Za

10 “Nkatika matieleka nita lu têla, wô lembo kotela mu mwelo wa mpaka, kâ nakina mu nzila yakaka, yandi wûna mwivi wena mpe timpumbulu tiena. 2 Kâ wô ta kota ha mwelo ni muvungi wa bimeme. 3 Muntu wukengerelaka mwelo yandi kaziburilaka, mpe bimeme zu diandi biwâka. Bimeme biandi katâka mbila mu nkumbu’awu mpe ku mbazi kabanataka. 4 Bu kamana dukisaka bimeme biandi biabiansoni, ha matu mawu kakwe yende, mpe bimeme yandi bilandaka, mu bungu ti zu diandi dia bazebi. 5 Kani kabwe ka bilanda nzenza ko, kâ mbo bimudioka mu bungu ti ka bizebi’â zu dia banzenza ko.” 6 Yezu wabazonzela tifwani tio, kâ ka babakula misamu mi keri ba têlaka ko.

7 Buna Yezu wavutu tâ: “Nkatika matieleka nita lu têla, meno ni mwelo mu bungu dia bimeme. 8 Bantu babansoni bayiza mu nkumbu’ani mivi miena mpe bimpumbulu biena; kâ bimeme ka biabawirikila ko. 9 Meno ni mwelo; wô kotela mu meno mbo kavûka, mbo kakota, mbo kaduka, mpe mbo kabaka mbuka ye na matîti. 10 Mwivi bu wukwizaka ni mu laba kwa, mu honda na mu fukisa. Meno ndiziri ngatu bimeme biabaka luzingu mpe biabaka lo mu mpila ya yôka. 11 Meno ni muvungi wa mbote; muvungi wa mbote luzingu* lwandi wuhanaka mu bungu dia bimeme. 12 Tisari ti bafutaka, wô wulembolo muvungi mpe lembolo vwa bimeme, buna kwa bu kamona mbulu* yita kwiza, niakini bimeme mpe diokele kwandi—mboko mbulu bawu kabwilaka mpe katsangamasaka— 13 mu bungu ti tisari ti bafutaka tiena mpe ka belokelaka bimeme lwaka ko. 14 Meno ni muvungi wa mbote. Bimeme biani bia nzebi mpe bawu meno bazebi, 15 ntiana Tata bu kakunzebi mpe meno bu nzebi Tata; mpe luzingu* lwani nita hana mu bungu dia bimeme.

16 “Bimeme biakaka bie nani, bilembolo bia mpaka yi; bio mpe mfweti bia kotesa kû, mbo biwâ zu diani, mpe mbo bibâ twila dimosi na muvungi wumosi. 17 Ntiangu Tata kakunzololo, mu bungu ti luzingu* lwani nita hana ngatu navutu lwa baka. 18 Ka muntu’â ko ta lwa kunguka, kâ mu luzolo lwani nita lwa hana. Lutumu lwe nani lwa hana lo na lutumu lwa vutu lwa baka. Yo ni ntumunu yi mbakiri kwe Tata’ani.”

19 Bayuda ka beri’â vutu wisanaka ko mu bungu dia misamu mio. 20 Babingi ha kati diawu beri tâka: “Demo ye nandi mpe lawukiri. Mu bungu dia nti luta mu wîla?” 21 Bakaka batâ: “Ka yena nzonzolo ya muntu wê na demo ko. Ngano demo yilendi zibula meso ma bantu bafwa meso?”

22 Mu ntangu yîna Malaki ma Nzibululu meri yôkaka ku Yerusaleme. Ntangu ya tiozi tia ngolo yabâ, 23 mpe Yezu mu tempelo keri kwe yende ha veranda ya Salomo. 24 Buna Bayuda bamuzungirila mpe babatika mu mu têla: “Tii ntia ntangu tu bîka* na mitima mu zulu? Tala ti nge ni Kristo, tomo wa tu têla.” 25 Yezu wabavuturila: “Wa nilutêlele, kâ ka luta kwikila ko. Bisalu bi nita sala mu nkumbu ya Tata’ani timbangi bita hana mu bungu dia meno. 26 Kâ ka luta kwikila ko mu bungu ti ka lwena bimeme biani ko. 27 Bimeme biani zu diani biwâka, bia nzebi, mpe meno bilandaka. 28 Luzingu lwa mankululu nita ba hana, mpe kani kabwe ka bifuka ko, mpe muntu kâni bakatula mu koko kwani. 29 Bio bia kungana Tata biyôkele bunene bima biabiansoni biakaka, mpe muntu kâni lendi bia katula mu koko kwa Tata. 30 Meno na Tata mu bumosi* twena.”

31 Bayuda bavutu nanguna matari mu mu winda mo. 32 Yezu wabavuturila: “Bisalu biabingi bia mbote nalusongele biatûkiri kwe Tata. Mu bungu dia ntia tisalu luta kungwindila matari?” 33 Bayuda bamuvuturila: “Matari tuta ku winda, ka mu bungu dia tisalu tia mbote’â ko, kâ mu bungu dia tifingu kwe Nzambi; mu bungu ti nge, ni bu sa ti muntu wena, tisiri nzambi.” 34 Yezu wabavututrila: “Ngano ka batsoneka mu Musiku’eno ko ti, ‘Ntêle: “Beno nzambi* zena”’? 35 Tala ti watâ ‘nzambi’ bô zu dia Nzambi diasemba, (diangana matsonoko ka balendi’â bafwasa mo ko) 36 buna kwe meno luta têla, meno Nzambi wu kasantukisa mpe wu katambika mu nza, ‘Nzambi ta finga,’ mu bungu ti ebu ntêle, ‘Meno ni Mwana wa Nzambi’? 37 Tala ti ka nita sala bisalu bia Tata’ani ko, ka lukunkwikilandi. 38 Kâ tala ti bia nita sala, ni bu sa ti ka lukunkwikiri’â ko, kwikileno bisalu, ngatu lwazaba mpe lwatatamana mu zaba ti Tata mu bumosi kena na meno mpe meno mu bumosi ndiena na Tata.” 39 Buna bayêla mu vutu mu bwila, kâ wapisumuka ha moko mawu.

40 Mpe wavutu kwenda ku simu diakaka dia Zurde, ku mbuka yeri batisilaka Za ku mbatukulu, mpe waye bêla kûna. 41 Bantu babingi bayiza kwe yandi mpe babatika mu tâ: “Za ka sa na kani timangu timosi ko, kâ misamu miamiansoni mia tâ Za mu muntu wû mia matieleka miena.” 42 Mpe kûna bantu babingi bayizi tûla timinu mu yandi.