Za

21 Ha manima ma musamu wo, Yezu wavutu moneka kwe milongoki ku mubu wa Tiberiade. Mu mpila eyi kamonekena: 2 Simo Piere wabâ hô, Toma (wu beri tâka Dipasa), Natanayele Musi-Kana wa ku Galile, bala ba Zebede na milongoki miole miakaka. 3 Simo Piere wabatêla: “Ndiele loba.” Bamutêla: “Beto mpe na nge tukwenda.” Baduka mpe bayenda mu bato, kâ mpimpa ya mukaka ka babaka tima ko.

4 Kâ, bwisi bu bweri tiaka, Yezu watelama ha ndeko mamba, kâ milongoki ka miabakula ko ti Yezu weri. 5 Buna Yezu wabatêla: “Bala bani, ka lwena na tima* tia dia ko, ka buna ko?” Bavutula: “Kâni!” 6 Wabatêla: “Loseno file’eno* ku lweka lwa lubakala lwa bato mpe mbo lubaka tima.” Buna balosa yo, kâ ka balenda ko mu nakisa yo mu bungu ti mbizi zazingi zabâ. 7 Buna, mulongoki Yezu wu keri tomo zoloko watâ kwe Piere: “Mfumu wena!” Simo Piere, mu bungu ti wawâ ti Mfumu weri, walwata tinkuti tiandi tia zulu mu bungu ti timpene* keri, mpe wabwa mu mamba. 8 Kâ milongoki miakaka mu bato ya fioti bayiza bu beri kwe koke file ya fuluka mu mbizi, mu bungu ti ka babâ mala na mutoto ko, kampe ha 90 m* kwa beri.

9 Bu batula ha mutoto, bamona tiya twa makala na mbizi ha zulu mpe na mampa. 10 Yezu wabatêla: “Nateno mwa mbizi zi lubakiri ngabu yi.” 11 Buna Simo Piere wanaka mu bato mpe wabenda file ya fuluka mu mbizi za zinene; kampe 153 zeri. Mpe ni bu sa ti zazingi zeri, file ka yatendoka ko. 12 Yezu wabatêla: “Yizeno lwadia.” Na kani mulongoki wumosi wabâ na butindi bwa mu yula: “Nge nani wena?” mu bungu ti bazaba ti Mfumu weri. 13 Yezu wayiza, wabonga dimpa mpe wabahana dio mpila mosi mpe na mbizi. 14 Mbala ya ntatu yeri, Yezu yi kamoneka kwe milongoki ha manima ma mvumbukulu’andi kwe ba fwa.

15 Bu bamanisa mu dia, Yezu watâ kwe Simo Piere: “Simo mwana wa Za, ngano meno zololo yôka biawu bi?” Yandi wamuvuturila: “Yee, Mfumu, zebi ti nge ntomono zolo.” Yezu wamutêla: “Dikila bimeme biani.” 16 Wavutu mu yula mbala ya nzole: “Simo mwana wa Za, ngano meno zololo?” Yandi wamuvuturila: “Yee, Mfumu, zebi ti nge ntomono zolo.” Yezu wamutêla: “Kipa bimeme biani bia fioti.” 17 Wavutu mu yula mbala ya ntatu: “Simo mwana wa Za, ngano meno zololo?” Piere tiari tiamubaka mu bungu ti bamuyula mbala tatu: “Ngano meno zololo?” Buna wamuvuturila: “Mfumu, miamiansoni mia zebi; zebi ti nge ntomono zolo.” Yezu wamutêla: “Dikila bimeme biani bia fioti. 18 Nkatika matieleka nita ku têla, bu weri nkatika ntwenia, nge beni weri lwataka binkuti mpe kwakwansoni ku weri zoloko weri kwendaka. Kâ bu kwizi nuna, mbo lambula moko mpe muntu wakaka mbo kakulwika binkuti mpe mbo kakunata kô ku lembolo zolo.” 19 Watâ misamu mio mu songela mu ntia mpila lufwa Piere kaketi kembela Nzambi. Bu kamana tâ bo, wamutêla: “Tatamana mu kundanda.”

20 Piere wabaluka mpe wamona ti mulongoki Yezu wu keri tomo zoloko bawu keri landaka, ni yandi waseka ha ntulu ya Yezu bu beri diaka mu nkokela mpe watâ: “Mfumu, nani ku teka?” 21 Buna bu kamumona, Piere watâ kwe Yezu: “Mfumu, nti biturila bakala di?” 22 Yezu wamutêla: “Tala ti nzololo katatamana mu bâ wa moyo tii bu nikwiza, bwe wuta ku tarila? Nge, tatamana mu kundanda.” 23 Buna musamu wu katâ wamwangana ha kati dia bampangi ti mulongoki wo ka keti’â fwa ko. Kâ Yezu ka mu têla ko ka keti’â fwa ko, kâ watâ: “Tala ti nzololo katatamana mu bâ wa moyo tii bu nikwiza, bwe wuta ku tarila?”

24 Ni mulongoki wo kwa watâ timbangi mu misamu mi mpe watsoneka mio, mpe tuzebi ti timbangi tiandi tia matieleka tiena.

25 Diangana, misamu miamingi miakaka mie kô mia yirika Yezu; tala ti batsonekene mio mosi na mosi, mbenzi ti nza yawu beni ka yaketi’â lenda ko mu lunda rulo za tsonoko.