Kwe Bisi-Galate
5 Ni mu bungu dia timpwanza tia mpila yo Kristo katukûriri. Buna bêno ba kangama mpe ka lutambulandi ti lwavutu bâ ngamba.
2 Taleno! Meno Paulo nilutêlele ti, tala ti luzengoso masutu, Kristo ka vutu’â bâ salu ko kwe beno. 3 Mvutulu tâ kwe muna muntu wuta zengoso sutu ti fweti zitisa Musiku wawansoni. 4 Beno luta dinga balutâ ba sungama mu nzila ya musiku, ba hambana lwena na Kristo; lukatukiri mu bweso bwandi bwa nzitukulu. 5 Beto mu nzila ya mpeve tuta kêla na timina diadiansoni buderede bu tukekoloko butûkaka mu timinu. 6 Mu bungu ti kwe bô bê mu bumosi na Kristo Yezu, ka tifu’â ko tia zengoso sutu peleko tia lembo zengoso sutu tie mfunu, kâ timinu tisalaka mu nzila ya luzolo tie mfunu.
7 Mu mpila ya mbote lweri kwe diokele. Ngano nani walukabakase mu tatamana mu zitisa matieleka? 8 Mbanzulu za mpila yo ka zitûkiri’â kwe wô walutêle mbila ko. 9 Ndambu levire pate yayansoni yinakisaka. 10 Lukwikulu lwe nani ti beno lwe mu bumosi na Mfumu ka lubanzila mu mpila yakaka ko; kâ muntu wukotesa vwandi ha kati dieno, ni bu wubâ ka nani, mbo kabaka mfundusu yimufwanane. 11 Bampangi, mu wo wukuntariri, tala ti tifu tia zengoso sutu natiri kwe samuni, mu bungu dia nti bata tatamana mu kunkwamisa? Buna, poto* dia matimuna ka disiri’â tima ko titêsaka kuba. 12 Nzololo ti bô bakotesaka vwandi ha kati dieno bazenga binama biawu bi babakisaka mu buta.*
13 Bampangi, ku timpwanza balutêle mbila; kâ ka lusarilandi timpwaza tio ntiana nzila mu lungisa nsatu za nitu, kâ mu luzolo yendeno salasane beno na beno. 14 Mu bungu ti Musiku wawansoni mbo wulunganaka* mu ntumunu yimosi yitâka: “Fweti zolo mpwana’aku ntiana nge beni.” 15 Kâ tala ti lutatamane mu kwe tilwakisi na mu kwe timwisi mpasi beno na beno, seno keba mu bungu ti lulendi hondasana beno na beno.
16 Buna nilutêlele: Tatamaneno mu kwe diatiri mu lutwalusu lwa mpeve, mpe ka lulungisa na kani nsatu yimosi ko ya nitu. 17 Mu bungu dia nsatu zandi, nitu mpeve yitelemanaka mpe mpeve nitu yitelamanaka; ba bole telamana batitelamanaka. Ntiangu mio mi luzololo mu yirika, ka luyirikaka mio ko. 18 Musamu wakaka ni wena’eti, tala ti mpeve yita lu twarisa, buna ka lusiri’â mu lutumu lwa musiku ko.
19 Bwawu bu nsalulu za tinsuni zitomono moneka, mpe nsalulu zango ni bunsuza,* ndiatulu ya mvindu, ndiatulu ya nsoni,* 20 nsambululu ya biteki, bunganga,* yina bantu, mbakananu, timbanda, nkesi za yôka, kondo kwa tiwisa, tihambula, binzambi-nzambi, 21 tifu tia dienokena, nwa malavu mamingi,* malaki ma vwandi na bima bia mpila yo. Nilulwengese ntiana bu natoko lu lwengesa, bô basarilaka misamu mio ka babiarila Timfumu tia Nzambi ko.
22 Ku lweka lwakaka, mbutu ya mpeve ni luzolo, nsayi, tidzunu, luvivululu, mutima wa mbote, mbote, timinu, 23 bulembami, tifu tia tiyimina. Ka kwena musiku ko wutelamanaka misamu mio. 24 Musamu wakaka ni wena’eti, bô bê bantu ba Kristo Yezu, bakomene nitu’awu ha poto na bima bi yizololo na nsatu zandi.
25 Tala ti mu mpeve tuzingaka, tatatamaneno mpe mu diatila mu mpila ya kutama mu lutumu lwa mpeve. 26 Ka tudingandi mu songela ti tuyôkele bantu bakaka bu tukwe tsotsasane mpe bu tukwe tidienokene beto na beto.