Matie
16 Kûna, Bafarize na Basaduseye bapusana kwe yandi, mpe mu mu tonta balomba tidimbu tiaketi tûka ku zulu. 2 Yandi wabavuturila: “Nkokela bu yitulaka, ebu lutâka: ‘Mbazi tilumbu tia mbote tibâ, mu bungu ti zulu dia mbwaki diena,’ 3 mpe mu pari, ‘lumbu ti tiozi tiatingi tibâ kû mpe mvula yinoka, mu bungu ti zulu dia mbwaki diena kâ dia lomba mpe diena.’ Bidimbu bia ku zulu bia luzebi bangula, kâ ka lwena na lenda ko dia bakula misamu mita tula bwawu bu. 4 Mbandu ya mbi na ya bunsuza* tidimbu yita kwe dingi, kâ ka babahana tidimbu ko diambu’eti tidimbu tia Yona.” Dieka bo wayenda mpe wasa ba sisa.
5 Milongoki miasabuka ku simu diakaka mpe miazimbakana mu nata mampa. 6 Yezu wabatêla: “Bêno na meso ma tia mpe seno keba mu levire ya Bafarize na ya Basaduseye.” 7 Buna babatika mu zonza bawu na bawu mpe batâ: “Ka tusiri’â bonga mampa ko.” 8 Mu bungu ti wa kazaba, Yezu watâ: “Mu bungu dia nti luta zonza beno na beno bu lulembolo nata mampa, beno lwe na timinu tia fioti? 9 Ngano ka lweka’eti bakula ko, peleko ka luta bambukila mampa matanu ko mu bungu dia bantu ba 5 000, mpe bitunga bikwa lwafulusi? 10 Peleko ka luta bambukila mampa 7 ko mu bungu dia bantu ba 4 000 na lutangu lwa bitunga bia binene bi lwafulusi? 11 Bwe lulembolo bakurila ti ka mampa ko nita zonzelaka? Kâ seno keba mu levire ya Bafarize na ya Basaduseye.” 12 Dieka bo babakula ti Yezu ebu keri ba têlaka mu sa keba mu ndongosolo ya Bafarize na ya Basaduseye, kâ ka mu levire ya mampa ko.
13 Bu katula ku tizunga tia Sezare ya Filipe, Yezu wayula milongoki miandi: “Mu bungu dia bantu, Mwana muntu nani wena?” 14 Batâ: “Bakaka mbo batâka Za Tibatisi, bakaka Eliya, mboko bakaka Yeremi peleko wumosi wa bambikuri.” 15 Yandi wabatêla: “Kwe beno, meno nani ndiena?” 16 Simo Piere wamuvuturila: “Nge ni Kristo Mwana wa Nzambi ya moyo.” 17 Yezu wamuvuturila: “Nsayi kwe nge Simo, mwana Yona, mu bungu ti ka musunia na menga* ko bikuzabikisi wo, kâ Tata’ani die ku mazulu. 18 Nikutêlele: Nge ni Piere, mpe ha zulu tari di nitungila timvuka tiani, mpe mielo mia Ndiamu* ka minunga tio ko. 19 Mbo nikuhana vungula za Timfumu tia mazulu, mpe tima ni tima ti kanga ha mutoto mbo batikangila tio ku mazulu, mboko tima ni tima ti sutula ha mutoto mbo batisuturila tio ku mazulu.” 20 Ha manima, watomo yimina milongoki miandi mu lembo zabikisa kwe muntu ti yandi ni Kristo.
21 Tûka ntangu yîna, Yezu wabatika mu bangurila milongoki miandi ti wafweti kwenda ku Yerusaleme, wafweti mona mpasi zazingi mu bungu dia bakuluntu, mfumu za banganga-nzambi na bitsoniki, mpe mbo baketi mu honda, kâ tilumbu tia bitatu mbo kaketi vumbuka kwe ba fwa. 22 Buna Piere wamubenda ha ndeko mpe wabatika mu mu semba, bu katâ: “Kutândi musamu wa mpila yo Mfumu, misamu mio ka mikuturila ko.” 23 Bu kamuteka nima, watâ kwe Piere: “Yôka ku manima mani Satana! Nge tari diena ditêsaka kuba, mu bungu ti mabanza maku ka mena mabanza ma Nzambi ko, kâ ma bantu.”
24 Ha manima Yezu watâ kwe milongoki miandi: “Tala ti muntu zololo mu kundanda fweti tikala yandi beni, fweti bonga poto diandi dia matimuna* mpe katatamana mu kundanda. 25 Wô zololo mu vûkisa luzingu* lwandi mbo kahombesa lo, kâ wô hombesa luzingu lwandi mu bungu dia meno mbo kavûkisa lo. 26 Diangana, ntia ndandu muntu kalendi baka tala ti biariri nza yayansoni, kâ hombese luzingu lwandi? Peleko muntu nti kalendi hana mu yingasa luzingu* lwandi? 27 Mu bungu ti Mwana muntu fweti kwiza na mbazi zandi mu mukembo wa Tata’andi, mpe ha manima mbo kasenda muna muntu tintwari na ndiatulu’andi. 28 Wa matieleka nita lu têla, bakaka mu bô batelamane hâ, ka babimba lufwa ko, tii bu batoko mona Mwana muntu wukwiza mu Timfumu tiandi.”