Za

14 “Mitima mieno ka mibândi na lwaka. Sarileno timinu mu Nzambi; sarileno mpe timinu mu meno. 2 Mu nzo ya Tata’ani bibuka bia bêla biabingi bie mô. Tala ti ka wabêla buna ko, mbo naketi wa lu têla, mu bungu ti ndieka kwenda mu lu kubikila tibuka. 3 Musamu wakaka, tala ti mwendo nita kwenda mu lu kubikila tibuka, mbo nivutu kwiza mpe mbo nilubwana mu nzo’ani, ngatu kô ku nibâ, beno mpe lwabâ kô. 4 Mpe kô ku nita kwenda, nzila ya luzebi.”

5 Toma wamutêla: “Mfumu, kuma ku ta kwenda ka tuzebi’â kô ko. Bwe tulendi zabila nzila?”

6 Yezu wamutêla: “Meno ni nzila, matieleka na luzingu. Muntu kâni lendi kwenda kwe Tata tala ti ka mu nzila ya meno’â ko. 7 Tala ti meno lwazaba, mbo lwaketi zaba mpe Tata’ani; bwawu bu Yandi luzebi mpe Yandi lumweni.”

8 Filipe wamutêla: “Mfumu, tu songela Tata, mpe mbo wutufwana.”

9 Yezu wamutêla: “Ntono ntangu yayingi yi ndieka na beno, Filipe, ka weka’eti kunzaba ko? Wô ku mweni, mweni mpe Tata. Mu bwe ta têla, ‘Tu songela Tata’? 10 Ngano kuta kwikila ko ti mu bumosi ndiena na Tata mpe Tata mu bumosi kena na meno? Misamu mi nilutêlaka ka mitûkaka kwe me beni ko, kâ Tata wê mu bumosi na meno ni Yandi salaka bisalu biandi. 11 Kunkwikileno bu nita tâ ti mu bumosi ndiena na Tata mpe Tata mu bumosi kena na meno; tala ti kâni, kwikileno mu bungu dia bisalu biawu beni. 12 Nkatika matieleka nita lu têla, wô sarila timinu mu meno, mbo kasala mpe bisalu bi nita sala; mpe mbo kasala bisalu yôka biawu bi, mu bungu ti kwe Tata nita kwenda. 13 Musamu wakaka, tima ni tima ti lulomba mu nkumbu ya meno, mbo niyirika tio, ngatu Tata kakemboso mu nzila ya Mwana. 14 Tala ti lulombele tima mu nkumbu’ani, mbo niyirika tio.

15 “Tala ti meno luzololo, mbo lusarila ntumunu zani. 16 Mbo nilomba kwe Tata mpe mbo kaluhana tibakisi* tibâ neno ntangu zazansoni, 17 mpeve ya matieleka yilendi lembo baka nza, mu bungu ti nza ka yimonaka yo ko mpe ka yizebi’â yo ko. Kâ beno mpeve ya luzebi, mu bungu ti na beno yena mpe mu beno yena. 18 Ka nilusisa beno kaka* ko, mbo nikâla kwe beno. 19 Ntangu fioti, nza ka yivutu’â ku mona ko, kâ beno mbo lukumona, mu bungu ti wa moyo ndiena mpe beno mbo lubâ ba moyo. 20 Mu tilumbu tîna, mbo luzaba ti mu bumosi ndiena na Tata, mpe beno mu bumosi lwena na meno, mpe meno mu bumosi ndiena na beno. 21 Wô tambula ntumunu zani mpe sarila zo ni yandi wûna kunzololo. Wô kunzololo, Tata mpe mbo kamuzolo, meno mbo nimuzolo, mpe mbo nitomo timonekesa kwe yandi.”

22 Yuda, ka dia Iskariote’â ko, wamutêla: “Mfumu, nti bituriri ngatu wazolo mu tomo timonekesa kwe beto, kâ ka kwe nza ko?”

23 Yezu wamuvuturila: “Tala ti muntu kunzololo, mbo kasarila zu diani, Tata mbo kamuzolo, mpe mbo tukwiza kwe yandi mpe mbo tutûla tibuka tieto tia bêla kwe yandi. 24 Wô lembolo kunzolo, ka sarilaka zu diani ko. Zu di luta wâ ka diena dia meno ko, kâ Tata wakuntambika ni Yandi vwiri dio.

25 “Misamu mio nilutêlele bu natiri na beno. 26 Kâ, tibakisi, mpeve santu, ti lu tambikila Tata mu nkumbu’ani, yandi mbo kalulongesa misamu miamiansoni, mpe mbo kalubambula misamu miamiansoni mi nilutêlele. 27 Tidzunu nita lu sisila; tidzunu tiani nita lu hana. Ka nita tia lu hana ko ntiana bu haninaka tio nza. Mitima mieno ka mibândi na lwaka, mpe ka minôkandi mu bunkuta. 28 Lwawîri bu nalutêlele ti, ‘Ndieka kwenda mpe mbo nikâla kwe beno.’ Tala ti meno luzololo, mbo luketi yangalala bu nita kwenda kwe Tata, mu bungu ti Tata kundiôkele. 29 Mpe bwawu bu nilutêlele wo ntete watula, ngatu lwakwikila bu wutula. 30 Ka nivutu’â zonza kwakwingi na beno ko, mu bungu ti mfumu ya nza ni yandi wo, mpe kena na lutumu mu meno ko.* 31 Kâ, ngatu nza yazaba ti meno Tata nzololo, misamu nita yirika buna Tata bu kakuntumina mio. Telameno, takatukeno kû.