Kwe Bisi-Rome
16 Nilulombele mu bwana Febe, mpangi’eto ya yikento wê tisari mu timvuka tia Sankere. 2 Mulemvo’eno mu bwaneno mu Mfumu mu mpila yidelakane na basantu, mu haneno lubakusu lwe nandi nsatu, mu bungu ti yandi wabakisi bantu babingi, na meno mpe.
3 Haneno mbote kwe Priska na Akila, mpangi zani mu tisalu mu Kristo Yezu, 4 bawu batûla luzingu lwawu mu mpasi mu bungu dia meno.* Meno na bantu balembolo Bayuda mu bimvuka matondo tuta ba vuturila. 5 Haneno mpe mbote kwe timvuka tikutakanaka mu nzo’awu. Haneno mbote kwe mpangi’ani ya luzolo Epenete, yandi wê ha kati dia bantu ba ntete bayizi bâ milongoki mia Kristo ku Azi. 6 Haneno mbote kwe Maria, yandi wasariri kwakwingi ha kati dieno. 7 Haneno mbote kwe Andronike na Yuniase, bê bantu ba kanda diani na ndiku zani za boloko. Bantumwa bawu batomono zaba mpe ntangu zazingi beka tintwari na Kristo yôka meno.
8 Haneno mbote zani kwe Ampilatuse wê ndiku’ani ya luzolo mu Mfumu. 9 Haneno mbote kwe Urbane wê ndiku’eto ya tisalu mu Kristo, na mpangi’ani ya luzolo Stakise. 10 Haneno mbote kwe Apelisi, tisari ti batambula mu Kristo. Haneno mbote kwe bantu babâka mu nzo ya Aristobule. 11 Haneno mbote kwe Erodione wê mu kanda diani. Haneno mbote kwe bantu babâka mu nzo ya Narsise bê milongoki mia Mfumu. 12 Haneno mbote kwe Trifene na Trifoze, bakento basalaka kwakwingi mu bungu dia Mfumu. Haneno mbote kwe mpangi’eto ya luzolo Persise, mu bungu ti wasariri kwakwingi mu bungu dia Mfumu. 13 Haneno mbote kwe Rufuse, wu basôla kwe Mfumu, na kwe nguri’andi wê mpe nguri’ani. 14 Haneno mbote kwe Asinkirite, Filegone, Ermese, Patrobase, Ermase, na kwe mpangi zi bê tintwari. 15 Haneno mbote kwe Filologe na Yulia, kwe Nere na tibusi tiandi, kwe Olimpase na kwe basantu babansoni ba bê tintwari. 16 Hanasaneno mbote na tiya twatwansoni. Bimvuka biabiansoni mu Kristo biluheni mbote.
17 Bwawu bu bampangi, nilutindisi mu sa keba na bantu bakotesaka tihambula mpe batulumunaka misamu mitêsaka makuba, misamu milembo kwelanaka na ndongosolo yi lwatambula. Bêno mala na bawu. 18 Mu bungu ti bantu bo ka zena ngamba za Mfumu’eto Kristo ko, kâ ngamba zena za nsatu zawu. Mu nzonzolo’awu ya bungungu mpe yilebaka, mitima mia bantu balembolo zaba misamu bawubakasaka. 19 Kâ bantu babansoni bazebi tifu tieno tia tumama, mpe nsayi yayingi ye nani mu bungu dia musamu wo. Nzololo ti lwabâ na ndwenga mpe lwasarila mbote, kâ ka balulandandi mambu mpe diokeno mbi. 20 Nzambi yihanaka tidzunu ntamana mbo kakosakasa Satana ku nsi’a malu meno. Bîka ti bweso bwa nzitukulu bwa Mfumu’eto Yezu bwabâ na beno.
21 Timote, wê ndiku’ani ya tisalu, mbote kalutambikiri, kâ mpe na Lusiuse, Yazone na Sosipatere bê bantu ba kanda diani.
22 Meno, Tertiuse, muntu watsonekene mukanda wu, mbote nita lu tambikila mu Mfumu.
23 Gayuse, muntu wakumbweni na wabweni timvuka tiatiansoni, mbote kaluheni. Eraste lundaka mbongo za mumvuka na mpangi’andi ya bakala Karituse, mbote baluheni. 24* ——
25 Nzambi lendi lu hana ngolo mu nzila ya nsangu za mbote zi naluzabikisi, na mu nzila ya tisalu tia samuna tia Yezu Kristo. Nsangu zango bazabikisa zo mu nzila ya mansweki ma santu ma balunda tûka ntangu yayingi, 26 kâ bwawu bu batuzabikisi mo mu nzila ya Matsonoko ma mbikululu. Nzambi’eto yizingaka mankululu yaheni ntumunu ti bazabikisa mo kwe makanda, ngatu makanda matumama mu nzila ya timinu. 27 Nzambi, wê na ndwenga yandi kaka, kabaka mukembo ntangu zazansoni mu nzila ya Yezu Kristo. Amen.