Bisalu bia Bantumwa

4 Ba bole bu beri zonzaka kwe bantu, banganga-nzambi, kapitene ya tempelo, na Basaduseye bayiza kwe bawu mu ta-pulukusu. 2 Mutima mpasi beri monaka mu bungu ti bantumwa bantu beri longesaka, mpe bawu beri tomo zonzelaka mvumbukulu ya Yezu kwe ba fwa.* 3 Buna babakanga mpe babatûla ku boloko tii mu tilumbu tialanda, mu bungu ti nkokela yatiturila. 4 Kâ, babîngi mu bô bawâ tinzonzi bakwikila, mpe lutangu lwa babakala lwayizi bâ kampe lwa 5 000.

5 Tilumbu tialanda, bamfumu, bakuluntu, na bitsoniki bakutakana ku Yerusaleme, 6 tintwari na Ane mfumu ya banganga-nzambi, na Kayife, na Za, na Alekisandere, mpe na bantu babansoni beri mu kanda dia mfumu ya banganga-nzambi. 7 Batelamasa Piere na Za ha kati diawu mpe babatika mu ba yula: “Mu ntia lutumu peleko mu nkumbu ya nani lusiriri bo?” 8 Buna Piere, wa fuluka mu mpeve santu, wabatêla:

“Mfumu za makanda na bakuluntu, 9 tala ti mu bungu dia musamu wa mbote wu bayirikiri kwe muntu wafwa binama bata tu fundisila lumbu ti, mpe luzololo mu zaba mu ntia mpila kawasiriri, 10 bîka ti beno bansoni mpe kanda diadiansoni dia Israele diazaba ti ni mu nkumbu ya Yezu Kristo, Musi-Nazarete, wu lwakomene ha poto, mpe Nzambi wu kavumburi kwe ba fwa, ni mu nzila ya yandi bakala di katelamane hâ ha matu meno wa wasa. 11 Yezu dio, ni yandi ‘tari di lwalosele beno bitungi bia nzo, diayikiri tari di sikamanaka nzo.’ 12 Musamu wakaka, ka kwena mvukulu mu muntu wakaka ko, mu bungu ti ka kwena nkumbu yakaka ko ku nsi’a zulu yi bahana kwe bantu yi tufweti bakila mvukulu.”

13 Bu bamona butindi bwa zonzela bwa Piere na Za, mpe bu bazaba ti babakala bo ka basa lukolo* ko, mpe bantu ba mpamba-mpamba kwa babâ, bayituku. Mpe bayizi bakula ti babakala bo na Yezu beri. 14 Mu bungu ti bamona muntu wu bawasisa watelama pene-pene na bawu, ka babâ na mvutu ko yi bahana. 15 Buna babatuma mu duka mu nzo ya Sanedre mpe babatika mu zonza bawu na bawu, 16 bu batâ: “Bantu ba bwe tubasa? Mu bungu ti, diangana, timangu tia nzitukulu tisalamane mu nzila’awu, timangu timonekene kwe bantu babansoni ba ku Yerusaleme, mpe ka tulendi’â takala wo ko. 17 Buna ngatu musamu wu walembo tomo yalangana kwe bantu, tabatâ bunkuta mpe tabayimina mu lembo vutu zonza mu nkumbu yo kwe muntu.”

18 Buna babatâ mbila mpe babatuma mu lembo vutu tâ na kani musamu na mu longesa mu nkumbu ya Yezu. 19 Kâ Piere na Za babavuturila: “Beno beni bongeno nzengolo, tala ti ha meso ma Nzambi, musamu wa mbote wena mu lu wirikila kani tawirikila Nzambi. 20 Kâ mu bungu dia beto, ka tulendi’â tabîka ko mu zonzela misamu mi tamweni na mi tawîri.” 21 Buna ha manima bu bavutu tomo ba tâ bunkuta, babayambula, mu bungu ti ka babaka musamu wu babasembela ko mpe mu bungu dia bantu, mu bungu ti babansoni Nzambi beri kembelaka mu bungu dia musamu watula. 22 Mu bungu ti muntu wu bawasisa mu mpila ya nzitukulu mvula yôka 40 zabâ nandi.

23 Bu bamana ba yambula, bayenda kwe milongoki miakaka mpe babatêla misamu mia ba têla mfumu za banganga-nzambi na bakuluntu. 24 Bu bawâ misamu mio, batumbula mazu mawu ha timosi kwe Nzambi mpe batâ:

“Mfumu Yatomo Zangama, ni Nge wasala zulu, na mutoto, na mubu, mpe na bima biabiansoni bie mô, 25 mpe watâ mu nzila ya mpeve santu mu munwa wa nkaka’eto Davide, tisari tiaku: ‘Mu bungu dia nti makanda meka niya mpe bantu bata dimbitila mu misamu milembolo salu? 26 Mitinu mia ha mutoto mitelamane, mpe bamfumu bakutakane ntiana muntu wumosi mu telamana Yehova* na mu telamana muntu wu katumba.’* 27 Mu bungu ti wa matieleka, Erode na Ponse Pilate na bantu ba makanda, mpe na bantu ba Israele bavukana ku mumvuka wu mu telamana tisari tiaku tia santu Yezu, wu watumba, 28 mu yirika misamu mia tizengela koko kwaku na luzolo lwaku. 29 Mpe bwawu bu Yehova tomo teka kutu mu miangu miawu, mpe hana kwe bisari biaku lenda dia tatamana mu zonzela zu diaku na butindi bwabwansoni, 30 bu ta lambula koko kwaku mu wasisa, mpe ngatu bidimbu na bimangu biasalama mu nkumbu ya tisari tiaku tia santu, Yezu.”

31 Bu bamana sa ndiawululu yo,* mbuka yi bakutakana yadikita, babansoni bafuluka mu mpeve santu mpe bazonzela zu dia Nzambi na butindi.

32 Musamu wakaka, pôka dia bantu diayizi kwikila diayizi bâ na mutima wumosi mpe na tilundi timosi,* mpe ka kwabâ muntu ko ha kati diawu weri tâka ti biabiansoni biabâ nandi bia yandi kaka kwa bieri, kâ bima biabiansoni beri tûlaka ha mbuka yimosi. 33 Bantumwa batatamana mu tâ timbangi na ngolo zazingi mu musamu wutariri mvumbukulu kwe ba fwa ya Mfumu Yezu, mpe bweso bwa nzitukulu bwabwingi bwabâ nawu babansoni. 34 Diangana, ka kwabâ muntu ko ha kati diawu weri kondoko tima, mu bungu ti bô babansoni babâ na misitu peleko nzo bia beri tekaka mpe mbongo zi beri bakaka beri nataka, 35 mpe ha malu ma bantumwa beri za tûlaka. Ha manima kwe muna muntu beri za kabilaka tintwari na nsatu zandi. 36 Buna Yozefe, wu beri tâka mpe kwe bantumwa Barnabase (tala ti babanguri yo, yizololo tâ, “Mwana wa mbombolo”), Levite yimosi yabutukila ku Shipre, 37 musitu wabâ nandi, wateka wo, wanata mbongo, mpe wayizi za tûla ha malu ma bantumwa.