Matie
20 “Mu bungu ti Timfumu tia mazulu tiena ntiana mfumu ya nzo yidukiri mu nkatika pari mu kwe dinga bisari mu bungu dia musitu’andi wa vinu. 2 Bu kameni wisana na bisari mu ba futa denie yimosi mu tilumbu, ba tambikiri ku musitu’andi wa vinu. 3 Bu kavutu duka, kampe mu 9 heure ya pari, wamona bantu bakaka batelama ha zandu balembo bâ na tisalu; 4 wabatêla: ‘Beno mpe yendeno lwasala ku musitu’ani wa vinu, mpe mbo nilufuta buna bu fwanane.’ 5 Buna bayenda. Wavutu duka kampe mu midi na ku ba 15 heure, mpe wasa kwa buna bu katoko sa. 6 Mu mbala ya mansukina kampe ku ba 17 heure, wavutu duka, wamona bantu bakaka batelama mpe wabatêla: ‘Mu bungu dia nti lutelamane hâ tilumbu tia mukaka, beno ka lusari?’ 7 Bavutula: ‘Mu bungu ti muntu kâni tu bongele mu tisalu.’ Yandi wabatêla: ‘Beno mpe yendeno ku musitu wa vinu.’
8 Nkokela bu yafwana, mfumu ya musitu wa vinu watâ kwe mfumu ya bisari: ‘Tâ mbila bisari mpe ba futa mbongo zawu bu batikila kwe muntu wa mansukina mpe bu manisina kwe muntu wa ntete.’ 9 Bantu babatika mu 17 heure bu batula, muna muntu bamuhana denie yimosi. 10 Buna bantu ba ntete bu batula, babanza ti mbo baketi baka mbongo zazingi, kâ bawu mpe babafuta denie yimosi. 11 Bu babaka yo, babatika mu niongena mfumu ya nzo 12 mpe batâ: ‘Bantu eba ba mansukina heure yimosi kwa basariri; kâ ba futiri nsinsa na beto tusariri tilumbu tia mukaka ku mwini wa ngolo!’ 13 Kâ wavutula kwe wumosi mu bawu: ‘Mpwana’ani, ka nikusiri’â bubi ko. Nge na meno tuwisaneke mu ku futa denie yimosi, ka buna ko? 14 Bonga mbongo zaku mpe yenda. Nzololo nafuta muntu wa mansukina ntiana kwa nge. 15 Ngano ka ndiena na nswa ko wa yirika mio mi nzololo na bima biani? Peleko disu diaku dita dienokena* mu bungu ti wa mbote ndiena?* 16 Ni mu mpila yo bantu ba mansukina babâ ba ntete, mpe ba ntete ba mansukina.”
17 Bu keri kwendaka ku Yerusaleme, Yezu wabenda milongoki 12 ha bawu kaka mpe mu nzila wabatêla: 18 “Tala! Ku Yerusaleme tuta kwenda, mpe Mwana muntu mbo bamuteka ha moko ma mfumu za banganga-nzambi na bitsoniki. Mbo bamuzengela lufwa 19 mpe mbo bamuhana ha moko ma bantu ba makanda ngatu bamusehesela, bamuwinda bisikoti mpe bamukoma ha poto; mpe mu tilumbu tia bitatu mbo kavumbuka kwe ba fwa.”
20 Ha manima, nguri ya bala ba Zebede wapusana kwe yandi mpe wakondama. Weri nandi kamulomba tima. 21 Yezu wamutêla: “Nti ta dinga?” Yandi wamuvuturila: “Tâ musamu ngatu bala bani eba ba bole bazakala wumosi ku lubakala lwaku mpe wakaka ku lukento lwaku mu Timfumu tiaku.” 22 Yezu wabavuturila: “Musamu wu luta lomba ka luzebi’â wo ko. Ngano lulendi nwa mbungu* yi ninwa ntamana?” Bamuvuturila: “Yee, mbo tulenda.” 23 Wabatêla: “Diangana mbungu’ani* mbo lunwa yo; kâ ka meno’â ko ndie na nswa wa hana nzila ya zakala ku lubakala peleko ku lukento lwani. Mbuka zo, mu bungu dia bô Tata’ani ba kakubikila zo zena.”
24 Ntumwa za 10 zakaka bu zawâ bo, zadasukila mpangi za zole. 25 Kâ Yezu wabatâ mbila mpe wabatêla: “Luzebi ti bantwarisi makanda bayâlaka mu ngolo, mpe bantu ba nsangu songela basongelaka ti ni bawu bê na lutumu. 26 Musamu ka wufweti’â wabêla bo ko kwe beno; kâ wô zololo kabâ nsangu ha kati dieno fweti bâ tisari tieno, 27 mpe wô zololo mu bâ wa ntete fweti bâ ngamba’eno. 28 Ntiana kwa Mwana muntu ka yiza ko ngatu bamusarila, kâ mu sarila bantu na mu hana luzingu* lwandi mu nkûlulu mu bungu dia bantu babingi.”
29 Bu beri dukaka ku Yeriko, pôka dia bantu diamulanda. 30 Mpe tala! bantu bole bafwa meso bazakala mu ndekoso nzila, bawâ ti Yezu weri yôkaka mpe bakawula: “Mfumu, tu fwila tiari, Mwana Davide!” 31 Kâ pôka dia bantu diababamina, diabatêla ba kuta; kâ bawu bavutu tomo kawula mu ngolo: “Mfumu tu fwila tiari, Mwana Davide!” 32 Buna Yezu wakangama, wabatâ mbila mpe watâ: “Nti luta zolo nasa mu bungu dia beno?” 33 Bamutêla: “Mfumu, tu zibula meso.” 34 Yezu tiari tiamubaka, wasimba meso mawu, mpe hô nkatika bendo bavutu mona, mpe bamulanda.