Bisalu bia Bantumwa
2 Mu tilumbu tia malaki ma Pentekote, babansoni tintwari beri mu mbuka yimosi. 2 Mu ta-pulukusu, kwa yizi bâ lwaza lwatûka ku zulu, lwabâ ntiana lwaza lwa titembo tia ngolo, mpe lwaza lwango lwafulusa nzo yi babâ ba zakala. 3 Mpe tudimi mu tifwani tia tiya twayizi moneka kwe bawu, twakabana mpe twaye tensama kwe muna muntu mu bawu, 4 babansoni bafuluka mu mpeve santu, mpe babatika mu zonza mu mazu ma swaswana, buna kwa mpeve bu yeri ba haninaka lenda mu zonza.
5 Mu ntangu yîna, Bayuda beri tomo zitisaka Nzambi, batûka mu nsi zazansoni za ha mutoto, ku Yerusaleme beri bêlaka. 6 Buna lwaza lo bu lwawakana, pôka dia bantu diakutakana. Babansoni bayituku mu bungu ti muna muntu bawu keri wâka bu beri zonzaka mu zu diandi. 7 Diangana batomo yituku mpe batâ: “Tala, babansoni eba bata zonza ngano ka bena Bisi-Galile ko? 8 Buna mu ntia mpila muna muntu mu beto kata wîla zu diandi dia mbutukulu?* 9 Bisi-Parte, Bamede, Bisi-Elame, bantu babêlaka ku Mezopotami, ku Yude na ku Kapadose, ku Ponti na ku tizunga tia Azi, 10 ku Frizi na ku Pamfili, ku Ezipte na ku bizunga bia Libi pene-pene na Sirene, bantu bê kû batûkiri ku Rome, Bayuda na banzenza batambula dibundu dia Bayuda, 11 Bisi-Krete na Ba-Arabe—beto bansoni mu mazu meto tuta ba wâ bu bata zonzela misamu mia toma mia Nzambi.” 12 Yee, babansoni bayituku, mpe mabanza yeko-yeko mabâ nawu bu beri tâka bawu na bawu: “Musamu wu bwe wuta zolo tâ?” 13 Kâ bakaka bawu beri seheselaka bu beri tâka: “Ba fuluka bena mu vinu dia sukari.”*
14 Kâ Pierre watelama tintwari na ba 11, mpe watâ mu zu dia ngolo: “Babakala ba ku Yude na beno bansoni lubâka ku Yerusaleme, zabeno musamu ewu, mpe tomoeno wirikila misamu mi nilutêla. 15 Diangana, bantu ba ka banwini’â malavu ko ntiana bu luta wa banza, mu bungu ti kampe yeka 9 heure. 16 Kâ, misamu mita yilama ni mio mi batâ mu nzila ya mbikuri Yoele: 17 ‘Nzambi têle, “Mpe mu bilumbu bia mansukina mbo nihombola lweka lwa mpeve’ani kwe bantu ba mpila zazansoni, mpe bala beno ba babakala na ba bakento mbo babikula, ntwenia zeno za zibakala mbo zibâ na bimona-meso mpe bibunda bieno mbo biloto ndozi, 18 mbo nihombola mpe lweka lwa mpeve’ani mu bilumbu bio kwe ngamba zani za zikento na za zibakala, mpe mbo babikula. 19 Mbo nisa bimangu ku zulu na bidimbu ku nsi ha mutoto. Mbo kubâ menga, tiya na matuti ma mwisi. 20 Ntangu mbo yitituka mpimpa, mpe ngonda mbo yitituka menga, ntete tilumbu tia Yehova* tia tinene na tia mukembo tiatula. 21 Mpe muntu ni muntu wubingula nkumbu ya Yehova* mbo kavûka.”’
22 “Babakala ba ku Israele, wêno misamu emi: Yezu Musi-Nazarete muntu weri Nzambi wu kasongela kwe beno bansoni mu nzila ya bisalu bia ngolo, ya bimangu na ya bidimbu Nzambi bi kasa mu nzila ya yandi ha kati dieno, ntiana bu luzebi wo beno beni. 23 Bakala dio di bateka, tintwari na luzolo lwa Nzambi na lenda diandi dia tizabila misamu, lwamutûla ha poto ha moko ma bantu bavwezaka Musiku, mpe lwamuhonda. 24 Kâ Nzambi wamuvumbula kwe ba fwa, bu kamukûla mu mpasi* za lufwa, mu bungu ti lufwa ka lwaketi’â mu simbirila ko. 25 Diangana Davide watâ mu yandi: ‘Ntangu zazansoni Yehova nitûlaka ha matu mani, mu bungu ti ku koko kwani kwa lubakala kena, kani kabwe ka niteketa ko. 26 Ntiangu mutima’ani wê mu nsayi, mpe ludimi lwani lutomono yangalala. Mpe mbo nibâ* mu tivuvu; 27 mu bungu ti kundiambirika* mu Ndiamu ko,* mpe kubîka muntu’aku wa kwikama ko kabola. 28 Wakunzabikisi nzila za luzingu; mbo kumfulusa mu nsayi yayingi ha matu maku.’*
29 “Babakala, bampangi, kunganeno nzila ya lu zonzela mfumu-kanda Davide mu bunsungu, wafwa, bamuzika, mpe mpiema’andi ha kati dieto kwa yatiri tii lumbu ti. 30 Mu bungu ti mbikuri yeri mpe wazaba ti Nzambi wamusila kani bu kadia ndefi ya zakasa wumosi wa bala bandi ha muyâlu’andi, 31 watimwina mvumbukulu ya Kristo kwe ba fwa mpe wazonzela wo, bu katâ ti ka bamuyambirika mu Ndiamu* ko, mpe nitu’andi ka yabola ko. 32 Yezu dio, Nzambi wamuvumbula kwe ba fwa, mpe beto bansoni mbangi zena za musamu wo. 33 Buna, mu bungu ti bamuzanguri ku koko kwa lubakala kwa Nzambi, mpe wabakiri kwe Tata mpeve santu yi bamukanisina, wahombole mi mi luta mona na mi luta wâ. 34 Mu bungu ti Davide ka naka ku zulu ko, kâ yandi beni têle, ‘Yehova têle kwe Mfumu’ani: “Zakala ku koko kwani kwa lubakala 35 tii bu nitûla mbeni zaku ku nsi’a malu maku.”’ 36 Buna, bîka ti kanda diadiansoni dia Israele diazaba na lukwikulu ti Nzambi wamutûriri Mfumu na Kristo, Yezu dio di lwakomene ha poto.”
37 Bu bawâ bo, mitima miawu mialwala, mpe batâ kwe Piere na kwe ntumwa zakaka: “Babakala, bampangi, nti tufweti sa?” 38 Piere wabatêla: “Sobeno mabanza, mpe bîkeno ti muna muntu mu beno kabatusu mu nkumbu ya Yezu Kristo mu bungu dia mulemvo wa masumu meno, mpe mbo lubaka kabu dia mpamba dia mpeve santu. 39 Mu bungu ti kani dia beno diena na bala beno, dia bô babansoni bê mala, mpe dia bô babansoni Yehova* Nzambi’eto ba katâ mbila kwe Yandi.” 40 Mu nzila ya misamu miakaka, timbangi tia lunga keri tâka, mpe bawu keri tindisaka bu keri tâka: “Tivûkiseno mu mbandu yi ya tengama.” 41 Buna, bô batambula nsangu zandi na nsayi bayizi batusu, mpe mu tilumbu tîna kampe bantu* 3 000 bayikama mu lutangu lwa milongoki. 42 Mpe batatamana mu landa ndongosolo ya bantumwa na bunsungu, mu kutakana tintwari,* mu dia na mu sambila.
43 Diangana, bantu babansoni* mu bunkuta beri, mpe bantumwa bimangu na bidimbu biabingi beri saka. 44 Bô babansoni bayizi kwikila tintwari beri, mpe bima biabiansoni ha mbuka yimosi beri bia tûlaka, 45 bima biawu na bimvwama biawu beri tekaka, mpe mbongo zi beri bakaka beri kabaka kwe bantu babansoni, muna muntu tintwari na nsatu zandi. 46 Mpe lumbu basiri lumbu ku tempelo beri kutakanaka na mabanza mamosi, mu nzo za swaswana beri dîlaka, mpe bidia biawu beri kabaka na nsayi yayingi mpe na bunsungu bwa mutima, 47 bu beri kembelaka Nzambi mpe bantu babansoni bu beri ba tambulaka. Mu ntangu yo, Yehova* bantu bavûka keri ba yikilaka bilumbu biabiansoni.