Bisalu bia Bantumwa
3 Tilumbu timosi, Piere na Za ku tempelo beri nakaka mu ntangu ya lusambulu, kampe ku ba 15 heure, 2 mpe muntu wafwa binama tûka mbutukulu’andi beri nataka. Bilumbu biabiansoni, pene-pene na mwelo wa tempelo wu beri tâka nkumbu Wa toma beri mu tûlaka ngatu kalomba makabu kwe bô beri kotaka mu tempelo. 3 Bu kamona Piere na Za beri dingaka mu kota mu tempelo, wabatika mu ba lomba makabu. 4 Kâ Piere na Za bamutala mu meso, mpe Piere wamutêla: “Tu tala.” 5 Buna watomo ba sungamana bu keri kêlaka ti bamuhana tima. 6 Kâ Piere watâ: “Ka ndiena na arza na ore ko, kâ tio tie nani ni tio nikuhana. Mu nkumbu ya Yezu Kristo Musi-Nazarete, yenda yende!” 7 Mpe bu kamusimba mu koko kwa lubakala, wamutelamasa. Hô nkatika bendo malu mandi na ntambi zandi biasikama; 8 mpe bu keri kwe dumuzuki mu malu mandi, wabatika mu kwe yende mpe wakota na bawu mu tempelo. Mwendo keri kwe yende, dumuzuka keri kwe dumuzuki mpe Nzambi keri kwe kembele. 9 Mpe bantu babansoni bamumona bu keri kwe yende na bu keri kwe kembele Nzambi. 10 Bantu bazaba ti ni bakala dio dieri vulu zakalaka ha Mwelo Wa toma wa tempelo mu kêla makabu. Bayizi tomo yituku mpe bafuluka mu nsayi mu bungu dia musamu wamuturila.
11 Muntu wango bu weri simbirilaka Piere na Za, bantu babansoni badioka kwe bawu ku mbuka yi batâka Veranda ya Salomo; babansoni batomo yituku. 12 Piere bu kamona bo, watâ kwe bantu: “Babakala ba Israele, mu bungu dia nti luta yitukulu mu musamu wu, mpe mu bungu dia nti luta tu sungamana ntiana’eti ni mu ngolo za beto beni peleko mu bungu dia kangama kweto kwe Nzambi tusiri ti kê yende? 13 Nzambi ya Abrahame, ya Izake na ya Yakobe, Nzambi ya nkaka zeno, wazanguri Tisari tiandi, Yezu, wu lwatekele na wu lwakariri ha matu ma Pilate, ni bu sa ti yandi wabongele nzengolo ya mu yambula. 14 Yee, lwakariri muntu wa santu na wa sungama, mpe lwalombele baluhana muntu wuhondaka bantu, 15 mpe lwahondele Mfumu ya luzingu. Kâ Nzambi wamuvumburi kwe ba fwa; musamu wena wu twe mbangi beto bansoni. 16 Mpe ni mu nzila ya nkumbu’andi na timinu tieto mu nkumbu’andi, bakala di di luta mona na di luzebi kizi bâ na ngolo. Ni timinu tieto mu yandi tisiri ti bakala di die ha matu meto katomo wasa. 17 Mpe bwawu bu, bampangi, nzebi ti ni mu kondo kwa zaba lwayirikiri misamu, ntiana kwa bwa sa mfumu zeno mpe. 18 Kâ mu mpila yo, Nzambi walungisi misamu mi katibikurila mu munwa wa mbikuri zazansoni, ti Kristo wafweti mona mpasi.
19 “Buna sobeno mabanza mpe vutukeno, ngatu masumu meno mafwasuka, ngatu ntangu za tidzunu zatûka kwe Yehova yandi beni* 20 mpe katambika Kristo di kasôla mu bungu dia beno, Yezu. 21 Yezu dio, zulu difweti mu kengerela tii ntangu Nzambi yi kakarisa bima biabiansoni bia môna, ntiana bu katâ wo mu munwa wa mbikuri zandi za santu za ntama. 22 Diangana, Mose watâ: ‘Yehova* Nzambi’eno mbo katelamasa mu bungu dia beno, ha kati dia mpangi zeno mbikuri ntiana meno. Lufweti wirikila mio miamiansoni mi kalutêla. 23 Diangana, muntu ni muntu* wulembo wirikila Mbikuri yo mbo batomo mu fukisa ha kati dia kanda.’ 24 Mpe mbikuri zazansoni tûka Samwele na bô bayiza ha manima mandi, bô babansoni bazonza, batomo samuna bilumbu bi. 25 Beno bala ba mbikuri lwena na ba luwawanu lwa sa Nzambi na nkaka zeno bu katâ kwe Abrahame: ‘Mpe mu nzila ya bala* baku, makanda mamansoni me ha mutoto mbo mabaka lusakumunu.’ 26 Bu kamana telamasa Tisari tiandi, Nzambi watoko mu tambika kwe beno mu lu sakumuna, bu kakatula mosi na mosi mu beno mu nsalulu zeno za mbi.”