Marke

9 Musamu wakaka, Yezu wabatêla: “Wa matieleka nita lu têla, bakaka mu bô batelamane hâ, ka babimba lufwa ko, tii bu batoko mona Timfumu tia Nzambi tiziri na ngolo.” 2 Bilumbu 6 ha manima, Yezu wanata Piere, Zaki na Za ha zulu mongo wumosi wa wula, ha bawu kaka. Mpe wasoba mu mpila’andi ya monekena ha matu mawu; 3 binkuti biandi biabatika mu hezima, mpe biayizi bâ bia nkatika bia mpembe. Mpembe ya mpila yo ka kwena muntu ko mu bô basukulaka binkuti ha mutoto lendi ya baka. 4 Mpe Eliya na Mose baduka, mpe babatika mu zonza na Yezu. 5 Buna Piere watâ kwe Yezu: “Rabi, bubote bwena bu twe hâ, bîka ti tatelamasa bivula bitatu, timosi tia nge, timosi tia Mose mpe timosi tia Eliya.” 6 Ka zaba ko bwe kaketi sa, mu bungu ti bunkuta bwabwingi bweri nawu. 7 Tuti diayilama, diabayabama, mpe zu diatûka ha tuti dio diatâ: “Wu ni Mwana’ani, wu ntomono zolo. Mu wirikileno.” 8 Bu batala ha mbuka yi beri, mu ta-pulukusu bamona ti ka ha sâla muntu ko, kâ Yezu kwa.

9 Bu beri kôkaka mongo, wabatuma mu ngolo mu lembo zonzela misamu mi bamona kwe muntu, tii Mwana muntu bu kaketi vumbuka kwe ba fwa. 10 Balunda misamu mio mu mitima miawu, kâ bazonza bawu na bawu mu zaba bwe mvumbukulu ya ba fwa yeri zolo tâka. 11 Mpe babatika mu mu yula: “Mu bungu dia nti bitsoniki bitêlaka ti Eliya fweti toko kwiza?” 12 Wabatêla: “Eliya fweti toko kwiza mu karisa bima biabiansoni; kâ mu bungu dia nti batsoneka mu bungu dia Mwana muntu ti fweti mona mpasi zazingi, mpe bafweti mu vweza? 13 Kâ nilutêlele ti Eliya, diangana, wayiza, mpe bamuyirika misamu miamiansoni mi bazolo buna bu batsonekena mio mu yandi.”

14 Bu batula he milongoki miakaka, bamona yungi dia bantu diabazungirila na bitsoniki bieri zonzaka na bawu. 15 Kâ buna kwa yungi dia bantu bu diamona Yezu, bayituku mpe badioka kwe yandi mu mu hana mbote. 16 Buna wabayula: “Ntia musamu luta zonzelaka na bawu?” 17 Mpe wumosi ha kati diawu wamuvuturila: “Mulongi, mwana’ani wa bakala nikunatinini mu bungu ti mpeve yisaka ti kabâ baba ye nandi. 18 Ntangu zazansoni bu yimusimbaka, ha mutoto yimubwisaka, fulu dimudukaka mu munwa, mêno katatikaka mpe ka vutu’â sâlaka na ngolo ko. Ndombele kwe milongoki miaku mu kuma yo, kâ ka balendele’â ko.” 19 Yezu wabavuturila: “Ô mbandu yikondolo timinu, tii ntia ntangu mfweti tatamana mu bâ na beno? Tii ntia ntangu mfweti lu korela? Mu nateno he meno.” 20 Buna bamunatina mwana wa bakala, kâ mpeve bu yamumona, yaningasa mwana mu mpila ya mbi. Mwana wabwa mpe wabatika mu vindumuka ha mutoto na mu dukisa fulu mu munwa. 21 Buna Yezu wayula kwe tata dia mwana wo: “Tûka ntia ntangu wumuturilaka?” Yandi watâ: “Tûka buleke bwandi, 22 mpe vula-vula, ku tiya na mu mamba yimulosaka mu mu nimba. Kâ tala ti lendi sa tima, tu fwila tiari mpe tu bakisa.” 23 Yezu wamutêla: “Mu bungu dia nti têlele ‘Tala ti lendi’? Miamiansoni milendi bâ kwe muntu wê na timinu.” 24 Hô nkatika bendo, tata dia mwana wo wakawula mpe watâ: “Timinu tie nani! Kumbakisa hô ha ndembolo na timinu!”

25 Yezu bu kamona ti yungi dia bantu he yandi dieri kwizaka, wabamina mpeve ya mbi bu kamutêla: “Nge mpeve yisaka ti muntu kabâ baba mpe kafwa makutu, nikulombele mu duka mu yandi na mu lembo vutu mu kotela!” 26 Bu kamana kawula mpe bu kaningasa mwana mu mpila ya mbi, mpeve yo yaduka, mpe mwana wamoneka ntiana’eti yandi wafwa, buna bantu babingi babatika mu tâ: “Fwiri!” 27 Kâ Yezu wamusimba mu koko, wamutelamasa, mpe yandi watelama. 28 Buna, bu bamana kota mu nzo yimosi, milongoki miandi miamuyula ha bawu kaka: “Mu bungu dia nti tulembolo lendela mu kuma yo?” 29 Wabatêla: “Mpeve ya mpila yi, mu lusambulu kwa bakuminaka yo.”

30 Bakatuka kûna mpe basabuka Galile, kâ ka zolo’â ko ti na kani muntu kazaba wo. 31 Mu bungu ti milongoki miandi keri longesaka mpe bawu keri têlaka: “Mwana muntu mbo bamuteka ha moko ma bantu, mpe mbo bamuhonda, kâ ntono lufwa lwandi, bilumbu bitatu ha manima mbo kavumbuka kwe ba fwa.” 32 Kâ, ka babakula musamu wu katâ ko, mpe bunkuta bwabâ nawu mu mu yula.

33 Mpe batula ku Kafarnawome. Bu kabâ mu nzo, wabayula tiyuvu: “Ntia musamu luta zonzelaka mu nzila?” 34 Ka batâ na kani musamu ko, mu bungu ti mu nzila musamu wu beri zonzelaka ni wa zaba nani yôkele bunene mu bawu. 35 Buna wazakala, watâ mbila ba 12 mpe wabatêla: “Tala ti muntu zololo mu bâ wa ntete, fweti bâ wa mansukina mu babansoni mpe fweti bâ tisari tia babansoni.” 36 Ha manima wabonga mwana wa fioti, wamutelamasa ha kati diawu; watûla moko mandi ha mahembo mandi mpe wabatêla: 37 “Wô bwana wumosi mu bala eba ba fioti mu bungu dia nkumbu’ani, ni meno kwa mpe kabweni; mpe wô kumbwana, kumbweni meno, kâ mpe bweni wô wakuntambikiri.”

38 Za wamutêla: “Mulongi, muntu tamweni wabele kumaka bademo mu nkumbu’aku, mpe tadingiri mu mu yimina mu bungu ti ka tulandaka ko.” 39 Kâ Yezu watâ: “Ka luyêlandi mu mu yimina, mu bungu ti ka kwena muntu ko lendi sa timangu mu nkumbu’ani, mpe bâ na manzangu ma kunzonzela bubi. 40 Mu bungu ti wô lembo tu telamanaka, na beto kena. 41 Mpe wô lu hana kopa dia mamba ma nwa mu bungu ti bantu ba Kristo lwena, matieleka nita lu têla, kani kabwe ka hombesa musendo’andi ko. 42 Kâ wô têsa kuba wumosi mu bala ba bê na timinu, bubote bamukanga ha laka tari di banikinaka mbutu di zungasaka buluku, mpe bamulosa mu mubu.

43 “Tala ti koko kwaku kuba kukutêsaka, zenga ko. Bubote bwena kwe nge bu bakiri luzingu na koko kumosi na bu wele na moko mole ku Zehene,* ku tiya tu balendi lembo honda. 44* —— 45 Mpe tala ti kulu kwaku kuba kukutêsaka, zenga ko. Bubote bwena kwe nge bu bakiri luzingu na kulu kumosi na bu bakulosele na malu mole ku Zehene.* 46* —— 47 Mpe tala ti disu diaku kuba dikutêsaka, losa dio. Bubote bwena bu kotele mu Timfumu tia Nzambi na disu dimosi na bu bakulosele na meso mole ku Zehene,* 48 ku mbuka yi lembo fwaka ntunga na kwe tiya tu balendi lembo honda.

49 “Mu bungu ti muna muntu fweti twa mungwa ku tiya. 50 Mungwa wa mbote wena, kâ tala ti mungwa ka wusiri’â na luwu lwandi ko, na nti balendi lwa mu karisila? Bêno na mungwa mu beno, mpe tatamaneno mu bâ mu tidzunu beno na beno.”