Kwe Bisi-Rome
13 Bantu babansoni batumamana bantu ba luyâlu, mu bungu ti ka kulendi’â kwa bâ timfumu ko tala ti Nzambi ka heni’â nzila ko. Luyâlu lo mu ndilu za tûla Nzambi luyârilaka. 2 Ntiangu, muntu wutelamanaka luyâlu buzitu kakondoko mu musamu wa kubika Nzambi; bô batelamanaka musamu wo mbo babazengela mambu. 3 Mu bungu ti bantu basarilaka mbote ka batînaka mfumu zo ko, kâ ni bô basarilaka mbi. Kufweti’â watîna luyâlu ko. Tala ti mbote sarilaka mbo lukuzangula. 4 Bisari bia Nzambi biena mu bungu dia bubote bwaku. Kâ tala ti sariri mbi, bâ na bunkuta. Nswa wê nawu na lenda dia semba bô basarilaka mbi. Bisari bia Nzambi biena mu semba muntu wusarilaka mbi.
5 Ntiangu wê mfunu mu tumama, ka mu bungu dia nkesi zawu’â ko kwa, kâ ngatu mpe lwatatamana mu bâ na ngindu ya mbote. 6 Ntiangu mpe lufutilaka mpaku; mu bungu ti bamfumu bisari bia Nzambi biena mu bungu dia bubote bwa bantu babansoni, tisalu ni tio basalaka ntangu zazansoni mu lungisa kani dio. 7 Haneno kwe muna muntu bio bi kafweti baka: Kwe wô lombaka mpaku, futeno mpaku; kwe wô lombaka ti bafuta mambu, futeno mambu; kwe wô lombaka ti bamutîna, mu tîneno; kwe wô lombaka ti bamuzitisa, mu zitiseno.
8 Ka lubândi na mfuka kwe muntu, diambu’eti ya luzolo; mu bungu ti wô zoloko mpwana’andi musiku kalungisaka. 9 Musiku mbo wutâka: “Kusandi bunsuza, kuhondandi, kulabandi, kudienokenandi,” mpe ntumunu zazansoni zakaka zê mu Musiku mu ntumunu eyi zikangamane: “Fweti zolo mpwana’aku ntiana nge beni.” 10 Luzolo ka luyirikaka mbi ko kwe muntu; buna, luzolo ni ndungananu ya musiku.
11 Lufweti sila bo mu bungu ti luzebi ti ntangu yifweni yi lufweti vumbuka ku tolo, mvukulu’eto yeka nguria pene-pene yôka ntangu yi tayizi kwikila. 12 Mpimpa yeka suka; bwisi ntamana mbo butia. Tabîkeno nsalulu za mpimpa mpe talwateno binwanunu bia mutsamina. 13 Tabêno na ndiatulu ya mbote ntiana mu mwini, tabîkeno malaki ma vwandi, malavu mamingi, bunsuza, ndiatulu ya nsoni,* mbakananu peleko timbanda. 14 Kâ lwateno Mfumu Yezu Kristo, mpe ka lubândi na makani ma lungisa nsatu za nitu.