Matie
28 Ha manima ma Sabala, bwisi bu bweri tiaka mu tilumbu tia ntete tia lumingu, Maria Magdala na Maria diakaka bayenda mu kwe tala mpiema.
2 Mpe tala! Mudikutulu wa wunene wa mutoto watulumuka, mu bungu ti mbazi ya Yehova yatûka ku zulu yayizi vindumuna tari, mpe wazakarala dio. 3 Ntiana mutsamina wa nzazi keri hezimaka, mpe binkuti biandi bia mpembe ntiana neige. 4 Mu bungu ti bunkuta bwabwingi bwayizi bâ nawu, minkengi miateketa mpe miayizi bâ ntiana bawu bafwa.
5 Kâ mbazi yatâ kwe bakento: “Ka lubândi na bunkuta, mu bungu ti nzebi ti Yezu wu bakengi ha poto luta dinga. 6 Kena kô ko, mu bungu ti vumbukiri kwe ba fwa ntiana bu katâ. Yizeno lwatala mbuka yi bamusekese. 7 Yendeno lwakulu têla milongoki miandi ti vumbukiri kwe ba fwa, mu bungu ti lu tekerele ku Galile. Ni kûna lumumwina. Ni wo ndizi lu zabikisa.”
8 Buna na manzangu mamansoni basisa mpiema, mu bunkuta kâ mpe na nsayi yayansoni, badioka mu kwe hana nsangu kwe milongoki miandi. 9 Mpe tala! Yezu wababwana mpe watâ: “Mbote!” Bapusana, bafukama, bakondama ha matu mandi mpe bamusimba mu malu. 10 Buna Yezu wabatêla: “Ka lubândi na bunkuta! Yendeno lwahana nsangu kwe mpangi zani ngatu benda ku Galile mpe ni kûna bakumwina.”
11 Bu babâ mu nzila, minkengi miakaka miakota ku mumvuka mpe miaye zonzela misamu miatula kwe mfumu za banganga-nzambi. 12 Bu bamana vukana na bakuluntu mpe bu bazonza na bawu, mfumu za banganga-nzambi zahana mipata miamingi mia arza kwe binwani 13 mpe batâ: “Têno, ‘Milongoki miandi miziriki mu mpimpa mpe balabiri mvumbi’andi bu tubêleke ku tolo.’ 14 Mpe tala ti wuturiri mu makutu ma guvernere, beto beni mbo tumuwisa mpe ka lubâ na nsatu ko yabâ na bunkuta.” 15 Buna babonga mipata mia arza mpe basa ntiana bu babatêla, mpe tinsamu tio tiayangana ha kati dia Bayuda tii lumbu ti.
16 Dieka bo, milongoki 11 miayenda ku Galile ku mongo, kô kwa ba tikisila Yezu. 17 Bu bamumona, bakondama ha matu mandi, kâ bakaka ntembe zeri nawu. 18 Yezu wapusana mpe wabazonzela, watâ: “Timfumu tiatiansoni bakungeni tio ku zulu na ha mutoto. 19 Buna, yendeno mpe kubikeno milongoki mu bantu ba makanda mamansoni, babatiseno mu nkumbu ya Tata, ya Mwana na ya mpeve santu, 20 balongeseno mu sarila misamu miamiansoni mi nalutumini. Mpe taleno! Mbo nibâ neno bilumbu biabiansoni tii ku nsuka ya nza.”*