Wa ntete kwe Bisi-Korente
4 Bantu bafweti tu bongela ntiana bisari bia Kristo na bantu balundaka mansweki ma santu ma Nzambi. 2 Mu musamu wo, tima ti bakêlaka kwe bantu balundaka tima ni tiena’eti bafweti bâ ba kwikama. 3 Dieka bo, kwe meno, ka wena mfunu ko lwakuntaluzula peleko tribinale ya bantu yakuntaluzula. Diangana, me beni ka nititaluzulaka ko. 4 Ka nita banza ko ti musamu wa mbi ndirikiri. Kâ ka wuta zolo tâ ko ti wa sungama ndiena. Wô kuntaluzulaka ni Yehova.* 5 Buna, ka lufundisandi na kani tima ntete ntangu yatula, tii Mfumu bu kakwiza. Mbo kanata ku mutsamina bima bia swekama ku mpimpa, mbo kazabikisa mabanza ma mitima, mpe ha manima muna muntu mbo kabaka mukembo’andi wutûka kwe Nzambi.
6 Bampangi, misamu mio ntêle mu me beni na mu Apolose mu bungu dia mbote’eno, ngatu mu nzila ya beto lwalongoka musiku ewu: “Ka luyôkesandi ndilu mu misamu miatsonama,” ngatu lwalembo fuluka mu lulendo bu lubanza ti muntu wumosi wuyôkele muntu wakaka mu mfunu. 7 Ngano nti bita ku swasikisa na muntu wakaka? Diangana, nti bie naku bi walembo baka? Dieka bo, tala ti baka wabaka tio, mu bungu dia nti ta tilwonena ntiana’eti ka wabaka tio ko?
8 Ngano lwatiyukutiri? Ngano lwatibakiriri timvwama? Ngano lwabatikiri mu yâla kâ ka na beto’â ko? Wê nani lwabatika mu yâla, buna beto mpe mbo tuyâla tintwari na beno bu tubâ mitinu. 9 Nita banza ti Nzambi watusiri ntumwa ku nsuka ntiana bantu ba bazengela lufwa, mu bungu ti tayikiri bantu basakasaka nza, kwe bambazi na kwe bantu. 10 Bizoba twena mu bungu dia Kristo, kâ beno ndwenga zê neno mu Kristo; ba nôka twena, kâ beno ngolo zê neno; mukembo lubakaka, kâ beto vweza batuvwezaka. 11 Tii bwawu bu nsatu tuta tatamana mu fwa na nsatu mamba,* ka twena na binkuti bia fwanana ko, nkuba tuta kwe bwe, mpe ka twena na mbuka ya bêla ko, 12 tisalu tia ngolo tusalaka mu moko meto. Bu batufingaka, sakumuna tusakumunaka; bu batukwamisaka, na luvivululu tukorelaka; 13 bu batuhunisinaka misamu, na bulembami tuhanaka mvutu;* tayikiri zala* mu nza, bima bi bakalaka kwe bantu.
14 Misamu mi nita tsoneka, ka mu lu fwisa nsoni’â ko, kâ mu lu lwengesa ntiana bala bani ba ntomono zolo. 15 Ni bu sa ti milongi 10 000 mie neno mu Kristo, ntembe kâni ka lwena na matata mamingi ko; mu bungu ti mu Kristo Yezu, nayizi bâ tata’eno mu nzila ya nsangu za mbote. 16 Buna nilutindisi mu landa tifwani tiani. 17 Ntiangu nita lu tambikila Timote, mu bungu ti mwana’ani wena wu ntomono zolo mpe wa kwikama wena mu Mfumu. Mbo kalubambula mpila zani za sarila* mu wo wutariri Kristo Yezu, ntiana kwa bu nita kwe longese kwakwansoni mu bimvuka biabiansoni.
18 Bakaka bafulukiri mu lulendo bu bata banza ti ka nikwiza kwe beno ko. 19 Kâ, ntangu fioti kwa mbo nikwiza kwe beno tala ti Yehova* zololo, mpe ka nidinga mu zaba misamu mi ta kwe tê bantu bafulukiri mu lulendo ko, kâ ngolo zawu. 20 Mu bungu ti Timfumu tia Nzambi ka titariri’â nzonzolo ko, kâ ngolo. 21 Nti luzololo? Ndiza kwe beno na muti peleko ndiza na luzolo mpe na mpeve ya bulembami?