Matie

15 Bafarize na bitsoniki bakatuka Yerusaleme mu kwizi tala Yezu, batâ: 2 “Mu bungu dia nti milongoki miaku mivwezelaka tikulu tia nkaka zeto? Mu tifwani ka basukulaka* moko ko ntete badia.”

3 Yandi wabavuturila: “Mu bungu dia nti lulembo zitisilaka ntumunu za Nzambi mu bungu dia tikulu tieno? 4 Mu tifwani Nzambi watâ: ‘Zitisa* tata’aku na nguri’aku,’ mpe ‘wô zonzela tata’andi na nguri’andi mu mpila ya mbi* mbo bamuhonda.’ 5 Kâ beno ebu lutâka: ‘Wô tâ kwe tata’andi peleko kwe nguri’andi: “Bima biabiansoni bie nani na bilendi bâ mfunu kwe beno, kabu diena di nkanisini kwe Nzambi,” 6 kani kabwe kena na nsatu ko ya zitisa* tata’andi.’ Buna, lusiri ti Zu dia Nzambi dialembo vutu bâ mfunu mu bungu dia tikulu tieno. 7 Bangungu, Izayi mpemba’andi bu kabikula mu beno, bu katâ: 8 ‘Kanda di mu bikoba kwa dikunzangurilaka, kâ mitima miawu mala miena na meno. 9 Mpamba kwa bata tatamana mu kunkunda mu bungu ti ntumunu za bantu kwa balongesaka.’” 10 Ha manima, watâ mbila pôka dia bantu mpe wabatêla: “Wirikileno mpe bakuleno nsasa: 11 Ka bio bio’â ko bikotaka mu munwa wa muntu bisaka ti kabâ mvindu, kâ ni bio bidukaka mu munwa’andi bisaka ti kabâ mvindu.”

12 Buna milongoki miayiza mpe miamutêla: “Ngano wa zebi ti Bafarize batêle kuba bu bawîri misamu mi têle?” 13 Yandi wabavuturila: “Muti ni muti wulembolo kuna Tata’ani die ku mazulu mbo bavuna wo. 14 Ba bîkeno. Ntwarisi zena zafwa meso. Tala ti timfwa-meso twarisi timfwa-meso, ba bole mbo babwa mu bulu.” 15 Piere wamuvuturila: “Tomo tu bangurila tifwani!” 16 Yezu wabavuturila: “Beno mpe ka lweka’eti bâ na mayela ko? 17 Ngano ka luzebi’â ko ti bio biabiansoni bikotaka mu munwa, mu moyo biyôkelaka mpe ku kabine bikwe losokaka? 18 Kâ, bio biabiansoni bidukaka mu munwa ku mutima bitûkaka mpe ni bio bisaka ti muntu kabâ mvindu. 19 Mu tifwani, mbanzulu za mbi ku mutima zibutukilaka: tifu tia honda bantu, vukasa kwa nitu kulembolo delakana,* bwivi, bungungu na bifingu kwe Nzambi. 20 Bio ni bima bisaka ti muntu kabâ mvindu, kâ tala ti muntu ka sukuri’â* moko ko ntete kadia, ka wusaka ko ti kabâ mvindu.”

21 Bu kakatuka kûna, Yezu wayenda ku tizunga tia Tire na tia Sido. 22 Mpe tala! mukento wumosi wa ku Fenisi mu bizunga bîna wayiza mpe wakawula mu ngolo: “Kumfwila tiari Mwana Davide, mwana’ani wa wukento nguria mpasi wuta mona mu bungu dia demo ye nandi.” 23 Kâ yandi ka mu hana na kani mvutu ko. Buna milongoki miandi miayiza mpe miamusa tiya: “Mu kuma mu bungu ti kata bîka ko mu tu landa na mu kawula.” 24 Yandi watâ: “Meno kwe bimeme biawumuka kwa bia nzo ya Israele bakuntambika.” 25 Kâ mukento wayiza, wakondama ha matu mandi mpe watâ: “Mfumu kumbakisa!” 26 Yandi wamuvuturila: “Ka bwena bubote ko mu bonga dimpa dia bala na mu tuba dio kwe bala ba mbwa.” 27 Mukento wamutêla: “Yee, Mfumu, wa matieleka, kâ, bala ba mbwa mfumfula za mampa zibwaka ku nsi’a meza ma mfumu zawu badiaka.” 28 Buna Yezu wamuvuturila: “Ô mukento, timinu tia tinene tie naku; bîka wabêla buna bu ta kekolo.” Muna ntangu yîna kwa mwana’andi wa wukento wawasa.

29 Yezu bu kakatuka kûna wayenda pene-pene na mubu wa Galile, wanaka ku mongo mpe wazakala. 30 Pôka dia bantu diapusana he yandi mpe bamunatina bantu beri tsuringaka, bantu bafwa binama, bafwa meso, mababa na mbevo zakaka zazingi. Ha malu mandi beri ba nataka mpe yandi bawu keri wasisaka. 31 Buna pôka dia bantu diayituku bu diamona mababa meri zonzaka, bantu bafwa binama bawasa, bantu beri tsuringaka beri kwe yende, bantu bafwa meso beri monaka, mpe bakembela Nzambi ya Israele.

32 Kâ Yezu watâ mbila milongoki miandi, mpe watâ: “Tiari tie nani mu bungu dia pôka dia bantu, mu bungu ti bilumbu bitatu bifweni tûka ti bê na meno mpe ka bena na tima tia dia ko. Ka nzololo’â ko nabakarisa na nsatu, mu bungu ti balendi bwa mu nzila.” 33 Kâ milongoki miamutêla: “Mbuka yi ya hengama yena, kwe tulendi bakila mampa ma fwanana mu dikila bantu ba bê nkatika babingi?” 34 Buna Yezu wabatêla: “Mampa makwa me neno?” Bawu batâ: “7 na mwa mbizi za fioti.” 35 Bu kamana lomba kwe pôka dia bantu mu zakala ha mutoto, 36 wabonga mampa ma 7 na mbizi, mpe bu kasa lusambulu lwa matondo, wabukuna mo, wabatika mu hana mo kwe milongoki mpe milongoki miahana mo kwe pôka dia bantu. 37 Babansoni badia mpe bayukuta mpe bafulusa bitunga bia 7 mu bima biasârila. 38 Mu bantu babansoni badia, babakala ba 4 000 babâ mô, katula bakento na bala ba fioti. 39 Ha manima, bu kamana karisa pôka dia bantu, wanaka mu bato, mpe wayenda ku tizunga tia Magadane.