Kwe Bisi-Rome
4 Tala ti ni bo, bwe tutâ mu bungu dia Abrahame nkaka’eto mu tinsuni? Ngano nti kabaka? 2 Mu tifwani, tala ti Abrahame bamutâ wa sungama mu bungu dia nsalulu zandi, mbo kaketi bâ na misamu mi kaketi tizangula, kâ ka ha matu ma Nzambi’â ko. 3 Buna matsonoko bwe matâka? “Abrahame watûla timinu tiandi mu Yehova,* mpe musamu wo wasa ti bamutâ muntu wa sungama.” 4 Muntu wusalaka mbo bamufutaka mu bungu dia tisalu ti kasariri, kâ ka wena ko mu mu songela tiari tia mutima. 5 Ku lweka lwakaka, muntu wulembo salaka, kâ wutûlaka timinu mu Nzambi yo yisaka ti muntu wa masumu wabâ wa sungama, Nzambi mbo kamutambula ntiana muntu wa sungama mu bungu dia timinu tiandi. 6 Ntiangu Davide kazonzelaka mpe nsayi ya muntu Nzambi wu katâka ti wa sungama wena, kâ ka mu bungu dia nsalulu zandi’â ko: 7 “Nsayi kwe bantu ba balemvokela nsalulu zivwezaka musiku mpe ba bazibika masumu; 8 nsayi kwe muntu Yehova* wu kavutu lembo bambukila masumu.”
9 Ngano nsayi yo bantu kwa ba bazenga masutu yiturilaka, peleko kwe bô mpe ba balembo zenga masutu? Mu bungu ti tutêle: “Timinu tia Abrahame tiasa ti bamutâ muntu wa sungama.” 10 Buna, mu ntia ntangu bamutâ muntu wa sungama? Ngano bu bamuzenga sutu, peleko ntete bamuzenga sutu? Ka mu ntangu’â ko yi bamuzenga sutu, kâ ntete bamuzenga sutu. 11 Mpe wabaka tidimbu* bu bamuzenga sutu. Tidimbu tio tiasongela ti Nzambi wamutâ muntu wa sungama mu bungu dia timinu tiabâ nandi ntete bamuzenga sutu. Buna, wayizi bâ tata dia bantu babansoni bê na timinu ntete babazenga masutu, ngatu babatâ bantu ba sungama; 12 mpe ngatu kabâ tata dia bala ba bazenga masutu, kani kabâ kwa tata dia bô beri singasaka tifu tia zenga masutu, kâ mpe tata dia bô badiataka tintwari na timinu tieri na tata’eto Abrahame bu balembo toko mu zenga sutu.
13 Mu bungu ti ka mu nzila ya musiku’â ko Abrahame peleko bala* bandi babakila kani ti yandi mbo kaketi biarila nza, kâ mu bungu dia buderede mu nzila ya timinu. 14 Tala ti bô bakangamaka mu musiku ni bawu babiarila fwa, timinu ka tisiri’â salu ko mpe kani ka disiri’â kô ko. 15 Wa matieleka Musiku nkesi za Nzambi wunataka, kâ mu mbuka yilembo bâka musiku, ka bavwezaka musiku ko.
16 Ntiangu ni mu nzila ya timinu tubakilaka makani, mu bungu ti kabu dia mpamba diena dia tu heni Nzambi. Bala* babansoni ba Abrahame balendi baka kani. Bala bo bê ba kangama mu Musiku, kâ mpe bô bê ba kangama mu timinu tia Abrahame wê tata dia beto bansoni. 17 (Musamu wo wudelakane na wo wu batsoneka: “Nakusiri tata dia makanda mamingi.”) Musamu wo wayilama ha meso ma Nzambi yi keri silaka timinu, Nzambi yihanaka luzingu kwe ba fwa, mpe yizonzelaka misamu mieka lembo lungana ntiana mia mieka lungana.* 18 Ni bu sa ti yandi keri’â na tima ko tiaketi mu hana tivuvu, kâ wasikamana mu tivuvu, wayizi bâ na timinu ti mbo kaketi bâ tata dia makanda mamingi ntiana bu batêla wo: “Bala* baku ni bo babâ.” 19 Mpe wabongela nitu’andi ntiana’eti yafwa (mu bungu ti mvula 100 zabâ nandi) mpe Sara tisita tiabâ. Kâ timinu tiandi ka tiawola ko. 20 Mu bungu dia kani dia Nzambi ka kondo’â timinu ko mpe ka kekama ko; kâ wayizi bâ ngolo mu nzila ya timinu tiandi, mu mpila yo wahana mukembo kwe Nzambi 21 mpe watomo bâ na lukwikulu ti Nzambi lenda dieri nandi mpe dia lungisa mio mi kakanisina. 22 Ntiangu, “bamutâ muntu wa sungama.”
23 Kâ, ntêlo ya “bamutâ muntu wa sungama” ka batsoneka yo ko kwa mu bungu dia yandi, 24 kâ mpe mu bungu dia beto ba batâka bantu ba sungama, mu bungu ti mbo tukwikilaka Nzambi yavumbula Mfumu’eto Yezu kwe ba fwa. 25 Yezu bamuhana ngatu kafwa mu bungu dia masumu meto, mpe bamuvumbula kwe ba fwa ngatu batutâ bantu ba sungama.