Like

13 Mu ntangu yîna bantu bakaka babâ hâna, bayizi tâ kwe Yezu misamu mia Bisi-Galile babahonda kwe Pilate bu beri hanaka mikayulu. 2 Buna wabavuturila: “Beno lubenzi ti Bisi-Galile bo bayôkele Bisi-Galile bakaka mu masumu mu bungu ti mpasi zo zabaturila? 3 Wa nita lu têla, kâni; kâ tala ti ka lusobele’â mabanza ko, beno bansoni mbo lufwa ntiana bawu. 4 Peleko bantu 18 bafwa mu bungu ti nzo ya zangama ya Silowe yababwila—lubenzi ti bayôka mambu na bantu babansoni bakaka babâka ku Yerusaleme? 5 Wa nita lu têla, kâni; kâ tala ti ka lusobele’â mabanza ko, beno bansoni mbo lufwa ntiana bawu.”

6 Ha manima wabahana tifwani eti: “Bakala dimosi wabâ na mufige wu kakuna ku musitu’andi wa vinu. Mpe wayiza mu tia mbutu mu muti wo, kâ ka baka tima ko. 7 Buna watâ kwe tisari tia musitu wa vinu, ‘Mvula zeka zitatu nikwizi dingaka mu tia mbutu mu mufige wu. Kâ ka nibakaka tima ko. Zenga wo! Mbuka ya mpamba kwa wuta tâna.’ 8 Tisari tiamuvuturila, ‘Mfumu toko wa bîka mvula yimosi, bulu nitima ha ndeko muti wango mpe bima bitomesaka mutoto* nitûla mu kati. 9 Tala ti wubutiri mbutu mu bilumbu bita kwiza, musamu wa mbote; kâ tala ti kâni, buna zenga wo.’”

10 Tilumbu timosi tia Sabala, Yezu mu sinagoge yimosi keri longesaka. 11 Mpe tala! Mukento wumosi weri kûna wabâ na mpeve yamuhana timbevo* tûka mvula 18; wa kondama weri mpe keri’â na lenda ko dia tomo vumbuka. 12 Yezu bu kamumona, wamutêla: “Mukento, wasiri mu timbevo tiaku.” 13 Wamutenseka moko, mpe hô nkatika bendo wavumbuka mpe wabatika mu kembela Nzambi. 14 Kâ ntwarisi ya sinagoge wabaka nkesi mu bungu ti Yezu wawasisa muntu mu tilumbu tia Sabala, buna watâ kwe pôka dia bantu: “Bilumbu bia 6 bie kô bi tulendi sala; buna yizeno mu bilumbu bio ngatu baluwasisa, kâ ka mu tilumbu tia Sabala ko.” 15 Kâ Mfumu wamuvuturila: “Bangungu, mu tilumbu tia Sabala ngano ka kwena muntu ko ha kati dieno wusutulaka ngombe’andi peleko buluku* diandi mu mpaka mu kwe dia hana mamba? 16 Ngano ka wufwanane’â ko mu kûla mukento wu wê mwana wa Abrahame mu misinga miandi mu tilumbu tia Sabala, Satana wu kakanga tûka mvula 18?” 17 Bu katâ misamu mio, mbeni zandi zazansoni nsoni zababaka, kâ bantu babansoni babatika mu yangalala mu misamu miamiansoni mia nzitukulu mi keri yirikaka.

18 Buna wavutu yika: “Timfumu tia Nzambi na nti tidelakane mpe na nti ndendi tia fwanakasa? 19 Tiena ntiana mbutu ya mutarde yibongele muntu mpe yikele kuna ku nsaba’andi, yikuriri, yizi bâ muti, mpe nuni za mazulu mu bintala biandi zikwizi tungilaka mazanza mawu.”

20 Wavutu tâ: “Na nti ndendi fwanakasa Timfumu tia Nzambi? 21 Tiena ntiana levire yibongele mukento yi kavukase mu bidezolo bitatu bia binene* bia farine tii bu naka pate yayansoni.”

22 Mpe Yezu bu keri kwendaka ku Yerusaleme, mu mimvuka na mu mahata ma keri kwe yôkele keri kwe longese. 23 Bakala dimosi diamutêla: “Mfumu, kambo ndambu bantu kwa yivûka?” Yandi wabatêla: 24 “Seno ngolo zazingi mu kota ha mwelo wa fioti, mu bungu ti wa nita lu têla, babingi badinga mu kota kâ ka balenda ko. 25 Mfumu-nzo bu katelama mpe bu kakanga mwelo, mbo lubâ ku mbazi, mbo lukonkota ha mwelo bu lutâ, ‘Mfumu, tu ziburila.’ Yandi mbo kaluvuturila: ‘Ka nzebi’â ko kwe lutûkiri.’ 26 Buna mbo lubatika mu tâ, ‘Na nge tweri kwe die mpe tweri kwe nwe, mpe mu nzila zeto za zinene weri kwe longese.’ 27 Kâ mbo kalutêla, ‘Ka nzebi’â ko kwe lutûkiri. Yendeno mala na meno beno bansoni lusarilaka kondo kwa buderede!’ 28 Ni kô ludirila mpe lukwetesela mêno meno, bu lumona Abrahame, Izake, Yakobe, na mbikuri zazansoni mu Timfumu tia Nzambi, kâ beno balulosele ku mbazi. 29 Musamu wakaka, bantu mbo batûka ku este, ku weste, ku nore, na ku side, mpe mbo bazakala ha meza mu Timfumu tia Nzambi. 30 Mpe zabeno ti bantu bê kô bê ba mansukina bakwizi bâ ba ntete, mpe ba ntete bakwizi bâ ba mansukina.”

31 Mu ntangu yîna Bafarize bayiza mpe bamutêla: “Duka, mpe katuka kû, mu bungu ti Erode nge kata zolo honda.” 32 Wabatêla: “Yendeno lwatêla mubaku wo, ‘Tala! bademo nita kuma mpe bantu nita wasisa lumbu ti na mbazi, mpe mu tilumbu tia bitatu mbo nimanisa.’ 33 Kâ, mfweti tatamana mu landa nzila’ani lumbu ti, mbazi na muna-mbazi, mu bungu ti ka bafweti’â* bahonda mbikuri ku hata diakaka ko tala ti ka ku Yerusaleme’â ko. 34 Yerusaleme, Yerusaleme, hata dihondaka bambikuri mpe diwindaka matari kwe bô ba bamutambikilaka—mbala zikwa kwa nadinga mu kutika bala baku ntiana bu kutikaka nsusu bala bandi ku nsi’a mahayi mandi! Kâ ka lwazolo’â ko. 35 Tala! Nzo’eno balusisiriri yo. Wa nita lu têla, ka luvutu’â ku mona ko na tii bu lutâ: ‘Kabâ wa sakumunu yandi ta kwiza mu nkumbu ya Yehova!’”*