Kwe Bisi-Filipe

4 Dieka bo, mpangi zani zi ntomono zolo na zi nita dinga mu kulu mona, beno nsayi’ani na mpu’ani ya timfumu, tatamaneno mu bâ ba kangama mu nzila ya Mfumu, beno ba ntomono zolo.

2 Ntindisi Evodi na Sentishe mu bâ na mabanza mamosi mu Mfumu. 3 Yee, nikulombele mpe bu wena tisari tia matieleka mu tatamana mu bakisa bakento bo banweni ngolo tintwari na meno, mu bungu dia nsangu za mbote ha timosi na Klema na mpangi zakaka zê na nkumbu zatsonama mu buku dia luzingu.

4 Ntangu zazansoni yangalalakeno mu Mfumu, mvutulu tâ, yangalalakeno! 5 Bîka tifu tieno tia bâ na mabanza ma delakana tiazabakana kwe bantu babansoni, Mfumu weka pene-pene. 6 Ka lubândi na lwaka mu musamu ni musamu, kâ mu miamiansoni, mu lusambulu, mu ndiawululu na bu lukwe vuturi matondo, zabikiseno ndombolo zeno kwe Nzambi; 7 mpe tidzunu tia Nzambi tiyôkele mabanza mamansoni mbo tikengerela mitima mieno na mbanzulu zeno mu nzila ya Kristo Yezu.

8 Dieka bo bampangi, bima biabiansoni bia matieleka, bi bafweti zitisa, bie bia sungama, bie bia tsema, bi bafweti zolo, bi bafweti sîka, bie bia mbote, bi bafweti kembela, tatamaneno mu tûla mabanza* mu bima bio. 9 Misamu mi lwalongokele, mi lwatamburi, mi lwawîri, mi lwamweni kwe meno, sarileno mio, mpe Nzambi ya tidzunu mbo kabâ na beno.

10 Ntomono yangalala mpe ntomono tonda Mfumu, mu bungu ti lwavutulu songela ti meno lubelokelaka lwaka, diangana meno kwa lutoko belokelaka lwaka, kâ ka lwabakiri’â bweso ko bwa kunsongela wo. 11 Ka nita tâ bo ko mu bungu ti bima bie nani nsatu. Nalongoka mu yangalala mu bio bie nani mu misamu miamiansoni. 12 Nzebi bâ na bima bia fioti, mpe nzebi bâ na bima biabingi; mu bima biabiansoni na mu misamu miamiansoni nalongoka ka bwe babêlaka wa yukuta peleko mu nsatu, ka bwe babêlaka na bima biabingi peleko bu bakondoko bima. 13 Mu miamiansoni, lenda die nani mu nzila ya wô kunganaka ngolo.

14 Kâ, bubote lwasiri bu lwakumbakisi mu mpasi zani. 15 Diangana, beno Bisi-Filipe wa luzebi mpe ti, bu lwayizi longoka nsangu za mbote mu mbala ya ntete mu ntangu yi nakatuka ku Masedwane, ka kwena timvuka ko tiabâ nani tintwari mu musamu wutariri kaba, peleko baka tala ti ka beno’â ko; 16 mu bungu ti bu nabâ ku Tesalonike lwakuntambikila bima biabâ nani nsatu, ka mbala mosi’â ko kwa, kâ mbala zole. 17 Ka nita dinga makabu ko, kâ mbutu nita dinga yilendi lu natina ndandu zazingi. 18 Kâ bima biabiansoni bie nani nsatu bie nani, mpe diangana biabingi biena. Bwawu bu mu nienze ndiena bu nabakiri bima bi lwatambikiri kwe Epafrodite. Kabu dieno die ntiana parfum ya nsunga ya toma, mukayulu wutâka Nzambi nsayi. 19 Buna Nzambi’ani mbo kasarila bimvwama biandi bia nzitukulu, mu tomo lungisa nsatu zeno mu nzila ya Kristo Yezu. 20 Bîka Nzambi Tata’eto kabaka mukembo ntangu zazansoni. Amen.

21 Haneno mbote kwe basantu babansoni bê mu bumosi na Kristo Yezu, mpangi zi twe kû mbote zilutambikiri. 22 Basantu babansoni mbote balutambikiri, nsungula bo bê mu nzo ya Sezare.

23 Bîka bweso bwa nzitukulu bwa Yezu Kristo, bwabâ na mabanza ma mbote* ma luta songela.