Marke

14 Bilumbu biole biasâla ntete Pake na Malaki ma Mampa Malembo Levire. Mpe mfumu za banganga-nzambi na bitsoniki mpila yi baketi mu tambila mutambu* mu mu bwila* na mu mu honda beri dingaka; 2 mu bungu ti ebu beri tâka: “Ka mu ntangu ya malaki’â ko, tala kâni kulendi bâ vwandi ha kati dia bantu.”

3 Bu kabâ ku Betani, bu keri diaka* mu nzo ya Simo munkwa-bwazi, mukento wumosi wayiza na mbwata ya albatre, yeri na mafuta ma nsunga ya mbote ma ntalu yayingi, nare* ya nkatika yawu. Wazibula mbwata ya albatre, mpe wabatika mu tsamuna mo ha mutu wa Yezu. 4 Kâ bakaka, na nkesi zazansoni, batâ bawu na bawu: “Mu bungu dia nti bata bebesela mafuta mo ma mbote? 5 Mu bungu ti mafuta mo ma nsunga ya mbote, balendi ma tekela mu ntalu ya denie* yôka 300, mpe baheni mbongo kwe bamputu!” Mpe batomo mu bakila nkesi* mu musamu wo. 6 Kâ Yezu watâ: “Mu bîkeno kwandi. Mu bungu dia nti luta mu kanzakasa? Musamu wa mbote kakundirikiri. 7 Mu bungu ti mbo lubâ na bamputu ntangu zazansoni, mpe lulendi ba yirika mbote buna bu luzololo, kâ ka lubâ nani ko ntangu zazansoni. 8 Yandi siri mio mi kalendele. Tsamuni mafuta ma nsunga ya mbote mu nitu’ani mu kunkubika mu bungu dia ndiamunu’ani. 9 Wa matieleka nita lu têla, kwakwansoni ku bazonzela nsangu za mbote mu nza, mbo bazonzela mpe misamu mi yirikiri mukento wu mu mu bambukila moyo.”

10 Mpe Yuda Iskariote wumosi mu ba 12, waye monekena mfumu za banganga-nzambi mu ba tekela Yezu. 11 Bu bawâ bo, nsayi yababaka, mpe bakanisina mu mu hana mipata mia arza. Buna wabatika mu dinga ntangu mu mu teka.

12 Mu tilumbu tia ntete tia mampa malembo levire, tilumbu ti beri hanaka mukayulu wa Pake, milongoki miandi miamutêla: “Kwe zololo twenda mpe takubikila misamu ngatu wadia Pake?” 13 Buna watambika milongoki miandi miole mpe wabatêla: “Yendeno mu mumvuka, mpe bakala dimosi die na yuki dia mamba dikwizi lu bwana. Mu landeno, 14 mpe kûma ni kûma ku kakota, têno kwe mfumu ya nzo, ‘Mulongi têle: “Mbuka yi nidîla Pake na milongoki miani kwe yena?”’ 15 Mpe mbo kalusongela shambre ya ku zulu, ya sârila, ya kutama na ya yiluku. Ni kûna lutukubikila bidia bia Pake.” 16 Buna milongoki miayenda, miakota mu mumvuka, miamona misamu buna bu kabatêla, mpe bakubika Pake.

17 Mpimpa bu yamana tula, wayiza na ba 12. 18 Bu balambalala ha meza mpe bu beri diaka, Yezu watâ: “Wa matieleka nita lu têla, wumosi mu beno wuta dia na meno kunteka.” 19 Babatika mu bâ mu tiari, mpe mosi na mosi mu bawu wamutêla: “Ka meno’â ko, ka buna ko?” 20 Yandi wabatêla: “Ni wumosi mu beno ba 12, wô ta vwika koko kwandi na meno mu ndonga. 21 Mu bungu ti Mwana muntu ni mwendo’andi ntiana bu batsoneka wo mu yandi, kâ tiari kwe muntu wô teka Mwana muntu! Mbo wuketi bâ bubote kwe yandi tala ti ka butuka ko.”

22 Mpe bu beri tatamanaka mu dia, wabonga dimpa, wasambila, wabukuna dio mpe wabahana dio bu katâ: “Bongeno dio; nitu’ani dita monekesa.” 23 Wabonga mpe mbungu,* wavutula matondo, wabahana yo mpe banwa yo babansoni. 24 Mpe wabatêla: “Yimonekese ‘menga mani ma luwawanu,’ matsamuka mu bungu dia bantu babingi. 25 Wa matieleka nita lu têla, kani kabwe, ka nivutu’â nwa vinu yi ko, tii tilumbu ti nivutu ya nwa mu Timfumu tia Nzambi.” 26 Ku nsuka, bu bamana tanga mikunga mia mukembo, bayenda ku Mongo wa miti mia Olive.

27 Mpe Yezu wabatêla: “Beno bansoni mbo lutâ makuba, mu bungu ti watsonama: ‘Mbo nitwa muvungi, mpe bimeme mbo bimwangana.’ 28 Kâ bu nimana vumbuka kwe ba fwa, mbo nilutekerela ku Galile.” 29 Kâ Piere wamutêla: “Ni bu sa ti babansoni batêle makuba, meno ka nitâ kuba ko.” 30 Buna Yezu wamutêla: “Wa matieleka nita ku têla, lumbu ti, yee, mpimpa yi ntete nsusu yakuba mbala zole, mbo kunkala mbala tatu.” 31 Kâ watatamana mu tâ: “Ni bu sa ti mfweti fwa na nge, kani kabwe ka nikukala ko.” Bakaka ni bo kwa mpe babatika mu tâ.

32 Buna bayenda ku mbuka yi batâka Getesemane, mpe watâ kwe milongoki miandi: “Zakaleno ha bu nita kwe sambila.” 33 Wanata Piere, Zaki na Za, mpe wayizi bâ na tiari tiatingi mpe na lwaka lwa ngolo. 34 Wabatêla: “Tiari tie nani,* ntiana me nifwa. Sâleno ha mpe tatamaneno mu tiesa disu.” 35 Bu kayenda mwa mala, wafukama ha mutoto, mpe wasambila ngatu tala ti bulendi bâ, musamu waketi mu turila wayôka mala na yandi. 36 Mpe watâ: “Aba,* Tata, misamu miamiansoni milendi bâ kwe nge; katula mbungu yi he meno. Kâ, ka ntiana bu nzololo’â ko, kâ ntiana bu zololo nge.” 37 Wakâla mpe wababwana ku tolo, watâ kwe Piere: “Simo, ngano tolo ta bwa? Kubakiri’â ngolo za tiesa disu ko na kani heure yimosi? 38 Tieseno disu mpe tatamaneno mu sambila ngatu lwalembo kota mu ntontolo. Diangana mpeve yizololo mu sala, kâ musunia ka wena ngolo ko.” 39 Wavutu kwenda mu sambila, mpe misamu ni mio kwa kavutu tâ. 40 Wavutu kâla mpe wababwana ku tolo mu bungu ti meso mawu dema meri. Buna ka bazaba mvutu yi baketi mu hana ko. 41 Wavutu kâla mbala ya ntatu mpe wabatêla: “Mu ntangu ya mpila yi tolo luta bwa mpe huma luta huma! Wufweni! Ntangu yituriri! Tala! Mwana muntu teka bata mu teka ha moko ma bisumuki. 42 Telameno, tokoeno. Tala! Muntu wukunteka weka pene-pene.”

43 Bu keri zonzaka, hô nkatika bendo, Yuda, wumosi mu ba 12, watula na pôka dia bantu beri na mbele na mibota. Mfumu za banganga-nzambi, bitsoniki mpe na bakuluntu babatambika. 44 Muntu wamuteka wabahana tidimbu ti kaketi sarila, bu katâ: “Wô wu nihana bize, ni yandi; mu kangeno. Mpe seno mayela bu lumunata.” 45 Mpe mbala mosi wapusana he yandi mpe watâ: “Rabi!” Mpe wamuhana bize ya lembama. 46 Buna bamubwila mpe bamukanga. 47 Kâ wumosi mu bô babâ hâna wabenda mbele’andi, mpe wawinda yo kwe ngamba ya mfumu-nganga-nzambi mpe wamuzenga kutu. 48 Kâ Yezu wabavuturila: “Ngano meno lwizi kanga na mbele na mibota ntiana mwivi? 49 Bilumbu biabiansoni na beno ndieri mu tempelo mu longesa, kâ ka lwakunkanga ko. Kâ misamu mi mitûriri ngatu Matsonoko malungana.”

50 Mpe babansoni bamuyambirika mpe badioka. 51 Kâ ntwenia yimosi ya bakala yalwata kwa tinkuti tia line ya toma yabatika mu mu landa ha manima, mpe badinga mu mu bwila, 52 kâ wasisa tinkuti tiandi tia line mpe wadioka timpene.*

53 Banata Yezu kwe mfumu-nganga-nzambi, mpe mfumu za banganga-nzambi zazansoni, bakuluntu na bitsoniki bavukana. 54 Kâ Piere, ha titini tia mwa tia tila, yandi keri kwe landi tii ku kati dia lupangu lwa mfumu-nganga-nzambi; kûna wazakala na bisari bia nzo, mpe tiya beri yetelaka. 55 Mfumu za banganga-nzambi na Sanedre yayansoni timbangi beri dingaka mu Yezu ngatu bamuhonda. Kâ ka babaka tima ko. 56 Diangana, bantu babingi beri tâka bimbangi bia bungungu mu yandi, kâ bimbangi biawu ka bieri’â kwelanaka ko. 57 Buna, bakaka batelama mpe batâ timbangi eti tia bungungu mu yandi: 58 “Yandi tawîri bu kabele tâka, ‘Mbo nimwangasa tempelo yi batunga mu moko ma bantu, mpe mu bilumbu bitatu mbo nitunga yakaka yi balembo tunga mu moko ma bantu.’” 59 Kâ mu musamu wo mpe, bimbangi biawu ka bieri’â kwelanaka ko.

60 Buna mfumu-nganga-nzambi watelama ha kati diawu, mpe wayula Yezu: “Kuta tâ musamu ko? Ngano misamu mi ta tâ babakala eba mu nge mia ta wâ?” 61 Kâ ka tâ na kani musamu ko, mpe ka hana na kani mvutu ko. Mfumu-nganga-nzambi wavutu batika mu mu yula tiyuvu, bu kamutêla: “Ngano nge ni Kristo, Mwana wa Wô wa sakumunu?” 62 Buna Yezu watâ: “Ni meno; mpe mbo lumona Mwana muntu wuzakala ha koko kwa lubakala kwa wô wê na ngolo mpe kwiza na matuti ma ku zulu.” 63 Buna mfumu-nganga-nzambi watenda binkuti biandi, mpe watâ: “Ntia timbangi tiakaka tuta dinga? 64 Mpila yi kafingiri Nzambi ya luwîri. Ntia nzengolo luta bonga?”* Babansoni batâ ti wafweti fwa. 65 Mpe bakaka babatika mu mu loborela mante, bamuyabika tidiri, bamuwinda nkomi, mpe bamutêla: “Bikula!” Minkengi mia tribinale miamutiatuna mbata, mpe miamunata.

66 Piere bu keri ku banda, ku kati dia lupangu, tisari timosi tia tikento tia mfumu-nganga-nzambi tiayiza. 67 Bu kamona Piere weri yetelaka, wamusungamana mpe watâ: “Nge mpe na Yezu, Musi-Nazarete weri.” 68 Kâ wakala bu katâ: “Ka nimuzebi’â ko, mpe ka nita bakula musamu wuta tâ ko,” buna waduka mpe wayenda ha mwelo. 69 Tisari tia tikento bu tiamumona hâna, tiabatika mu tâ kwe bô batelama hâna: “Yandi mpe wumosi mu bawu wena.” 70 Wavutu kala. Mpe ha manima ma mwa ntangu, bô batelama hâna babatika mu vutu tâ kwe Piere: “Diangana, nge mpe wumosi mu bawu wena, mu bungu ti Musi-Galile wena.” 71 Kâ wakala mpe wadia ndefi: “Ka nzebi’â muntu wu luta zonzela ko!” 72 Hô nkatika bendo nsusu yakuba mbala ya nzole. Mpe Piere wabambukila misamu mia mu têla Yezu: “Ntete nsusu yakuba mbala zole, mbo kunkala mbala tatu.” Dieka bo wanôka bito, mpe wabatika mu dila.