Za

18 Bu kamana tâ misamu mio, Yezu wayenda na milongoki miandi ku simu diakaka dia mudimba wa Kidrone, kwabâ nsaba yimosi, mpe yandi na milongoki miandi bakota kûna. 2 Yuda, muntu waketi mu teka, wazaba mpe mbuka yo, mu bungu ti Yezu ni kô keri vulu bwabanaka na milongoki miandi. 3 Buna Yuda wanata tikunku tia binwani na mfumu za tambika mfumu za banganga-nzambi na Bafarize, mpe bayenda kûna na miti mieri na tiya, minda na binwanunu. 4 Dieka bo, mu bungu ti Yezu wazaba misamu miamiansoni miaketi mu turila, wapusana mpe wabayula: “Nani luta dinga?” 5 Bamuvuturila: “Yezu Musi-Nazarete.” Yandi wabatêla: “Ni meno.” Yuda, wô weri mu tekaka ni hâna mpe katelama na bawu.

6 Kâ Yezu bu kabatêla: “Ni meno,” bakâla manima mpe babwa ha mutoto. 7 Buna wavutu ba yula: “Nani luta dinga?” Bavutula: “Yezu Musi-Nazarete.” 8 Yezu wavutula: “Wa nilutêlele ti ni meno. Buna tala ti ni meno luta dinga, bîkeno bantu ba benda.” 9 Watula, ngatu musamu wu katâ walungana: “Ka nahombese’â na kani wumosi ko mu bô ba wakungeni.”

10 Buna Simo Piere, weri na mbele, wabenda yo, wawinda yo kwe tisari tia mfumu-nganga-nzambi mpe wamuzenga kutu dia lubakala. Nkumbu ya tisari tio yeri Malkuse. 11 Kâ Yezu watâ kwe Piere: “Karisa mbele mu nkutu’andi.* Ngano mbungu* ya kungeni Tata ka mfweti’â nanwa yo ko?”

12 Buna binwani, mfumu ya binwani na mfumu za Bayuda babwila* Yezu mpe bamukanga misinga. 13 Batoko mu nata kwe Ane mu bungu ti buko bwa Kayife bweri, yandi wabâ mfumu-nganga-nzambi muvu wo. 14 Diangana, ni Kayife wawisa Bayuda ti bubote bweri kwe bawu ti muntu wumosi wafwa mu bungu dia kanda.

15 Simo Piere, na mulongoki wakaka, Yezu beri landaka. Mulongoki wûna wa zabakana weri kwe mfumu-nganga-nzambi, mpe wakota na Yezu ku lupangu lwa mfumu-nganga-nzambi, 16 kâ Piere ku mbazi katelama ha mwelo. Buna mulongoki wo wakaka, wa zabakana kwe mfumu-nganga-nzambi, waduka, wazonza na tisari tieri kêlaka mwelo mpe bakotesa Piere. 17 Buna tisari tia tikento tieri kêlaka mwelo tiatâ kwe Piere: “Nge mpe ka wena wumosi wa milongoki mia muntu wu ko?” Yandi watâ: “Ka meno’â ko.” 18 Bisari na minkengi ha ndeko tiya twa nkuni tu banamisa batelama mpe yetela beri yetelaka mu bungu ti tiozi tieri kô. Piere mpe na bawu katelama mpe yetela keri yetelaka.

19 Buna mfumu ya banganga-nzambi yayula biyuvu kwe Yezu bitariri milongoki miandi na ndongosolo’andi. 20 Yezu wamuvuturila: “Kwe nza nazonzele ha meso ma bantu. Ntangu zazansoni ku sinagoge na ku tempelo ndieri longesaka, ku vukanaka Bayuda babansoni, mpe ka natêle’â na kani musamu ko mu mansweki. 21 Mu bungu dia nti ta kundiurila biyuvu? Yula kwe bô bawâ misamu mi nabatêla. Bawu bazebi bwe natâ.” 22 Bu kamana tâ misamu mio, wumosi wa minkengi watelama hâna wakamuna Yezu mbata ku tidiri mpe watâ: “Yo ni mvutu yita hana kwe mfumu ya banganga-nzambi?” 23 Yezu wamuvuturila: “Tala ti musamu wa mbi ntêle, hana timbangi mu bungu dia musamu wa mbi; kâ tala ti matieleka ntêle, mu bungu dia nti ta kuntwila?” 24 Buna Ane wamutambika wa kangama mu misinga kwe mfumu-nganga-nzambi Kayife.

25 Simo Piere ni hâna katelama mpe yetela keri yetelaka. Buna bamutêla: “Nge mpe ka wena wumosi wa milongoki miandi ko?” Wakala bu katâ: “Ka ndiena wumosi mu bawu ko.” 26 Wumosi wa bisari bia mfumu-nganga-nzambi, wô wabâ kanda na muntu wu bazenga kutu kwe Piere, watâ: “Ka nge’â ko mweniki ku nsaba na yandi?” 27 Kâ Piere wavutu kala, mpe hô nkatika bendo nsusu yakuba.

28 Ha manima bakatula Yezu kwe Kayife mpe bamunata ku nzo ya guvernere. Nkatika pari tieri. Kâ Bayuda bawu beni ka bakota mu nzo ya guvernere ko, ngatu balembo bâ mvindu mpe babâ na lenda dia dia Pake. 29 Buna Pilate waduka ku mbazi kwe bawu mpe watâ: “Ntia musamu luta fundila bakala di?” 30 Bamuvuturila: “Tala ti bakala di ka diena munsa-mbi ko, ngâ ka tuketi’â mu nata kwe nge ko.” 31 Buna Pilate wabatêla: “Mu bongeno beno beni mpe mu fundiseno tintwari na musiku’eno.” Bayuda bamutêla: “Ka twena na nswa ko wa honda muntu.” 32 Watula, ngatu musamu wa tâ Yezu walungana, bu kazonzela mpila yi kaketi fwila.

33 Buna Pilate wavutu kota mu nzo ya guvernere, watumisa Yezu mpe wamuyula: “Ngano nge ni Mutinu wa Bayuda?” 34 Yezu wamuvuturila: “Ngano misamu mi ta tâ kwe nge beni mitûkiri peleko bantu bakaka bakutêlele mio mu meno?” 35 Pilate wavutula: “Ka ndiena Muyuda ko, ka buna ko? Kanda dia nge beni na mfumu za banganga-nzambi bakuheni ha moko mani. Ntia musamu yirikiri?” 36 Yezu wavutula: “Timfumu tiani ka tiena tia nza yi ko. Tala ti Timfumu tiani tia nza yi tibêle, bisari biani mbo biketi nwana ngatu balembo kunteka kwe Bayuda. Kâ tala, Timfumu tiani ka tiena tia kû ko.” 37 Buna Pilate wamutêla: “Dieka bo, nge mutinu wena?” Yezu wavutula: “Nge beni ta tâ ti mutinu ndiena. Ni mu bungu dia musamu ewu nabutukila, mpe ni mu bungu dia musamu ewu nayizila mu nza: mu tâ timbangi mu matieleka. Bô babansoni bê ku lweka lwa matieleka zu diani bawâka.” 38 Pilate wamutêla: “Ngano matieleka ni nti?”

Bu kamana tâ misamu mio, wavutu duka kwe Bayuda mpe wabatêla: “Ka nita mona musamu ko wu bamuzengela mambu. 39 Musamu wakaka, tikulu tiena kwe beno ti nayambula muntu mu tilumbu tia Pake. Buna, ngano luzololo nayambula mutinu wa Bayuda?” 40 Bavutu kawula: “Ka yandi’â ko, kâ Barabase!” Barabase timpumbulu tieri.