Like

4 Buna Yezu, wa fuluka mu mpeve santu, wayenda mala na Zurde, mpe mpeve yeri kwe mu nati ku sese* 2 bilumbu 40. Kûna Diabulu wamutonta, mpe ku nsuka ya bilumbu bio, mu bungu ti kadia na kani tima ko, nsatu yamubaka. 3 Buna Diabulu wamutêla: “Tala ti nge mwana wa Nzambi wena, têla tari di diatituka dimpa.” 4 Kâ Yezu wamuvuturila: “Watsonama ti: ‘Muntu ka wufweti’â wazinga kwa mu dimpa dia mpamba ko.’”

5 Diabulu wamunakisa ha mbuka yimosi ya zangama mpe mbala mosi wamusongela bimfumu biabiansoni bia mutoto. 6 Buna wamutêla: “Mbo nikuhana bimfumu bi biabiansoni na mukembo’awu, mu bungu ti kwe meno bahana bio mpe kwe wô wu nzololo nihanaka bio. 7 Buna, tala ti kunsambiri kwa mbala mosi, mbo bibâ bia nge.” 8 Yezu wamuvuturila: “Watsonama: ‘Ni Yehova* Nzambi’aku fweti sambila, mpe ni Yandi kwa fweti sarila tisalu tia santu.’”

9 Ha manima wamunata ku Yerusaleme, wamutelamasa ha mbuka yiyôkele ya zangama ya tempelo mpe wamutêla: “Tala ti nge mwana wa Nzambi wena, tilosa ku banda, 10 mu bungu ti watsonama: ‘Mbo katuma mbazi zandi mu bungu dia nge, mu ku kengerela,’ 11 mpe, ‘Mbo bakunata mu moko mawu, ngatu kulu kwaku kwalembo botana mu tari.’” 12 Yezu wamuvuturila: “Watsonama: ‘Kufweti’â watonta Yehova* Nzambi’aku ko.’” 13 Dieka bo Diabulu bu kamanisa mu mu tonta, wayenda mala na yandi mu kêla ntangu yakaka ya mbote.

14 Yezu wakâla ku Galile wa fuluka mu ngolo za mpeve. Mpe babatika mu zonzela bubote bwandi ku tizunga tio tiatiansoni. 15 Wabatika mpe mu longesa mu sinagoge zawu, mpe bantu babansoni yandi beri zitisaka.

16 Ha manima wayenda ku Nazarete ku bamukurisila, mpe ntiana bu keri saka mu tilumbu tia Sabala, wakota mu sinagoge mpe watelama mu tanga. 17 Buna bamuhana rulo ya mbikuri Izayi, wazibula yo mpe wabaka mbuka yi batsoneka: 18 “Mpeve ya Yehova* mu meno yena mu bungu ti kuntumbiri mu samuna nsangu za mbote kwe bamputu. Kuntambikiri mu samuna timpwanza kwe bô bê ku boloko, mpe kwe bô bafwa meso ti mbo bavutu mona, mu hana timpwanza kwe bô ba baniekonaka, 19 mu samuna ntangu ya bweso bwa Yehova.”* 20 Wazinga rulo, wakarisa yo kwe tisari, mpe wazakala; mpe bantu babansoni beri mu sinagoge yandi kwa beri talaka. 21 Buna wabatika mu ba têla: “Lumbu ti matsonoko mo ma luwîri malungane.”

22 Bantu babansoni babatika mu tâ timbangi tia mbote mu yandi. Bayituku mu misamu mia toma mieri dukaka mu munwa’andi, mpe batâ: “Ngano yandi ka mwana wa Yozefe’â ko?” 23 Buna wabatêla: “Ntembe kâni mbo lusarila tingana eti mu meno: ‘Doktere, tibuka nge beni. Misamu mi tawîri mi wayirikiri ku Kafarnawome, yirika mio mpe ku tizunga tiaku.’” 24 Buna watâ: “Wa matieleka nita lu têla ka kwena mbikuri ko yi batambulaka mu tizunga tiandi. 25 Mu tifwani, matieleka nita lu têla: Mifwiri miamingi mia mikento mieri ku Israele mu bilumbu bia Eliya mu ntangu zulu diakangama tûka mvula zitatu na ngonda 6, mpe nsatu ya ngolo yatula ku nsi yayansoni. 26 Kâ Eliya ka bamutambika na kani kwe wumosi wa bakento bo ko, kâ kwe mufwiri wa Sarepeta kwa ku tizunga tia Sido. 27 Bantu babingi mpe beri na bwazi ku Israele mu ntangu ya mbikuri Elize; ka batsemesa* na kani wumosi mu bawu ko, kâ Namane kwa Musi-Siri.” 28 Bantu babansoni bawâ misamu miandi mu sinagoge nkesi zatomo ba baka, 29 batelama mpe bamudukisa mu ntinu ku mumvuka. Bamunata ku nsongi ya mongo ha batungila mumvuka’awu, ngatu bamulosa ku banda, tia mutu. 30 Kâ wayôka ha kati diawu mpe wayenda kwandi.

31 Yandi wakôka ku Kafarnawome, mumvuka wumosi wa Galile. Mpe bawu keri longesaka mu tilumbu tia Sabala, 32 mpe bantu batomo yituku mu mpila yi keri longeselaka, mu bungu ti na lutumu keri zonzaka. 33 Kâ mu sinagoge muntu weri mô weri na mpeve, demo ya mbi, mpe mu zu dia ngolo keri kawulaka: 34 “Ah! Ntia musamu wê neto na nge, Yezu Musi-Nazarete? Ngano wiziri mu tu fukisa? Wa ntomono zaba nge nani wena: Musantu wa Nzambi!” 35 Kâ Yezu wamubamina bu katâ: “Kuta, mpe duka mu yandi!” Buna bu kamana losa bakala dio ha mutoto ha kati dia bantu, demo yaduka mu yandi mpe ka yamusa tima ko. 36 Bantu babansoni bayituku mpe babatika mu tâ bawu na bawu: “Yo ntia mpila nzonzolo? Mu bungu ti na lutumu mpe na ngolo kata tuma mpeve za mbi, mpe duka zita duka!” 37 Buna nsangu zandi ni zeri yanganaka kwakwansoni ku tizunga.

38 Bu kakatuka ku sinagoge, wakota mu nzo ya Simo. Kâ nguri ya mukento wa Simo fievre ya ngolo yeri nandi, mpe bamulomba mu mu bakisa. 39 Wakondama ha matu mandi, wabamina fievre, mpe fievre yawa. Hô nkatika bendo watelama mpe wabatika mu ba kipa.

40 Kâ bwisi bu bwayila, bô babansoni beri na bantu babâ na bimbevo bia mpila na mpila babanata kwe yandi. Mpe wabawasisa bu katenseka moko kwe mosi na mosi mu bawu. 41 Mpe demo zaduka mu bantu babîngi ebu zeri kawulaka: “Nge ni Mwana wa Nzambi.” Kâ yimina keri za yiminaka, keri’â za hanaka nzila ko mu zonza mu bungu ti bazaba ti yandi ni Kristo.

42 Bwisi bu bwatia wayenda ha mbuka ya yandi kaka. Kâ pôka dia bantu diabatika mu dinga Yezu, mpe diatula ku mbuka yi kabâ, bayêla mu mu kabakasa mu kwenda mala na bawu. 43 Kâ yandi wabatêla: “Mfweti samuna nsangu za mbote za Timfumu tia Nzambi mu mimvuka miakaka mpe, mu bungu ti musamu ni wo bakuntambikila.” 44 Buna Yezu waye samunina mu sinagoge za Yude.