Wa ntete kwe Bisi-Korente
9 Ngano ka ndiena na timpwanza ko? Ngano ka ndiena ntumwa ko? Ngano ka namona Mfumu’eto Yezu ko? Ngano ka lwena mbutu ya tisalu tiani mu Mfumu ko? 2 Ni bu sa ti ka ndiena ntumwa ko kwe bantu bakaka, diangana ntumwa ndiena kwe beno! Mu bungu ti beno tiniemo tiena tita songela tisalu tiani tia ntumwa mu Mfumu.
3 Musamu wu nita tâ mu tinwanina kwe bô bata kumfundisa ni ewu: 4 Nswa* wê neto wa dia na wa nwa, ka buna ko? 5 Nswa wê neto wa kwela mukento wukwikilaka na mu mu nata na beto, ntiana bu saka ntumwa zakaka na mpangi za Mfumu na Sefase,* ka buna ko? 6 Peleko ngano ni meno na Barnabase kwa tufweti sala mu bungu dia luzingu lweto? 7 Nani salaka tisalu tia tinwani mu mbongo za yandi beni? Nani kunaka musitu wa vinu mpe lembo diaka mbutu za musitu wo? Peleko nani twilaka bibulu mpe lembo nwaka lait ya twila diandi?
8 Ngano misamu mi nita tâ mabanza ma bantu kwa mena? Peleko, ngano Musiku ka wutâka mpe misamu mio ko? 9 Mu bungu ti watsonama mu Musiku wa Mose: “Kufweti’â wakanga munwa wa ngombe ko bu katutaka mbutu.” Ngano Nzambi ngombe kabelokelaka lwaka? 10 Peleko ka mu bungu dia beto’â ko katêla bo? Ni mu bungu dia beto batsonekena wo, mu bungu ti wô bubaka* na wô tutaka mbutu bafweti sa bo na tivuvu tia baka mfutulu.
11 Tala ti mbutu za timpeve takuna ha kati dieno, ngano musamu wa wunene wena tala ti tululombele lubakusu lwa tinsuni? 12 Tala ti bantu bakaka nswa wo wa fwanana wê nawu mu beno, ngano nswa wa beto ka wuyôkele’â ko? Ni bu sa ti ni bo ka tasariri’â nswa wo* ko, kâ misamu miamiansoni tuta korela ngatu ka tukabakasandi muntu mu kwikila nsangu za mbote zitariri Kristo. 13 Ngano ka luzebi’â ko ti bô basalaka bisalu bia santu bima bia mu tempelo badiaka, mpe bô bavulu salaka ha ziku* ndambu bima babakaka mu bio bi bakwizi hanaka ha ziku?* 14 Mpila mosi mpe, Mfumu walomba kwe bô basamunaka nsangu za mbote mu zinga mu nzila ya nsangu za mbote.
15 Kâ meno ka nasariri’â na kani tima mu nswa wo ko. Diangana, ka ntsonekene’â misamu mio ko ngatu basa bo mu bungu dia meno, mu bungu ti bubote bwingi bu mfwiri na—ka kwena muntu ko kunkatula misamu misaka ti natilwona! 16 Tala ti nsangu za mbote nisamunaka, ka wena musamu ko wu mfweti tilwonena, mu bungu ti musamu wa mfunu wena wu bakuntuma. Wa matieleka, tiari kwe meno tala ti ka nsamuni’â nsangu za mbote ko! 17 Tala ti mu luzolo lwani nita tia sarila, musendo nibaka; kâ ni bu sa ti ka nita tia sala mu luzolo lwani ko, tisalu kwa tie nani ti bakungana. 18 Buna musendo’ani ni we? Musendo’ani ni wena’eti bu nisamunaka nsangu za mbote, nasamuna zo za mpamba, ngatu nalembo yôkesa ndilu mu lutumu* lwe nani mu nsangu za mbote.
19 Mu bungu ti ni bu sa ti timpwanza tie nani ha matu ma bantu babansoni, nitisiri ngamba ya bantu babansoni, ngatu nabenda bantu babingi tala ti bulendi ba. 20 Kwe Bayuda nayikiri Muyuda ngatu nabenda Bayuda; kwe bô bazitisaka musiku, nayikiri muntu wuzitisaka musiku ni bu sa ti me beni ka nizitisaka musiku ko, ngatu nabenda bô bazitisaka musiku. 21 Kwe bô balembolo na musiku, nayikiri ntiana muntu wulembolo na musiku, ni bu sa ti ka ndiena muntu wulembolo na musiku ko mu wo wutariri Nzambi, kâ wuzitisaka musiku ha matu ma Kristo ngatu nabenda bô balembolo na musiku. 22 Kwe bô balembolo na ngolo, nayikiri muntu wulembolo na ngolo, ngatu nabenda bantu balembolo na ngolo. Nayikiri bima biabiansoni mu bungu dia bantu ba mpila zazansoni, ngatu mu mpila zazansoni navûkisa bakaka. 23 Kâ misamu miamiansoni nisaka mu bungu dia nsangu za mbote, ngatu nasamuna zo kwe bantu bakaka.
24 Bantu badiokaka ntinu mu baka mfutulu, babansoni dioka badiokaka, kâ wumosi kwa wubakaka mfutulu. Buna diokeno mu mpila yisa ti lwabaka mfutulu. 25 Bô babansoni basaka nsaka mu baka mfutulu, tifu tia tiyimina basarilaka mu misamu miamiansoni. Diangana, bawu mu bungu dia mfutulu* yibebaka basilaka bo, kâ beto mu bungu dia mfutulu* yilembo bebaka. 26 Buna ka nidiokaka dioka buna ko; nkomi niwindaka kâ ka mu titembo’â ko; 27 kâ nitu’ani nikwe twe mpe nikwe nati ntiana ngamba, ngatu bu nimana samuna kwe bantu bakaka, mu mpila ni mpila ka nibândi me beni muntu Nzambi wu kalembo tambulaka.