte. 2 Ni Maria dio diatsamuna mafuta kwe Mfumu mpe diakusuna malu mandi mu nsuki zandi; ni nkazi’andi Lazare wabâ na timbevo. 3 Buna bibusi biandi biatambika nsangu kwe Yezu, batâ: “Mfumu, yandi wu zololo timbevo tie nandi.” 4 Kâ Yezu bu kawâ nsangu zo watâ: “Timbevo tio ka tinata ku lufwa ko, kâ ni mu bungu dia mukembo wa Nzambi, ngatu Mwana wa Nzambi wakemboso mu nzila ya timbevo tio.”

5 Diangana Yezu wazolo Marte, na mpangi’andi mpe na Lazare. 6 Kâ bu kawâ ti Lazare timbevo tiabâ nandi, Yezu wavutu yôkesa bilumbu biole ku mbuka yi keri. 7 Ha manima, watâ kwe milongoki miandi: “Tavutueno kwenda ku Yude.” 8 Milongoki miamutêla: “Rabi, ka ntama ko Bisi-Yude badingiri mu ku winda matari, kâ ni kô ta vutu kwenda?” 9 Yezu wavutula: “Bwisi bwa tia 12 heure buyôkesaka mu tilumbu, ka buna ko? Tala ti muntu mwendo kata kwe yende bwisi bu bwatiri bwa tia, ka tâ na kani kuba ko, mu bungu ti mutsamina wa nza yi kata mona. 10 Kâ tala ti muntu mu mpimpa kata kwe yende, mbo kata kuba, mu bungu ti kena na mutsamina ko mu yandi.”

11 Bu kamana tâ misamu mio, wavutu tâ: “Lazare ndiku’eto bwiri tolo, kâ kûna nita kwenda mu mu vumbula.” 12 Buna milongoki miamutêla: “Mfumu, tala ti tolo kata bwa, mbo ka wasa.” 13 Diangana Yezu lufwa lwandi keri zonzelaka. Kâ bawu babanzaka ti ebu keri zolo tâka ti Lazare huma kata huma bu kata bwa tolo. 14 Buna Yezu watomo ba zabikisa: “Lazare fwiri, 15 mpe ndiangalale mu bungu dia beno bu ndembolo bâ kûna, ngatu lwakwikila. Kâ twendieno kwe yandi.” 16 Buna Toma, wu beri tâka Dipasa, watâ kwe milongoki miakaka: “Beto mpe twendieno, ngatu tafwa na yandi.”

17 Yezu bu katula, wamona ti batitûrila Lazare mu mpiema tûka bilumbu biyà. 18 Betani pene-pene yabâ na Yerusaleme, ha titini tia kilometre kampe zitatu.* 19 Mpe Bayuda babingi bayiza kwe Marte na Maria mu ba bomba mu bungu dia nkazi’awu. 20 Marte bu kawâ ti Yezu mwizu keri kwizaka, waye mu bwana; kâ Maria wasala zakale ku nzo. 21 Buna Marte watâ kwe Yezu: “Mfumu, tala ti kû wabêle, nkazi’ani ka keti’â fwa ko. 22 Kâ ni bu sa ti bwawu bu, nzebi ti tima ni tima ti lomba kwe Nzambi, Nzambi mbo kakuhana tio.” 23 Yezu wamutêla: “Nkazi’aku mbo kavumbuka.” 24 Marte wamutêla: “Nzebi ti mbo kavumbuka ku mvumbukulu ya ba fwa mu tilumbu tia mansukina.” 25 Yezu wamutêla: “Meno ni mvumbukulu ya ba fwa na luzingu. Wô sarila timinu mu meno, ni bu sa ti fwiri, mbo kavutu baka luzingu; 26 mpe muntu wa moyo wusarilaka timinu mu meno, kani kabwe ka fwa ko. Ngano wa ta kwikila?” 27 Yandi wamutêla: “Yee Mfumu, kwikila nikwikilaka ti nge ni Kristo, Mwana wa Nzambi, wô ta kwiza mu nza.” 28 Marte bu kamana tâ misamu mio, wayenda mpe watâ mbila mpangi’andi Maria, wamutêla ha bawu kaka: “Mulongi kû kena, mpe nge kata tâ mbila.” 29 Bu kawâ bo, watelama na manzangu mpe waye mu monekena.

30 Yezu ka tikotela ku hata ko, kâ ha mbuka kwa Marte yi kamubwana keri. 31 Bayuda beri bombaka Maria mu nzo, bu bamona ti watelama na manzangu mpe waduka, bamulanda, mu bungu ti ebu beri banzaka ti ha mpiema kaye dila. 32 Maria bu katula ha mbuka yabâ Yezu mpe bu kamumona, wabwa ha malu mandi mpe wamutêla: “Mfumu, tala ti kû wabêle, nkazi’ani ka keti’â fwa ko.” 33 Yezu bu kamona ti dila keri dilaka, mpe Bayuda bayiza na yandi dila beri dilaka, watomo mona mpasi ku mutima* mpe tiari tiatomo mu baka. 34 Watâ: “Kwe lumutûriri?” Bamutêla: “Mfumu, yiza tala.” 35 Yezu wadila. 36 Buna Bayuda babatika mu tâ: “Taleno, nguria luzolo lwabêle nandi mu yandi!” 37 Kâ bakaka mu bawu batâ: “Yandi wazibula meso ma muntu wafwa meso, ngano ka keti’â lenda ko mu kabakasa lufwa lwa Lazare?”

38 Buna Yezu, bu kamana vutu mona mpasi ku mutima, wayenda ku mpiema. Grote yabâ, mpe tari bazibika yo. 39 Yezu watâ: “Katuleno tari.” Marte, tibusi tia wô wafwa, wamutêla: “Mfumu, fweti nuka nsunga bola bwawu bu, mu bungu ti bilumbu biyà keka yôkesa.” 40 Yezu wamutêla: “Ngano ka nikutêlele’â ko ti tala ti kwikiri mbo mona mukembo wa Nzambi?” 41 Buna bakatula tari. Ha manima Yezu wananguna meso ku zulu mpe watâ: “Tata nikutondele bu kungwirikiri. 42 Wa matieleka, nzebi ti meno wirikilaka ntangu zazansoni; kâ mu bungu dia pôka dia bantu ditelamane hâ nita zonza, ngatu bakwikila ti ni nge wakuntambika.” 43 Bu kamana tâ misamu mio, wakawula mu zu dia ngolo: “Lazare, duka!” 44 Bakala dio diafwa diaduka, moko na malu ma kangama mu bitenda, mpe tidiri tiandi tia yabama mu mulele. Yezu wabatêla: “Mu sutuleno mpe mu bîkeno kenda.”

45 Bayuda babingi bayiza tintwari na Maria mpe bamona musamu wu kayirika, batûla timinu mu yandi, 46 kâ bakaka mu bawu bayenda kwe Bafarize mpe babatêla misamu mia yirika Yezu. 47 Buna mfumu za banganga-nzambi na Bafarize bakutakasa Sanedre mpe batâ: “Nti tufweti sa, mu bungu ti muntu wu bimangu biabingi kata sa? 48 Tala ti tumubîkiri katatamana bo, bantu babansoni mbo batûla timinu mu yandi, Bisi-Rome mbo bakwiza mpe mbo batukatula tibuka* tieto na nsi’eto.” 49 Kâ wumosi mu bawu, Kayife, wabâ mfumu-nganga-nzambi muvu wo, wabatêla: “Ka luzebi’â na kani tima ko, 50 mpe ka lubakuri’â ko ti bubote bwena mu bungu dia beno ti muntu wumosi wafwa mu bungu dia kanda, na bu bafukisi nsi yayansoni.” 51 Misamu mi katâ ka miatûka kwe yandi beni ko, kâ mu bungu ti mfumu-nganga-nzambi kabâ muvu wo, bikula keri bikulaka ti Yezu wafweti fwa mu bungu dia Bayuda, 52 ka mu bungu dia Bayuda ko kwa, kâ mpe mu bungu dia bala ba Nzambi babâ ba mwangana, ngatu babakutakasa mu bumosi. 53 Buna, tûka tilumbu tîna bawisana mu mu honda.

54 Ntiangu Yezu keri lembo vutu kwe yende ha meso ma Bayuda, kâ wakatuka kûna mu kwenda ku tizunga tiabâ pene-pene na sese,* ku mumvuka wu beri tâka Efrayime, mpe watatamana mu bâ kûna na milongoki miandi. 55 Pake ya Bayuda yayizi bâ pene-pene, mpe bantu babingi batûka ku mahata mabâ pene-pene bayiza ku Yerusaleme ntete Pake, ngatu batitsemesa tintwari na Musiku. 56 Yezu beri dingaka, mpe ebu beri tâka bawu na bawu bu batelama mu tempelo: “Ngano bwe luta banza? Wa matieleka ka kwiza ku malaki ko?” 57 Kâ mfumu za banganga-nzambi na Bafarize bahana ntumunu eyi: tala ti muntu zebi mbuka ye Yezu, fweti hana nsangu zo, ngatu bamubwila.*