Like

12 Mu ntangu yîna, mafunda ma bantu makutakana ha timosi mpe ni beri diatasanaka. Yezu wabatika mu toko tâ kwe milongoki miandi: “Seno keba mu levire ya Bafarize, wuzololo tâ bungungu bwawu. 2 Kâ ka kwena tima ti batomo sweka ko ti balembo kwizi dzukula, mpe ka kwena tima tia swekama ko tilembo kwizi zabakana. 3 Ntiangu misamu miamiansoni mi lutâ ku mpimpa, mbo bawâ mio mu mutsamina, mpe mio mi lutâ mu zu dia malembe mu kati dia shambre zeno mbo basamuna mio ku zulu miluri. 4 Musamu wakaka, nilutêlele ndiku zani, ka lutînandi bô balendi honda nitu, mpe ha manima ka balendi’â basa tima tiakaka ko. 5 Kâ bîkeno nalusongela nani lufweti tîna: Tîneno wô wê na lenda dia tuba ku Zehene* bu kamana honda. Yee, wa nita lu têla, mu tîneno. 6 Ngano ka batekaka bindia-makonko bitanu ko mu mipata miole milembolo na ntalu yayingi?* Kâ, Nzambi ka zimbakanaka* na kani wumosi mu bawu ko. 7 Nsuki zazansoni za mutu’eno mpe za kazebi lutangu. Ka lubândi na bunkuta; bindia-makonko biabingi luyôkele mu ntalu.

8 “Wa nita lu têla, wô singasa ha matu ma bantu ti mulongoki’ani wena, Mwana muntu mpe mbo kasingasa ha matu ma mbazi za Nzambi ti mulongoki’andi wena. 9 Kâ wô kunkala ha matu ma bantu, mbo bamukala ha matu ma mbazi za Nzambi. 10 Mpe muntu ni muntu wuzonzela Mwana muntu bubi mbo bamulemvokela, kâ wô finga mpeve santu ka bamulemvokela ko. 11 Bu balunata ha matu ma timvuka tiatiansoni,* ma guvernema, na ha matu ma luyâlu, ka lubândi na lwaka mu bungu dia misamu mi lutâ mu tinwanina peleko mu mpila yi lutêla mio, 12 mu bungu ti mpeve santu mbo yilulongesa misamu mi lufweti tâ mu ntangu yîna.”

13 Buna muntu wumosi ha kati dia pôka dia bantu wamutêla: “Mulongi, têla mpangi’ani mu kabana fwa na meno.” 14 Yezu wamutêla: “Mpwana’ani, nani kunsiri mfundisi peleko zenga-mambu ha kati dia beno bole?” 15 Ha manima wabatêla: “Bêno na meso ma tia mpe seno keba mu mpila zazansoni za dienokena, mu bungu ti ni bu sa ti muntu mu nienze kena, luzingu lwandi ka lutûkaka mu bima bie nandi ko.” 16 Buna wabahana tifwani bu katâ: “Mutoto wa mvwama yimosi watomo buta. 17 Buna wabatika mu banza: ‘Bwe nisa bwawu bu, bu ndembolo sâla na mbuka yi nitûla bima bi ntiele?’ 18 Dieka bo watâ: ‘Ebu nisa: Mbuka zani zi nilundilaka bima nimwangasa mpe za zinene nitunga, ni mûna nitûla mbutu zani zazansoni na bima biani biabiansoni, 19 mpe mbo nitâ kwe me beni:* “Bima biabingi bia mbote bie naku* bi lundiri mu bungu dia mvula zazingi; huma kwaku, dia, nwa mpe mona nsayi.”’ 20 Kâ Nzambi wamutêla: ‘Zoba, mpimpa yi kwa mbo bakulomba luzingu* lwaku, buna nani biarila bima bi lundiri?’ 21 Buna misamu ni bo miyôkela mu bungu dia muntu wulundaka timvwama mu bungu dia yandi beni, kâ wulembolo mvwama ha meso ma Nzambi.”

22 Ha manima watâ kwe milongoki miandi: “Ntiangu nita lu têla: Bîkeno mu bâ na lwaka mu bungu dia luzingu* lweno mu bio bi ludia, peleko mu bungu dia nitu zeno mu bio bi lulwata. 23 Mu bungu ti luzingu* luyôkele bidia, mpe nitu yiyôkele binkuti. 24 Tomoeno taluzula mingânga, ka mikunaka mbutu ko, ka mitiaka ko, mpe ka miena na nzo zi balundilaka bima ko, kâ Nzambi bawu kadikilaka. Ngano ka luyôkele’â nuni mu ntalu ko? 25 Nani mu beno mu lwaka na lwaka, lendi lalumuna luzingu lwandi na kani mu koko* kumosi? 26 Dieka bo, tala ti ka lwena na lenda ko dia yirika musamu wo wa fioti, buna mu bungu dia nti lwe na lwaka mu bungu dia misamu miakaka? 27 Tomoeno taluzula mpila yi menenaka bifulu bia makanga; ka bisalaka ko, mpe ka bitungaka binkuti ko; kâ nilutêlele, banza Salomo, mu mukembo’andi wawansoni, ka sa lwatila ko ntiana timosi tia bifulu bio. 28 Tala ti Nzambi ni bo kalwikilaka bitîti bia makanga bie hô lumbu ti, kâ bi batuba ku tiya mbazi, ngano ka tomo’â lu lwikila ko, beno lwe na timinu tia fioti! 29 Buna bîkeno mu tiyula nti ludia mpe nti lunwa, mpe bîkeno mu bâ na lwaka lwa yôka; 30 mu bungu ti bantu ba makanda ma nza misamu ni mio miamiansoni batomo belokelaka lwaka, kâ Tata’eno zebi ti bima bio biabiansoni bie neno nsatu. 31 Kâ tatamaneno mu dinga Timfumu tiandi, mpe bima bio mbo baluyikila bio.

32 “Kubândi na bunkuta twila dia fioti, mu bungu ti Tata’eno tamburi mu lu hana Timfumu. 33 Tekeno bimvwama bieno, mpe haneno makabu kwe bamputu.* Yirikeno bimpokoti bilembo bebaka, timvwama ku mazulu tilembo sikaka, ku lembo kotaka mwivi mpe ku lembo dîlaka nselele. 34 Mu bungu ti kô kwe timvwama tieno, mitima mieno mpe ni kô mibâ.

35 “Bêno ba lwatu mpe ba kubama, mpe minda mieno miabâ mia namu, 36 mpe lufweti bâ ntiana babakala bata kêla mfumu’awu bu kakâla ku malaki ma makwela, ngatu bu kakâla mpe bu kakonkota bakulu mu ziburila. 37 Nsayi kwe ngamba zo mfumu’awu bu kakwizi ba bwana na meso ma tia! Wa matieleka nita lu têla, mbo kalwata binkuti bia tisalu, mbo kabazakasa ha meza, mpe mbo kakwiza mu kwizi ba hana bidia. 38 Mpe nsayi kwe bawu tala ti wiziri ku ba 21 heure tii ha kati-kati dia mpimpa, peleko ha kati-kati dia mpimpa tii ku ba 3 heure mpe wizi ba bwana ba kubama! 39 Kâ zabeno musamu ewu: Tala ti munkwa-nzo zebiki mu ntia ntangu mwivi wuketi kwiza, ka keti’â mu bîka ko kabangula nzo’andi. 40 Beno mpe, bêno ba kubama, mu bungu ti Mwana muntu mbo kakwiza mu ntangu yi luta lembo banza.”

41 Buna Piere watâ: “Mfumu, ngano tifwani tio kwe beto kwa têle tio, peleko kwe bantu babansoni?” 42 Mpe Mfumu watâ: “Mu matieleka, nani wê tisari* tia kwikama, tia ndwenga mfumu’andi ti kanomene ha zulu bisari* biandi, mu tatamana mu ba hana bidia biawu bifwanane mu ntangu yifwanane? 43 Nsayi kwe ngamba yo tala ti mfumu’andi wizi mu bwana bu kata sila bo! 44 Wa matieleka nita lu têla, mbo kamunoma ha zulu bima biandi biabiansoni. 45 Kâ tala ti ngamba yo têle mu mutima’andi: ‘Mfumu’ani ka ta kulu kwiza ko,’ weka twa bisari bia bikento na bia bibakala, batikiri mpe mu dia na mu nwa malavu mamingi tii bu mamubaka, 46 mfumu ya ngamba yo mbo yikwiza mu tilumbu ti kata lembo kekolo na mu heure yi kalembolo zaba, mbo kamusemba mu mpila ya ngolo, mpe mbo kamutûla na bantu balembolo ba kwikama. 47 Dieka bo, ngamba yo yibakuri misamu mi zololo mfumu’andi kâ yilembolo kubama peleko yilembolo yirika misamu mi kamulombele, mbo bamuwinda bisikoti biabingi. 48 Kâ wô lembolo bakula mpe yirikiri misamu mi bafweti mu windila bisikoti, mbo bamuwinda bisikoti ndambu. Diangana kwe wô wu ba heni biabingi mbo bamulomba biabingi mpe kwe wô wu ba simbisi biabingi, mbo bamulomba bio biyôkele.

49 “Tiya ndizi namisa ha mutoto, mpe tala ti tunamini, nti nivutu kekolo? 50 Diangana bateme ye kô mfweti baka, mpe mbo nitatamana mu bâ na lwaka tii bu yisuka! 51 Ngano lubenzi ti tidzunu ndizi nata ha mutoto? Kâni, wa nita lu têla, kâ tihambula. 52 Mu bungu ti tûka bwawu bu, bantu batanu bê mu nzo mbo bahambana. Bantu batatu mbo babela bantu bole, mpe bantu bole mbo babela batatu. 53 Bantu mbo bahambana: Tata na mwana’andi wa bakala, mwana wa bakala na tata’andi, nguri na mwana’andi wa wukento, mwana wa wukento na nguri’andi, buko bwa bukento na mukento wa mwana’andi, mpe mukento wa kwela na buko bwandi bwa bukento.”

54 Ha manima watâ mpe kwe pôka dia bantu: “Bu lumonaka tuti didukiri ku weste, mbala mosi ebu lutâka: ‘Titembo tia ngolo tibâ kû,’ mpe ni buna wubêlaka. 55 Mpe bu lumonaka titembo titûkiri ku side, ebu lutâka: ‘Yaninga dia ngolo dibâ kû,’ mpe ni buna wubêlaka. 56 Bangungu, bidimbu bia ku zulu na bia mutoto bia luzebi taluzula, kâ mu bungu dia nti luta lembo lendela mu taluzula misamu mia ntangu yi? 57 Beno beni mu bungu dia nti luta lembo zabila misamu mia sungama? 58 Mu tifwani, tala ti musamu wê naku na muntu mpe kwe mfumu yimosi luta kwenda, sarila ngolo mu yirika musamu na yandi bu lwatiri mu nzila. Tala ti kâni, lendi ku nata kwe mfundisi, mfundisi mbo kakuhana ha moko ma tinwani, mpe tinwani mbo kakutuba ku boloko. 59 Wa nita tomo ku têla, kani kabwe kuduka ko tala ti kufutiri’â mfuka yayansoni ko tii bu dukisa mupata’aku* wa fioti wa mansukina.”