Like

9 Ha manima watâ mbila ba 12 mpe wabahana lenda na lutumu lwa kuma demo zazansoni na lwa wasisa bimbevo. 2 Wabatambika mu samuna Timfumu tia Nzambi na mu wasisa bantu, 3 mpe Yezu wabatêla: “Ka lunatandi tima mu bungu dia nzietolo, ni bu yibâ mbangala, nkutu ya bidia, dimpa, mbongo;* ka lubândi mpe na binkuti biole.* 4 Kâ kwakwansoni ku lukota mu nzo yimosi, bêno mûna na tii bu lukatuka kûna. 5 Kwakwansoni bantu ku balembo lu bwana, bu luduka ku mumvuka wo, kubuleno mfumfuta za malu meno ngatu tiabâ timbangi mu bungu dia bawu.” 6 Ha manima bayenda mu mahata mamansoni bu beri kwe samuni nsangu za mbote, na bu beri kwe wasisi bantu kwakwansoni.

7 Erode,* mfumu ya Galile wawâ misamu miamiansoni miatula, mpe watomo yituku mu bungu ti bantu bakaka ebu beri tâka ti Za vumbukiri kwe ba fwa, 8 kâ bakaka ebu beri tâka, Eliya dukiri, mboko bakaka mosi ya mbikuri za ntama yivumbukiri kwe ba fwa. 9 Erode watâ: “Za yandi nazengese mutu, buna muntu wu nita wîla nsangu zo nani wena?” Buna wadinga mu mu mona.

10 Bantumwa bu bakâla, batâ misamu miamiansoni mi bayirika kwe Yezu. Dieka bo wababonga mpe wabanata ku mumvuka wu batâka Betisayida ngatu babâ ha bawu kaka. 11 Kâ pôka dia bantu bu diazaba wo, diamulanda. Wababwana na nsayi mpe wabatika mu ba zonzela misamu mitariri Timfumu tia Nzambi na mu wasisa bô beri na bimbevo. 12 Ha manima bwisi bwabatika mu yila. Buna ba 12 bayiza mpe bamutêla: “Karisa pôka dia bantu, ngatu benda ku mahata ma manene na ma fioti me pene-pene, ngatu babaka mbuka ya bwila tolo na bima bia dia mu bungu ti mbuka yi twena ya hengama yena.” 13 Kâ wabatêla: “Beno beni ba haneno bima bia dia.” Bawu batâ: “Mampa matanu kwa me neto na mbizi zole, diambu’eti twendi beto beni mu kwe sumba bidia mu bungu dia bantu bo babansoni.” 14 Diangana, kampe babakala 5 000 babâ kô. Kâ yandi watâ kwe milongoki miandi: “Ba zakaseno mu bikunku bia bantu 50.” 15 Ni buna basila, mpe bantu babansoni bazakala. 16 Wabonga mampa matanu na mbizi zole, watala ku zulu mpe wasakumuna bio. Ha manima wabukuna bio, mpe wabatika mu hana bio kwe milongoki miandi ngatu bakaba bio kwe pôka dia bantu. 17 Buna babansoni badia mpe bayukuta, batota bibuku biasâla mpe bafulusa bitunga 12.

18 Ha manima, bu keri sambilaka yandi kaka, milongoki miapusana he yandi mpe yandi wabayula: “Mu bungu dia pôka dia bantu meno nani ndiena?” 19 Bawu bamuvuturila: “Bakaka mbo batâka Za Tibatisi, bakaka Eliya, mboko bakaka ebu batâka mosi ya mbikuri za ntama yi bavumburi kwe ba fwa.” 20 Ha manima, yandi wabayula: “Kwe beno, meno nani ndiena?” Piere wamuvuturila: “Nge ni Kristo ya Nzambi.” 21 Buna wabakebesa mu lembo tâ musamu wo kwe muntu, 22 kâ watâ: “Mwana muntu fweti mona mpasi zazingi, mbo bamulosa kwe bakuluntu, kwe mfumu za banganga-nzambi na bitsoniki, mbo bamuhonda, kâ tilumbu tia bitatu mbo kavumbuka kwe ba fwa.”

23 Ha manima watâ kwe bantu babansoni: “Tala ti muntu zololo mu kundanda fweti tikala yandi beni, fweti bonga poto diandi dia matimuna* lumbu basiri lumbu mpe katatamana mu kundanda. 24 Wô zololo mu vûkisa luzingu* lwandi mbo kahombesa lo, kâ wô hombesa luzingu* lwandi mu bungu dia meno, yandi mbo kavûkisa lo. 25 Diangana, ntia ndandu muntu kalendi baka tala ti biariri nza yayansoni, kâ hombese luzingu lwandi peleko bwabane na mpasi zazingi? 26 Mu bungu ti wô mona nsoni mu bungu dia meno na mu bungu dia misamu mi nitâka, Mwana muntu mbo kamona nsoni za muntu wo bu kakwiza mu mukembo’andi, wa Tata’andi na wa mbazi za santu. 27 Kâ wa matieleka nita lu têla, bakaka mu bô batelamane hâ, ka babimba lufwa ko, tii bu batoko mona Timfumu tia Nzambi.”

28 Diangana, kampe bilumbu 8 ha manima bu katâ misamu mio, wabonga Piere, Za na Zaki mpe banaka ku mongo mu kwe sambila. 29 Mpe bu keri sambilaka, tidiri tiandi tiayizi soba mpe binkuti biandi biayizi bâ mpembe ya ngolo. 30 Mpe tala! babakala bole beri zonzaka na yandi, Mose weri na Eliya. 31 Mu mukembo badukila mpe babatika mu zonzela mwendo’andi waketi salama ku Yerusaleme. 32 Piere na bô bakaka babâ nandi tolo twa ngolo twabâ nawu, kâ bu bavumbuka bamona mukembo’andi na babakala bole batelama nandi. 33 Babakala bo bu beri hambanaka na yandi, Piere watâ kwe Yezu: “Mulongi, bubote bwena bu twe hâ, bîka ti tatelamasa bivula bitatu, timosi tia nge, timosi tia Mose mpe timosi tia Eliya.” Keri’â bakulaka misamu mi keri tâka ko. 34 Kâ bu keri tâka misamu mio, tuti diayilama mpe diabatika mu ba yabama. Bu bakota ku nsi’a tuti, bunkuta bwababaka. 35 Buna zu diatûka ha tuti dio diatâ: “Wu ni Mwana’ani, wu nsôlele. Mu wirikileno.” 36 Zu bu dieri zonzaka, Yezu wasâla yandi kaka. Kâ milongoki miakuta mpe mu bilumbu bîna ka batâ misamu mi bamona ko kwe muntu.

37 Tilumbu tialanda, bu beri kôkaka mongo, pôka dia bantu diayizi bwana Yezu. 38 Mpe tala! bakala dimosi diakawula ha kati dia pôka dia bantu, watâ: “Mulongi, mulemvo’aku, bakisa mwana’ani, mu bungu ti ni wo kwa wê nani. 39 Mpeve yimosi ya mbi yimukotaka mpe mu ta-pulukusu mwana weka kawula. Mpeve yango mu ngolo yimuningasaka, fulu dimudukaka mu munwa mpe mu mpasi yimusisaka bu yimana mu lwekesaka. 40 Ndemberele milongoki miaku mu kuma yo, kâ ka balendele’â ko.” 41 Yezu wavutula: “Ô mbandu yikondolo timinu na ya tengama, tii ntia ntangu mfweti tatamana mu bâ na beno mpe mfweti lu korela? Nata mwana’aku hâ.” 42 Kâ mwana bu weri pusanaka, demo yamulosa ha mutoto mpe yamuningasa mu ngolo. Buna Yezu wabamina mpeve ya mbi, wawasisa mwana wa bakala mpe wamukarisa kwe tata’andi. 43 Bantu babansoni bayituku mu ngolo za nzitukulu za Nzambi.

Bantu babansoni bu beri yitukuku mu misamu miamiansoni mi keri yirikaka, Yezu watâ kwe milongoki miandi: 44 “Tomoeno wirikila mpe bambukileno misamu mi mu bungu ti Mwana muntu mbo bamuteka ha moko ma bantu.” 45 Kâ ka babakula musamu wu keri tâka ko. Diangana babaswekela musamu wango ngatu balembo wa bakula mpe bunkuta bwabâ nawu mu mu yula mu bungu dia musamu wo.

46 Ha manima badisikita mu zaba nani yôkele bunene ha kati diawu. 47 Yezu bu kabakula mabanza mawu, wabonga mwana wa fioti, wamutelamasa pene-pene na yandi, 48 mpe wabatêla: “Wô bwana mwana ewu wa fioti mu bungu dia nkumbu’ani, ni meno kwa mpe kabweni; mpe wô kumbwana, bweni mpe wô kuntambikiri. Mu bungu ti wô diatila ntiana mwana fioti ha kati dia beno bansoni ni yandi yôkele bunene.”

49 Za wamuvuturila: “Mulongi, muntu tamweni wabele kumaka bademo mu nkumbu’aku, mpe tadingiri mu mu yimina mu bungu ti ka ku landaka na beto ko.” 50 Kâ Yezu watâ: “Ka luyêlandi mu mu yimina, mu bungu ti wô lembo lu telamanaka, na beno kena.”

51 Mu bungu ti tilumbu ti kaketi naka ku zulu tiayizi bâ pene-pene,* wayizi bonga nzengolo ya kwenda ku Yerusaleme. 52 Buna watambika binati-nsangu ku matu mandi. Bayenda mpe bakota ku hata dia Bisi-Samaria mu kubika nkwizulu’andi. 53 Kâ ka bamubwana ko mu bungu ti wabonga nzengolo* ya kwenda ku Yerusaleme. 54 Milongoki miandi, Zaki na Za bu bamona bo, batâ: “Mfumu, zololo tatâ mbila tiya twa ku zulu ngatu twabafukisa?” 55 Kâ wabaluka kwe bawu mpe wababamina. 56 Dieka bo bayenda ku hata diakaka.

57 Bu beri kwendaka mu nzila, muntu wamutêla: “Nzololo nakulanda kwakwansoni ku kwenda.” 58 Kâ Yezu wamuvuturila: “Mibaku mabulu me nawu, mpe nuni mazanza me nawu, kâ Mwana muntu kena na tibuka ko ti katensekela mutu.” 59 Ha manima watâ kwe wakaka: “Kundanda.” Bakala diatâ: “Mfumu kungana nzila ya toko kwe zika tata’ani.” 60 Kâ Yezu wamutêla: “Bîka bantu ba fwa bazika bantu bawu ba fwa. Kâ nge yenda mpe samuna Timfumu tia Nzambi.” 61 Mpe wakaka wamutêla: “Mbo nikulanda Mfumu, kâ kungana nzila ya toko kwe hana mbote ya mansukina kwe kanda diani.” 62 Yezu wamutêla: “Muntu wutûriri koko mu tima ti babubilaka musitu, mpe ta tala bima bie ku manima, kena wa fwanana ko mu bungu dia Timfumu tia Nzambi.”