Marke

8 Mu bilumbu bîna, kwavutu bâ yungi dia bantu diavukana pene-pene na Yezu mpe ka babâ na tima tia dia ko. Buna watâ mbila milongoki mpe wabatêla: 2 “Tiari tie nani mu bungu dia pôka dia bantu, mu bungu ti bilumbu bitatu bifweni tûka ti bê na meno mpe ka bena na tima tia dia ko. 3 Namana ba karisa ku nzo zawu na nsatu, mbo babwa mu nzila, mpe bakaka mu bawu mala batûkiri.” 4 Kâ milongoki miandi miamuvuturila: “Kwe tubakila mampa ma fwanana mu mbuka yi ya hengama mu yukutisa bantu ba?” 5 Buna wabatêla: “Mampa makwa me neno?” Bawu batâ: “7.” 6 Mpe walomba kwe pôka dia bantu mu zakala ha mutoto. Buna wabonga mampa ma 7, wasa lusambulu lwa matondo, wabukuna mo, mpe wabatika mu hana mo kwe milongoki miandi ngatu babakabila mo, mpe bawu bakaba mo kwe pôka dia bantu. 7 Bala ba mbizi mpe biabâ nawu, mpe bu kasakumuna bio, wabatêla mu kaba bio mpe. 8 Buna badia mpe bayukuta mpe bafulusa bitunga bia 7 mu bima biasârila. 9 Kampe babakala 4 000 babâ. Ha manima wabakarisa.

10 Hô nkatika bendo wanaka mu bato na milongoki miandi mpe batula ku tizunga tia Dalmanuta. 11 Kûna, Bafarize bayiza mpe babatika mu zonza na yandi. Mpe mu mu tonta balomba tidimbu tiaketi tûka ku zulu. 12 Watomo humuna mpe watâ: “Mu bungu dia nti mbandu yi yita kwama kwe dingi tidimbu? Wa matieleka nita lu têla, mbandu yi ka bahana yo tidimbu ko.” 13 Ha manima wabasisa, wanaka mu bato mpe wayenda ku simu diakaka.

14 Kâ milongoki miazimbakana mu nata mampa. Ka babâ na tima ko tia dia mu bato, diambu’eti dimpa dimosi. 15 Yezu watomo ba lwengesa, bu katâ: “Bêno na meso ma tia mpe seno keba mu levire ya Bafarize na mu levire ya Erode.” 16 Buna babatika mu disikita bawu na bawu mu bungu ti ka babâ na mampa ko. 17 Bu kamona bo, wabatêla: “Mu bungu dia nti luta disikitila mu bungu ti ka lwena na mampa ko? Ngano ka lweka’eti tomo bakula ko? Ngano mitima mieno mande miena mu bakula? 18 ‘Ni bu sa ti meso me neno, kâ ka luta mona ko; mpe ni bu sa ti makutu me neno, kâ ka luta wâ ko?’ Ngano ka luta bambuka ko, 19 bu nabukuni mampa matanu mu bungu dia babakala 5 000? Bitunga bi kwa lwafulusa mu bibuku biasâla?” Bamutêla: “12.” 20 “Bu nabukuni mampa 7 mu bungu dia babakala 4 000, lutangu lwa bitunga bia binene bi kwa lwafulusa mu bibuku biasâla?” Mpe bamutêla: “7.” 21 Buna wabatêla: “Ngano ka lweka’eti bakula ko?”

22 Mpe batula ku Betisayida. Kûna, bamunatina muntu wafwa meso mpe bamulemberela mu mu simba. 23 Wasimba muntu wafwa meso mu koko mpe wamunata ku mbazi ya hata. Bu kamana mu loborela mante mu meso, wamutenseka moko mpe wamuyula: “Ngano tima ta mona?” 24 Muntu wo watala mpe watâ: “Bantu nita mona, kâ ntiana miti mita kwe yende nita ba mwina.” 25 Yezu wavutu tenseka moko mandi ha zulu meso ma bakala dio, mpe bakala dio diatomo mona. Meso mandi mawasa mpe wabâ na lenda diamona bima biabiansoni bubote. 26 Buna wamukarisa ku nzo’andi, bu kamutêla: “Kukotandi ku hata.”

27 Buna Yezu na milongoki miandi bayenda ku mahata ma Sezarea ya Filipe, mpe mu nzila wabatika mu yula kwe milongoki miandi, bu katâ: “Mu bungu dia bantu, meno nani ndiena?” 28 Bawu bamutêla: “Bakaka mbo batâka Za Tibatisi, bakaka Eliya, mboko bakaka wumosi wa bambikuri.” 29 Mpe wabayula tiyuvu: “Kwe beno, meno nani ndiena?” Piere wamuvuturila: “Nge ni Kristo.” 30 Buna watomo ba yimina mu lembo mu zonzela na kani kwe muntu. 31 Mpe wabatika mu ba longesa ti Mwana muntu fweti mona mpasi zazingi, mbo bamulosa kwe bakuluntu, kwe mfumu za banganga-nzambi na bitsoniki, mbo bamuhonda, kâ bilumbu bitatu ha manima mbo kavumbuka kwe ba fwa. 32 Diangana, watomo ba zonzela musamu wango. Kâ Piere wamubenda ha ndeko mpe wabatika mu mu semba. 33 Buna wabaluka, watala milongoki miandi mpe wabamina Piere bu katâ: “Yôka ku manima mani Satana! mu bungu ti mabanza maku ka mena mabanza ma Nzambi ko, kâ ma bantu.”

34 Buna watâ mbila pôka dia bantu na milongoki miandi mpe wabatêla: “Tala ti muntu zololo mu kundanda fweti tikala yandi beni, fweti bonga poto diandi dia matimuna* mpe katatamana mu kundanda. 35 Wô zololo mu vûkisa luzingu* lwandi mbo kahombesa lo, kâ wô hombesa luzingu* lwandi mu bungu dia meno na mu bungu dia nsangu za mbote mbo kavûkisa lo. 36 Diangana, ntia ndandu muntu kalendi baka bu kabiarila nza yayansoni, na bu kahombesa luzingu* lwandi? 37 Peleko muntu nti kalendi hana mu yingasa luzingu* lwandi? 38 Mu bungu ti wô mona nsoni mu bungu dia meno na mu bungu dia misamu mi nitâka mu mbandu yi ya bunsuza* na ya sumuka, Mwana muntu mpe mbo kamona nsoni za yandi bu kakwiza mu mukembo wa Tata’andi na mbazi za santu.”